لاہور: پاکستان ہاکی فیڈریشن کی نئی مینجمنٹ تاحال فنڈز کے حصول میں ناکام رہی ہے،فیڈریشن کے حکام کاکہنا ہے کہ حکومت کی جانب سے فنڈز نہ ملنے کی صورت میں قومی ٹیم اذلان شاہ کپ میں نہیں بھیجیں گے۔ تاریخ کا یہ پہلا موقع ہے کہ قومی ہاکی ٹیم کی اذلان شاہ کپ میں شرکت پر سوالیہ نشان لگ رہے ہیں،، ٹورنامنٹ کا13 مارچ سے ملائیشیا میں آغاز ہونا ہے اور ابھی تک تیاری کیلئے کھلاڑیوں کا تربیتی کیمپ تک شروع نہیں ہوا۔ پی ایچ ایف کے پیٹرن انچیف وزیراعظم نواز شریف ہیں اور ان کے اقتدار میں آنے سے اب تک فیڈریشن کو ایک روپیہ تک نہیں مل سکا۔ سابق اولمپئنز کے مطابق حکومت قومی کھیل کو سنجیدگی سے نہیں لے رہی۔ قومی ہاکی ٹیم نے نومبر2013 میں آخری بین الاقوامی ایونٹ کھیلا تھا اور اگر اذلان شاہ کپ میں حصہ نہیں لیتی تو پھر اولمپکس 2016 کے کوالیفائنگ راونڈ ایشین گیمز میں دس ماہ بعد ان ایکشن دکھائی دے گی۔

اسلام آباد: نوجوانوں میں صحت مندانہ سرگرمیوں کے فروغ کیلئے وفاقی دارالحکومت میں تین روزہ فٹ بال ٹورنامنٹ کا آغاز ہو گیا،ٹورنامنٹ کے پہلے میچ میں نادرن ایگلز نے کامیابی سمیٹ لی۔ اسلام آباد سپورٹس کمپلیکس میں نجی سکول کی جانب سے جاری تین روزہ انٹر ریجنل فٹبال ٹورنامنٹ کے پہلے روزہ کھیل میں ناردرن ایگلز اورساوتھرن ڈولفنز کی ٹیموں کے درمیان کانٹے دارمقابلہ ہوا۔اس موقع پرنیشنل ریفری محمد ابراہیم خان کا کہنا تھا کہ یہ ایک صحت مندانہ سرگرمی ہے اوراس طرح کے کھیلوں کے انعقاد سے اچھے کھلاڑی سامنے آتے ہیں۔نادرن ایگلزنے ساﺅتھرن ڈولفنز کو دو کے مقابلے میں چار گولز سے شکست دے کرٹورنامنٹ کے اگلے مرحلے کے لیے کوالیفائی کر لیا۔

اسلام آباد: پاکستان سکی ٹیم کا دستہ جنوبی کوریا کے صوبے گینگون میں ہونے والے ڈریم ٹریننگ پروگرام 2014میں سنسنی خیز مقابلے کے بعد سونے اور کانسی کے تمغے جیتنے کے بعد وطن واپس پہنچ گیا ۔قومی دستے میں شامل ضیا ءالرحمٰن نے سونے جبکہ محمد امتیاز نے کانسی کا تمغہ جیتا ۔پاکستان سکی فیڈریشن کے صدر ائیر مارشل اطہر حسین بخاری نے پاکستانی دستے سے ملاقات کی اور کھلاڑیوں کو میڈلز جیتنے پر مبارکباد پیش کی ۔اطہر حسین نے امید ظاہر کی ڈریم ٹریننگ پروگرام سے قومی ٹیم کو انٹرنیشنل مقابلوں میں بھرپور فائدہ ہوگا ۔

ابو ظہبی: انٹرنیشنل پریمیئر ٹینس لیگ کے لئے پلیئرز کے ڈرافٹ کی تقریب 2مارچ کو متحدہ عرب امارات میں ہوگی ۔ آئی پی ٹی ایل کے شریک بانی مہیش بھوپتی نے کہا ہے کہ انہیں ابتدائی طور پر پانچ ٹیموں کی ملکیت کا اعلان کرنے پر انتہائی خوشی ہورہی ہے ۔ اعلان کردہ ٹیموں میں ممبئی ،بنکاک ،سنگاپوراور کوالالمپور کی ٹیمیں شامل ہیں جبکہ ایک مزید ٹیم کا انتخاب مڈل ایسٹ سے کیا جائے گا ۔ٹینس لیگ کو گزشتہ برس مئی میں متعارف کرایا گیا تھا جس میں دنیائے ٹینس کے نامور کھلاڑی حصہ لیں گے ۔

کراچی: پاکستان کے ٹاپ اسکواش پلیئر ناصر اقبال امریکا میںجاری اٹلانٹا اوپن اسکواش چیمپئن شپ کے فائنل میں شکست کے بعد ٹائٹل جیتنے سے محروم ہوگئے ۔ میچ کے ابتداءمیں ناصر اقبال کی کارکردگی بہت عمدہ رہی اور انہوں نے پہلا راﺅنڈ جیت لیا ،تاہم ان کے حریف سیزر نے مسلسل تین راﺅنڈز جیت کرنہ صرف فتح حاصل کی بلکہ ٹرافی بھی اپنے نام کرلی ۔

لاہور: قومی کرکٹ ٹیم کے کھلاڑیوں کے نئے سینٹرل کنٹریکٹ کے اجراءمیں مزید تاخیر کا امکان پیدا ہوگیا ۔ ذرائع کے مطابق نئے معاہدے کو رواں ماہ کے دوران مکمل ہوجانا تھا لیکن چیئرمین پی سی بی ذکاءاشرف کی جانب سے سلیکٹرز کو اس معاملے پر کوئی واضح ہدایت نہ ملنے اور سپریم کورٹ میں ذکاءاشرف کی بحالی کے خلاف اپیل اور سماعت پر معاملہ کھٹائی میں پڑ گیا ہے ۔