حیدرآباد: حیدرآباد یونین آف جرنلسٹ کی ایگزیکٹیو کونسل کا اجلاس صدر جنید خانزادہ کی زیرصدارت منعقد ہوا ،جس میں سیکرٹری جاوید نثار چنہ، نائب صدر عبداﷲ سروہی، جوائنٹ سیکرٹریز عبدالکریم شیخ، اشوک شرما، خازن ناصر شیخ اور دیگر اراکین مجلس عاملہ نے شرکت کی۔ اجلاس میں فیڈرل یونین آف جرنلسٹ کے صدر رانا محمد عظیم اور سیکرٹری امین یوسف سمیت دیگر نومنتخب عہدیداران کو مبارکباد پیش کی گئی اور پی ایف یو جے کے انتخابات کے موقع پر ہنگامہ آرائی کرنے کی شدید مذمت کی گئی ،اجلاس میں ایچ یو جے کی ممبر شپ کا دائرہ وسیع کرنے کا فیصلہ کیا گیا اور محمد حسین خان کی نگرانی میں ایک اسکروٹنی کمیٹی بھی تشکیل دی گئی جو آنے والے ممبر شپ فارم کی اسکروٹنی کرے گی اور پی ایف یو جے کے آئین کے مطابق ممبر شپ کو یقینی بنائے گی، اجلاس میں سیکرٹری جنرل جاوید نثار چنہ کی سربراہی میں ایک آئینی کمیٹی بھی تشکیل دی گئی، اجلاس میں ایچ یو جے کا حیدرآباد میں دفتر قائم کرنے اور ویب سائیڈ بنانے کا بھی فیصلہ کیا گیا، اجلاس میں صحافی عمران پاٹولی کے والد آفتاب رند کی والدہ اور فوٹوگرافر فرحان خان کے بھائی کے انتقال پر تعزیت کا اظہار کرتے ہوئے دعائے مغفرت کی گئی اور کیمرہ مین عامر زیدی کی جلد صحت یابی کے لیے دعائے بھی کی گئی جو ایک ٹریفک حادثے میں شدید زخمی ہو گئے تھے۔

کراچی: چائنا ریلوے کنسٹرکشن کارپوریشن انٹر نیشنل کے ایشیا ڈویژن کے جنرل منیجر وانگ ڈانگ نے وزیر اعلیٰ سندھ قائم علی شاہ سے ملاقات کی اور سندھ میں تعمیراتی کاموں سرمایہ کاری کی پیش کش کی جس کا وزیر اعلیٰ نے خیر مقدم کیا ۔ وزیراعلیٰ سندھ نے انھیں بتایا کہ حکومت سندھ اس وقت تھر پار کر میں کوئلے کی کانوں سے بجلی پیدا کر نے کے لیے مختلف کمپنیوں سے معاہدات کر رکھے ہیں جن پر عملدآمد کے لیے وہاں ہمیں سڑکیں اور ائر پورٹ جیسی سہولیات فراہم کرنی ہیں ، اسی طرح کراچی میں بڑے پیمانے پر ماس ٹرانزٹ سسٹم کے لیے سرمایہ کاری ہو گی ، انھوں نے وانگ ڈانگ سے کہا کہ ان دونوں شعبوں کے علاوہ کوئلے اور ہوا سے بجلی پیدا کر نے کے منصوبو ںمیںبھی سر مایہ کاری کے وسیع مواقع موجود ہیں، انھوں نے مزید کہا کہ رواں سال دسمبر میں چین کی تین بڑی سرمایہ دار کمپنیاں صوبہ سندھ کا دورہ کر رہی ہیں جن کے ساتھ ہمارے معاہدے ہونگے ، اس موقع پر وانگ ڈانگ نے کہا کہ وہ دو سوتین ہفتوں میں سروے کرکے اپنی سرمایہ کاری کے متعلق ترجیحات کے بارے میں حکومت سندھ کو آگاہ کریں گے ، جس پر وزیر اعلیٰ سندھ نے سیکرٹری انرجی اور اس کی ٹیم کو ان کی کمپنی کے ساتھ تفصیلی بات چیت کر نے اور سہولیات فراہم کرنے کے احکامات دیے ۔

