لاہور: کرکٹ سمیت بھارتی پنجاب کی 9 ٹیمیں آئندہ ماہ پاکستانی پنجاب کا دورہ کر یں گی۔پاکستان اور بھارت کے درمیان کھیل پوری طرح سے بحال نہیں ہوا لیکن صوبائی سطح پر گزشتہ 10 سالوں میں بھارتی پنجاب کا سب سے بڑا دستہ پاکستان آئے گا۔ ان میں کرکٹ، ریسلنگ، ہاکی، رسہ کشی، اور کبڈی کی مرد اور خواتین کی ٹیمیں شامل ہیں۔ بھارتی دستہ 21 فروری کو واہگہ باڈر کے راستے لاہور پہنچے گا۔ مقابلوں میں حصہ لینے کے بعد بھارتی دستہ 25 فروری کو واپس روانہ ہوگی۔ پاکستان اور بھارتی پنجاب کی کرکٹ ٹیموں کے درمیان تین ٹی 20 میچز قدافی اسٹیڈیم لاہور میں شیڈول ہیں۔ میچ بائیس، تئیس اور چوبیس فروری کو کھیلے جائیں گے۔

لاہور: سابق ٹیسٹ کرکٹرز کے مطابق دبئی میں پاکستان اور سری لنکا کے درمیان دوسرے ٹیسٹ کیلئے کوئی ٹیم فیورٹ نہیں،تاہم جیت کیلئے دبئی کی وکٹ پر اسپنرز کو کردار ادا کرنا ہوگا۔ ٹیم پاکستان کی اصل طاقت ہے باولنگ اور باولنگ کی جان ہے اسپنرزہیں۔ ابوظہبی کے پہلے ٹیسٹ میں سری لنکن بلے بازوں نے عمدہ بیٹنگ کرکے پاکستان کی جیت کو ناممکن بنا دیا تھا۔ سابق چیف سلیکٹر اقبال قاسم کے مطابق دبئی کی وکٹ اسپنرز کے لئے سازگار ہے۔ ٹیسٹ کرکٹر حسن رضا کے مطابق پہلے ٹیسٹ کی طرح دبئی ٹیسٹ میں بھی بلے بازوں نے کام دکھایا تو اسپنرز بھی مایوس نہیں کریں گے۔ کرکٹرز نے پاکستانی کمزور مڈل آرڈر بیٹنگ کو مضبوط بنانے کی ضرورت پر زور دیا۔

کراچی: قومی ویمن کرکٹ ٹیم تین ملکی ٹورنامنٹ میں شرکت کیلئے قطر روانہ ہوگئی۔ کپتان ثنائ میرکہتی ہیں کہ جنوبی افریقہ اورآئرلینڈ جیسی مضبوط ٹیموں کے خلاف اچھا کارکردگی دکھائیں گے۔ 14رکنی قومی ویمن ٹیم پانچ آفیشلزکے ہمراہ کراچی سے دوحہ روانہ ہوئی۔ قومی ٹیم دوحہ میں دس سے پچیس جنوری تک جنوبی افریقہ اور آئرلینڈ کی ویمن ٹیموں کے خلاف ون ڈے اور ٹی ٹوئنٹی چیمپئن شپ میں حصہ لے گی۔ ٹریننگ کیمپ ٹورنامنٹ کیلئے معاون ثابت ہوگا، کپتان ثنائ میر نے روانگی سے قبل میڈیا سے گفتگو کرتے ہوئے کہا کہ کھلاڑیوں نے کیمپ میں تینوں شعبوں میں سخت محنت کی ہے۔ کھلاڑیوں کی فزیکل فٹنس میں بھی بہتری آئی ہے۔ جنوبی افریقہ اور آئرلینڈ جیسی مضبوط ٹیموں کے خلاف اچھی کارکردگی دکھانے کی کوشش کریں گے۔ انہوں نے کہا کہ تین ملکی ٹورنامنٹ ورلڈ ٹی ٹوئنٹی کی تیاریوں میں معاون ثابت ہوگا۔

سین جوز: فیفا انڈر 17ویمنز ورلڈ کپ 15مارچ سے کوسٹاریکا میں شروع ہوگا۔فیفا کے اعلامیے کے مطابق میگا ایونٹ میں دنیا بھر سے 16ٹیمیں حصہ لیں گی جنہیں چار گروپوں میں تقسیم کیا گیا ہے ۔گروپ اے میں میزبان کوسٹاریکا ،وینزویلا،اٹلی اور زمیبا ۔گروپ بی میں گھانا ،کوریا،جرمنی اور کینیڈا۔گروپ سی میں نیوزی لینڈ ،پیراگوئے ،اسپین اور جاپان جبکہ گروپ ڈی میں میکسیکو ،کولمبیا،چین اور نائیجیریا شامل ہیں ۔

میلبورن: رواں سال کا پہلا گرینڈ سلام آسٹریلین اوپن ٹینس ٹورنامنٹ کا آغاز 13جنوری سے میلبورن میں ہوگا۔میگا ایونٹ کے مینز ایونٹ میں سربیا کے نوواک جوکووچ جبکہ ویمنز ایونٹ میں بیلاروس کی وکٹوریہ آزارینکا اپنے اعزاز کا دفاع کریں گی ۔