لاہور(پی پی آئی)جناح ہاوس اور عسکری ٹاور حملہ کیس میں خدیجہ شاہ سمیت 6ملزمان کی ضمانتیں منظور کرلی گئیں۔پی پی آئی کے مطابق لاہور ہائیکورٹ میں خدیجہ شاہ  اور دیگر نے جناح ہاوس جلاو گھیراو اور عسکری ٹاور کے مقدمے میں ضمانتیں دائر کیں تھی،لاہور ہائیکورٹ نے خدیجہ شاہ سمیت 6ملزمان کی ضمانتیں منظور کرلیں،جسٹس عالیہ نیلم کی سربراہی میں 2رکنی بنچ نے محفوظ فیصلہ سنایا۔

 روم(پی پی آئی) سابق شاہ افغانستان غازی شاہ امان اللہ خان اور ملکہ ثریا کی صاحبزادی شہزادی ہندیہ اٹلی کے دارالحکومت روم میں 94 سال کی عمر میں وفات پا گئیں۔پشتونخوا ملی عوامی پارٹی نے شہزادی ہندیہ کی وفات پر انہیں خراج عقیدت پیش کرتے ہوئے مرحومہ کو جنت الفردوس میں جگہ دینے اور لواحقین و پسماندگان کو صبر جمیل عطا کرنے کی دعا کی ہے۔ پی پی آئی کے مطابق بیان میں کہا گیا ہے کہ پشتونخوا میپ افغان استقلال کے ہیرو اور افغانستان کے ہردلعزیز بادشاہ فخرافغان غازی امان اللہ خان کی صاحبزادی مرحومہ شہزادی ہندیہ کی رحلت کو بڑا صدمہ اور انکی کمی کو بڑی خلائسمجھتی ہے۔فخر افغان غازی امان اللہ خان جنکا خان شہید عبدالصمدخان اچکزئی نے اپنے لڑکپن میں انکے یورپ جانے پر چمن ریلوے سٹیشن پر استقبال کیا تھا اور خان شہید نے بعد میں اپنے دورہ افغانستان کے د وران انکے خاندان سے ملاقاتیں کی تھیں۔

کوئٹہ (پی پی آئی) پاکستان کے سب سے بڑے صوبے بلوچستان میں اس مرتبہ الیکشن کی تاریخ قریب آنے  کے باوجود پہلے کی طرح سیاسی سرگرمیاں اور گہما گہمی دکھائی نہیں دے رہی۔صوبے میں متحرک سیاسی قوم پرست اور مذہبی جماعتیں مختلف مسائل پر احتجاج، مظاہرے اور ریلیوں کا انعقاد تو کر رہی ہیں لیکن کسی جماعت نے ہنوز انتخابی مہم کا باقاعدہ آغاز  نہیں کیا اور نہ ہی حالیہ دنوں میں کوئی بڑا جلسہ ہوا۔نیشنل پارٹی کے سربراہ اور سابق وزیراعلٰی بلوچستان ڈاکٹر عبدالمالک بلوچ یہ بات تسلیم کرتے ہیں کہ ’پہلے کی طرح سیاسی سرگرمیاں اور گہما گہمی نظر نہیں آرہی۔‘تاہم ان کا کہنا ہے کہ ’ان کی جماعت نیشنل پارٹی روزانہ کی بنیاد پر سرگرمیاں کر رہی ہے اور عوام کو متحرک کر رہی ہے۔پی پی آئی کے مطابق سیاسی گہما گہمی میں کمی کی وجہ الیکشن کمیشن کی جانب سے الیکشن کے لیے واضح تاریخ اور شیڈول کا اعلان نہ ہونا  بھی ہے۔ ’انتخابات کا جنوری میں انعقاد بھی یقینی نہیں ہے، اس لیے سیاسی جماعتیں قبل از وقت اپنی توانائیاں اور وسائل خرچ کرنے میں احتیاط کا مظاہرہ کر رہی ہیں۔

لاہور(پی پی آئی)محکمہ خزانہ پنجاب نے افسروں کے ٹریولنگ اور ڈیلی الاونس میں اضافے کا نوٹیفکیشن جاری کردیا۔  نوٹیفکیشن کے مطابق گریڈ 22کا ڈیلی الاونس اسپیشل 4800سے بڑھاکر 7200کردیا گیا،گریڈ 21کے ڈیلی الاونس اسپیشل میں 2ہزار روپے اضافہ ہواجس کے بعد افسروں کاا سیپشل ڈیلی الاؤنس  چار ہزار سے بڑھا کر چھ ہزار کر دیا گیاجبکہ گریڈ19اور 20کا ڈیلی الاونس 3280سے بڑھ کر 4920روپے ہو گیا۔گاڑی پر ٹی اے 5روپے فی کلومیٹر سے بڑھاکر 7روپے فی کلومیٹرکردیا۔نوٹیفکیشن کیمطابق گریڈ 17 اور 18 کے افسروں کا ڈیلی الاؤنس ا سپیشل 2560 سے بڑھا کر 3840 روپے کر دیا گیا،گریڈ 12 سے 16 کا ڈیلی الاؤنس ا سپیشل 1440 سے بڑھا کر 2160 کر دیا گیاہے۔