اسلام آؓباد: اسلام آباد ہائی کورٹ نے سابق چیئرمین پی سی بی نجم سیٹھی کو توہین عدالت کی درخواست پر نوٹس جاری کرتے ہوئے دو ہفتوں میں جواب طلب کر لیا۔جسٹس شوکت عزیز صدیقی نے احمد نواز خان کی جانب سے نجم سیٹھی کے خلاف دائر توہین عدالت کی درخواست کی سماعت کی۔ جس میں موقف اختیار کیا گیا کہ نجم سیٹھی عدالتی فیصلے کے باوجود بطور چیئرمین پاکستان کرکٹ بورڈ کام کر رہے ہیں اور انہوں نے سوشل میڈیا پر چیئرمین پی سی بی کے طور پر کام جاری رکھنے کا اعلان بھی کیا ہے۔جسٹس شوکت عزیز صدیقی نے ریمارکس دیئے کہ عدالتی فیصلے پر عمل نہ کرنا توہین کے زمرے میں آتا ہے۔کسی کو عدالتی فیصلے کی تضحیک کرنے کی اجازت نہیں دیں گے۔عدالت نے نجم سیٹھی کو نوٹس جاری کرتے ہوئے دو ہفتوں میں جواب طلب کر لیا۔جسٹس شوکت عزیز صدیقی کا کہنا تھا کہ سیکرٹری پی سی بی بتائیں کہ الیکشن کیلئے جسٹس ریٹائرڈ منیر اے شیخ سے رابطہ کیا یا نہیں۔

اسلام آؓباد: اسلام آباد ہائی کورٹ نے کہا ہے کہ نجم سیٹھی کو حکم امتناعی جاری نہیںکیا گیا جبکہ پاکستان کرکٹ بورڈ کے معاملات گورننگ باڈی کو منتقل کر دیئے گئے تھے۔اسلام آباد ہائیکورٹ کے دو رکنی بینچ کے 3 صفحات پر مشتمل حکم نامے میں نجم سیٹھی کی جانب سے فیصلے کے خلاف انٹرا کورٹ اپیل پر حکم امتناعی کا ذکر نہیں کیا گیا۔ نجم سیٹھی کو ہٹانے کے حکم کے بعد پاکستان کرکٹ بورڈ سے ایڈہاک ختم ہوگیا اور تمام اختیارات بورڈ کی گورننگ باڈی کو منتقل ہو گئے۔ آرٹیکل 41 کے تحت گورننگ بورڈ کے اختیار بحال ہو گئے ہیں۔ اس حوالے سے گورننگ بورڈ کے ارکان نے مشاورت بھی شروع کر دی ہے اور بہت جلد گورننگ بورڈ کے اہم اجلاس کا بھی امکان ہے۔ اب گورننگ بورڈ ہی الیکشن اور دیگر معاملات کے حوالے سے کوئی بھی فیصلہ کرنے کا اختیار رکھتا ہے۔

پیرس: فرانس میں فٹبال کلبوں پر بھی 75 فیصد ٹیکس عائد کر دیا گیا۔فرانس میں زیادہ کمانے والوں سے 75فیصد ٹیکس کی وصولی کی فہرست میں فٹبال کلبوں کو بھی شامل کر لیا گیا۔فرانسیسی صدرکا کہنا تھا کہ ایک ملین یورو سے زائد کمانے والی ساری کمپنیاں ٹیکس جمع کرانے کی پابند ہیں۔ جن کلبوں نے اس فیصلے کے خلاف احتجاج کیا یہ قانون ان پر بھی لاگو ہوتا ہے۔ اس سے قبل ٹیکس کی ادائیگی پر نیشنز پرفیشنل کلبز یونین نے احتجاج کیا تھا۔ اور نومبر دسمبر میں ہونے والے سارے میچز میں شرکت نہ کرنے کا اعلان بھی کیا تھا۔