نئی دہلی: بھارتی اداکار وندودارا سنگھ نے انکشاف کیا ہے انڈین پریمئر لیگ میں سب کچھ فکس ہوتا ہے ٹیموں کے مالکان سے لے کر بالی وڈ اداکاروں تک سب لوگ شرطیں لگا کر میچ فکس کرتے ہیں۔ بھارتی سیاستدانوں نے کرکٹ بورڈ پر پابندی لگانے کا مطالبہ کر دیا۔بھارتی ٹی وی چینل کے خفیہ آپریشن کے دوران اداکار وندودارا سنگھ کا کہنا تھا عام بکیوں کے علاوہ آئی پی ایل ٹیموں کے مالک بھی میچ فکسنگ میں ملوث ہیں۔ آئی پی ایل کے سابق سربراہ للت مودی نے نہ صرف میچ فکسنگ شروع کی بلکہ لاکھوں ڈالر بھی کمائے۔ یونین منسٹر شرد پوار للت مودی کو سپورٹ کرتے تھے۔ وندو سنگھ کا کہنا تھا آئی پی ایل ٹیم کنگ فشر کے مالک وجے مالیا نے آئی پی ایل میں شرطیں لگا کر 200 کروڑ کمائے۔ وندو دارا سنگھ نے خود بھی میچ فکسنگ کا اعتراف کیا۔ ان کا کہنا تھا پردہ اٹھے گا تو بڑے بڑے نام سامنے آ جائیں گے۔ بھارتی میڈیا کے خفیہ آپریشن کے بعد آئی پی ایل میں میچ فکسنگ پر رپورٹ تیار کرنے والے سپریم کورٹ کے جج جسٹس مدگال کا کہنا تھا سارے معاملے کی تحقیقات ہونی چاہیں۔ جسٹس مدگال کا کہنا تھا میچ فکسنگ اور سپاٹ فکسنگ کبھی بند نہیں ہو سکتی۔ انہوں نے رپورٹ پیش کر دی ہے حتمی فیصلہ سپریم کورٹ کرے گی۔ اداکار وندو دارا سنگھ کے انکشافات کے بعد بھارتی سیاسی رہنماوں اور شہریوں نے آئی پی ایل کو سخت تنقید کا نشانہ بنایا ہے۔ بھارتی جنتا پارٹی کے رہنما یشونت سنہا کا کہنا تھا بی سی سی آئی کو بین کر دینا چاہیے کیوں کہ یہ کرکٹ فکسنگ کا بہت بڑا اڈا بن گیا ہے۔

دبئی: سوئس ٹینس اسٹار راجر فیڈرر نے دبئی ٹینس چیمپئن شپ کے دوسرے راونڈ میں جگہ بنا لی۔ ٹینس چیمپئن شپ کے پہلے روانڈ میں سوئس کھلاڑی راجر فیڈرر جرمنی کے بینجمن بیکر کے خلاف ان ایکشن ہوئے۔ فیڈرر نے شاندار کھیل کا مظاہرہ کر کے چھ ایک، چھ چار سے فتح سمیٹی۔ دوسری جانب میکسیکو میں ہونے والے ٹینس ٹورنامنٹ کے مینز سنگلز ایونٹ کے پہلے راونڈ میں فرانس کے جیریمی چارڈی کا سامنا آسٹریلین حریف میتھیو ایبڈین سے ہوا۔ فرنچ کھلاڑی نے 1 گھنٹہ 5 منٹ کے مقابلے کے بعد آسٹریلین حریف کو زیر کیا۔ چارڈی کی فتح کا اسکور سات پانچ، چھ صفر رہا۔

دبئی: قومی انڈر19 ٹیم کے کپتان سمیع اسلم نے انگلینڈ کیخلاف سیمی فائنل میں کامیابی کوٹیم ورک کا نتیجہ قراردے دیا ۔ مین آف دی میچ ظفرگوہرکہتے ہیں کہ ان کی اورعماد بٹ کی شراکت سے انگلش ٹیم دباﺅمیں آگئی۔دبئی میں پریس کانفرنس کرتے ہوئے پاکستان انڈرنائنٹین ٹیم کے کپتان سمیع اسلم نے کہا کہ سعود شکیل کے بعد ظفرگوہراورعماد بٹ کی عمدہ بیٹنگ نے فتح دلوادی۔ ان کا کہنا تھا کہ چند کھلاڑیوں نے اچھے شاٹس نہیں کھیلے۔ کوشش ہوگی کہ فائنل میں ان غلطیوں کو نہ دوہرایا جائے۔مین آف دی میچ ظفرگوہرکا کہنا تھا کہ ان کی کوشش تھی کہ پورے پچاس اوورزکھیلیں اورپارٹنرشپ قائم کریں جس میں وہ کامیاب رہے۔ انہوں نے کہا کہ عماد بٹ اوران کے درمیان شراکت سے انگلش ٹیم پریشرمیں آگئی۔کپتان سمیع اسلم نے بتایا کہ اوپننگ بیٹسمین امام الحق کوہیمسٹرنگ انجری ہوئی ہے لیکن امید ہے کہ وہ ہفتے کوہونیوالے فائنل سے قبل فٹ ہوجائیں گے۔

ریو ڈی جنیرو: عالمی نمبر ایک اسپینش ٹینس اسٹار رافیل نڈال نے الیگزینڈر کو زیر کر کے ریو اوپن ٹینس ٹورنامنٹ اپنے نام کر لیا۔برازیل کے شہر ریو ڈی جنیرو میں ہونیوالے اے ٹی پی ایونٹ کے فائنل میںا سپینش ا سٹار رافیل نڈال یوکرائن کے الیگزینڈر ڈولگو پولوف کے خلاف ان ایکشن ہوئے۔عالمی نمبر ایک نے حریف کھلاڑی کو 1 گھنٹہ 41 منٹ سات سیکنڈ میں زیر کر لیا۔دفاعی چیمپئن رافیل نڈال کی فتح کا سکور چھ تین ، سات چھ رہا۔اس سے پہلے سیزن کے پہلے گرینڈ سلم آسٹریلین اوپن کے فائنل میںنڈال کو شکست کا سامنا کرنا پڑا تھا۔

کنگسٹن: ویسٹ انڈیز کے ا سٹار آل راﺅنڈر کرس گیل انگلینڈ کیخلاف ہوم ون ڈے سیریز سے باہر ہوگئے۔ انہیں کمر میں تکلیف لاحق ہے، میزبان بورڈ نے انگلینڈ سے تین میچز پر مشتمل سیریز میں اسکواڈ میں کرس گیل کی عدم دستیابی پر ڈیون سمتھ کو بطور متبادل شامل کر لیا ہے۔ گیل کو یہ انجری آئرلینڈ کیخلاف پہلے ٹی 20 میں پیش آئی تھی جس کے بعد انہوں نے یورپی حریف کیخلاف دوسرا میچ نہیں کھیلا تھا۔ وہ جمیکا میں اپنی کمر کا ٹریٹمنٹ کروائیں گے۔ انگلینڈ اور ویسٹ انڈیز کے درمیان ون ڈے سیریز 28 فروری سے شروع ہوگی۔ دیگر دو میچز بالترتیب 2 اور 5 مارچ کو شیڈول ہیں اس کے بعد مہمان ٹیم بارباڈوس میں تین ٹی 20 میچز کھیلے گی۔