رنگون: اسلام آباد ہائی کورٹ نے پی سی بی کے سابق چیئرمین ذکاءاشرف اور موجودہ عبور ی چیئرمین نجم سیٹھی کی انٹراکورٹ اپیل پر فیصلہ محفوظ کرلیا۔اسلام آباد ہائی کورٹ کے جسٹس ریاض احمد خان اور جسٹس نورالحق قریشی پر مشتمل ڈویڑنل بنچ نے چیئرمین پی سی بی کی برطرفی سے متعلق انٹرا کورٹ اپیلوں کی سماعت کی ،دوران سماعت وزارت بین الصوبائی رابطے کی وکیل عاصمہ جہانگیر نے دلائل دیتے ہوئے کہا کہ پانچ رکنی عبوری منیجمنٹ کمیٹی90 روز کیلئے بنائی گئی ،حکومت اس معاملے کے حل میں سنجیدہ ہے ،پی سی بی کو ہائی جیک کرنے کا کوئی ارادہ نہیں،کرکٹ کے کھیل کو شائقین کی بڑی تعداد پسند کرتی ہے اورسفارتی تعلقات کیلئے بھی اہم ہے،حکومت اس کی بہتری کیلئے اقدامات کر رہی ہے،عدالت کا جو فیصلہ ہوگا قبول کریں گے۔سابق چیئرمین پی سی بی ذکاءاشرف کے وکیل نے کہا کہ حکومت کی جانب سے پیش کئے جانے والے دونوں ایس آر اوز میں تضاد ہے ،عدالت کو گمراہ کرنے کی کوشش کی جا رہی ہے ،نئی حکومت اپنا چیئرمین لے کر آنا چاہتی ہے،ایس آر اوز ہمارے لئے سرپرائزہیں ،عدالت میں پی سی بی کے وکیل تفضل رضوی نے کہا کہ18 اکتوبر کے عدالتی فیصلے کے بعد خلاءپیدا ہوا،پی سی بی اپنے آئین کے تحت فیصلہ کرنے میں آزاد ہے ،فیصلوں کی منظوری بورڈ آف گورنرز دیتا ہے،عدالت نے وکلا کے دلائل دینے کے بعد فیصلہ محفوظ کر لیا ہے۔

کولکتہ: بھارتی کرکٹ ٹیم کے سابق کپتان سارو گنگولی نے ملکی سیاست میں داخل ہونے سے انکار کردیا ۔سماجی رابطے کی ایک ویب سائٹ میں دیے گئے پیغام میں گنگولی نے کہا کہ سیاسی جماعت بھارتی جنتا پارٹی نے انہیں 2014میں ہونے والے انتخابات میں ٹکٹ کی آفر کی تھی لیکن انہوں نے انتخابات میں حصہ نہ لینے کا فیصلہ کیا ہے کیوں کہ وہ سمجھتے ہیں کہ ان کا اصل مقام کرکٹ کے میدان ہیں ۔

اسلام آباد: چیئرمین پاکستان کرکٹ بورڈ نجم سیٹھی کیخلاف اسلام آباد ہائیکورٹ میں توہین عدالت کی درخواست دائر کر دی گئی۔ ملتان کرکٹ ایسوسی ایشن کے صدر احمد نواز نے عبدالرزاق رجب ایڈووکیٹ کے ذریعے اسلام آباد ہائیکورٹ میں دائر درخواست میں موقف اختیار کیا ہے کہ اسلام آباد ہائی کورٹ کے سنگل بنچ نے نجم سیٹھی کو کام کرنے سے روک دیا تھا اور ڈویڑن بنچ نے انھیں بحال نہیں کیا۔ اس کے باوجود نجم سیٹھی پی سی بی کے عبوری چیئرمین بنے ہوئے ہیں اور عبوری کمیٹی اجلاس کی صدارت کرتے ہیں جو توہین عدالت کے زمرے میں آتا ہے اس لئے نجم سیٹھی کے خلاف توہین عدالت کی کارروائی کی جائے۔

لسبن: شہرہ آفاق فٹ بالرکرسٹیانو رونالڈو کی پذیرائی کیلئے پرتگال میں میوزیم بنادیا گیا ، جس کا افتتاح خود اسٹار فٹ بالر نے کیا۔ کرسٹیانو رونالڈو فٹ بال کا وہ شاہکار جو لاکھوں کا ہیرو ہے، میدان میں ہو تو حریفوں کا ہدف ہوتا ہے، باہر ہو تو نگاہوں کا مرکز۔ میوزیم میں جہاں اسٹار فٹ بالر کے اعزازات توجہ کا مرکز بنے ہوئے ہیں ساتھ ہی فٹ بال ہیرو کی قد آور تصاویر بھی دیکھنے سے تعلق رکھتی ہیں، لیکن نظر جہاں ٹھہرتی ہے، وہ ہے رونالڈو کا مجسمہ، پرتگالی اسٹار اس مجسمے کے برابر میں کھڑے ہوئے تو اصل اور نقل کی پہچان کرنا مشکل ہوگیا۔ رونالڈو پرامید ہیں کہ مزید ٹائٹلز اس میوزیم کی زینت بنیں گے۔