دبئی: پاکستان کرکٹ ٹیم کے کپتان مصباح الحق کلینڈرائیرمیں ایک ہزاررنزمکمل کرنے والے دنیا کے تیسرے جبکہ پاکستان کے پہلے کھلاڑی بن گئے۔دبئی میں کھیلے گئے دوسرے ون ڈے میں قومی ٹیم کے قائد مصباح الحق نے جیسے ہی اپنے انفرادی اسکور میں چودہ رنز کا اضافہ کیا تو وہ کلینڈائیرمیں ایک ہزار رنز مکمل کرنے والے کھلاڑیوں کی فہرست میں شامل ہوگئے۔کلینڈائیر میں ایک ہزار چورانوے رنز کے ساتھ آسٹریلوی کپتان جارج بیلی پہلے نمبرپر ہیں۔ بھارت کے ویرات کوہلی کا فہرست میں دوسرا نمبر ہے جو ایک ہزار تینتیس رنز اسکور کرچکے ہیں جبکہ ایک ہزار سترہ رنز کے ساتھ مصباح الحق دنیا کے تیسرے کھلاڑی ہیں۔ مصباح الحق کو رواں سال ایک ہزاررنز مکمل کرنے والے پہلے پاکستانی کھلاڑی کا اعزاز بھی حاصل ہے۔

پیرس: سوئس ٹینس سٹار روجر فیڈرر کا پیرس ماسٹرز کے سیمی فائنل میں عالمی نمبر ایک سپینش سٹار رافیل نڈال سے سامنا ہوگا۔فرانس کے شہر پیرس میں جاری ماسٹرز ٹورنامنٹ کے کوارٹر فائنل مقابلے میں روجر فیڈرر کا مقابلہ ارجنٹائن کے یوآن مارٹن ڈیل پوٹرو سے ہوا ۔ فیڈرر نے ڈیل پوٹرو کو تین سیٹس میں 6-3,4-6اور6-3کے سکور سے شکست دیدی ۔ سیمی فائنل میں فیڈرر کا مقابلہ رافیل نڈال سے ہوگا ۔ اس سے قبل رافیل نڈال نے سوئس کے سٹینسلس وورینکا کو کوارٹر فائنل مقابلے میں 6-1اور6-4سے ہر ا کر سیمی فائنل کے لئے کوالیفائی کیا تھا۔روجر فیڈر ر اگر پیرس ماسٹرز کا ٹائٹل جیتنے میں کامیاب ہوگئے تو یہ ان کے کیریئر کا 22واں ٹائٹل ہوگا۔

دبئی: جنوبی افریقہ کی ٹیم میں ورلڈ نمبر ون بیٹسمین ہاشم آملہ اور فاسٹ بولر ڈیل سٹین کو اگلے تینوں ون ڈے میچز کھیلنے کا موقع مل گیا۔ایک روزہ کرکٹ میں عالمی نمبر ایک پوزیشن پر قابض جنوبی افریقی بیٹسمین ہاشم آملہ اپنے بچے کی ولادت کے باعث گھر چلے گئے تھے جس کی وجہ سے وہ دوسرے ٹیسٹ اور ابتدائی دو ون ڈے میچز میں پاکستان کے خلاف ان ایکشن نہیں ہو سکے تھے۔ ادھر ڈیل سٹین بھی کمر کی تکلیف سے صحتیاب ہو چکے ہیں اور گراونڈ میں اپنی صلاحیتوں کے جوہر دکھانے کو بے تاب ہیں۔ جنوبی افریقی منیجر کے مطابق پاکستان کے خلاف آئندہ تین ایک روزہ میچوں میں ٹیم کو ہاشم آملہ اور ڈیل سٹین کی خدمات حاصل ہونگیں۔ پاکستان اور جنوبی افریقہ کے درمیان پانچ میچوں کی سیریز کا تیسرا مقابلہ چھ نومبر کو ہو گا۔

کاکامی گاہارا: ایشین ہاکی چیمپئنز ٹرافی میں پاکستان نے فاتحانہ آغاز کر لیا ، کپتان محمد عمران کی ہیٹ ٹرک نے عمان کے خلاف آٹھ صفر کی فتح دلا دی۔جاپان کے شہر کاکامی گا ہارا میں ایشین ہاکی چیمپئز ٹرافی کا ایونٹ میں پاکستان نے افتتاحی میچ میں زبردست فتح سمیٹ کر روایتی حریف بھارت سمیت تمام ٹیموں کے خلاف خطرے کی گھنٹی بجادی۔عمان کے خلاف ایونٹ کے پہلے میچ میں گرین شرٹس نے جارحانہ کھیل پیش کیا ، آٹھ صفر کے نتیجے نے افتتاحی مقابلے کو یکطرفہ بنا دیا۔ کپتان محمد عمران نے گولز کی ہیٹ ٹرک کی،دلبر حسین اور سلمان حسین نے 2،2 جبکہ محمد توثیق نے ایک گول کیا، فاتح ٹیم کا تین نومبر کو چین سے جوڑ پڑے گا۔روایتی حریف پاکستان اور بھارت کے درمیان مقابلہ سات نومبر کو شیڈول ہے، ایشین ہاکی چیمپئنز ٹرافی کا فیصلہ کن معرکہ دس نومبر کو ہو گا۔