راولپنڈی(پی پی آئی) لاہور ہائی کورٹ راولپنڈی بینچ نے سابق وزیرداخلہ و سربراہ عوامی مسلم لیگ شیخ رشید کی بازیابی کے لیے آر پی او راولپنڈی کو آخری بار مزید ایک ہفتے کی مہلت دے دی۔لاہور ہائیکورٹ راولپنڈی بنچ میں سابق وزیر داخلہ شیخ رشید کی حراست کے خلاف دائر درخواست پر سماعت ہوئی، آر پی او راولپنڈی سید خرم علی اور سی پی او راولپنڈی خالد ہمدانی عدالت میں پیش ہوئے۔عدالت نے استفسار کیا کہ آر پی او صاحب بتائیں کہ شیخ رشید سے متعلق کیا پیش رفت ہے؟۔ آر پی او نے عدالت کو بتایا کہ جن پولیس افسران پر گرفتاری کا الزام ہے سی ڈی آرز کے مطابق وہ پانچوں اس علاقے میں موجود نہیں تھے۔آر پی او نے عدالت سے درخواست کی کہ تھوڑی سی مہلت اور چاہیے، جس پر عدالت نے کہا کہ ایک ہفتے کی مزید مہلت آخری موقع سمجھ کر دے رہے ہیں، ایک ہفتے کے بعد مزید التوائنہیں دینگے،۔ دوران سماعت شیخ رشید کے وکیل سردار عبدالرازق نے کہا کہ شیخ رشید کو گرفتار ہوئے ایک مہینہ ہوگیا کوئی کچھ نہیں بتارہا، شیخ رشید کی بازیابی، آر پی او کے بس کی بات نہیں، عدالت آئی جی پنجاب اور سیکرٹری ڈیفنس کو بلائے۔ ، عدالت نے  سماعت 27 اکتوبر تک ملتوی کردی۔

اسلام آباد (پی پی آئی) احتساب عدالت اسلام آباد نے توشہ خانہ کیس میں سابق وزیراعظم نواز شریف کے وارنٹ گرفتاری معطل کر دیئے۔ احتساب عدالت کے جج محمد بشیر نے قائد مسلم لیگ ن نواز شریف کی توشہ خانہ کیس میں وارنٹ معطلی کی درخواست پر سماعت کی، نواز شریف کے وکیل قاضی مصباح اور نیب پراسیکیوٹر عدالت کے روبرو پیش ہوئے۔پی پی آئی کے مطابق نوازشریف کے وکیل نے کہا کہ نواز شریف عدالت میں کیسز کا سامنا کرنا چاہتے ہیں، 21 اکتوبر کو پاکستان پہنچیں گے، عدالت سے استدعا ہے کہ 24 تاریخ تک وارنٹ معطل کئے جائیں۔جج محمد بشیر نے نوازشریف کے کیس کا ریکارڈ طلب کر لیا، جج نے وکیل صفائی سے مکالمہ کیا کہ آپ کو کافی کیسز ملتے ہیں، جس پر قاضی مصباح نے کہا کہ بس مؤکل کا اعتماد ہے ہم پر۔وکیل صفائی قاضی مصباح نے کہا کہ نوازشریف نے کیوں پاکستان چھوڑا؟ تمام دستاویزات میں تحریر کر دیا ہے، انڈرٹیکنگ شہباز شریف نے دی ہوئی ہے۔جج محمد بشیر نے استفسار کیا کہ آپ نے ہائی کورٹ میں بھی درخواست دی ہے، جس پر نوازشریف کے وکیل کا کہنا تھا کہ نہیں، اس کیس میں ہائی کورٹ سے رجوع نہیں کیا، توشہ خانہ کیس میں وارنٹ جاری ہوئے ہیں، فیصلہ نہیں ہوا تھا، اسحاق ڈار کے اسی نوعیت کے کیس میں وارنٹ معطل ہوئے تھے۔دوران سماعت نیب پراسیکیوٹر نے کہا کہ نوازشریف نے دو ریلیف مانگے ہیں، وہ کہہ رہے ہیں کہ عدالت کے سامنے سرنڈر کرنا چاہتے ہیں، نوازشریف کو سننا چاہتے ہیں تو وارنٹ معطل کر دیں۔عدالت نے وکیل صفائی اور نیب پراسیکیوٹر کے دلائل سننے کے بعد قائد مسلم لیگ ن کی وارنٹ معطلی کی درخواست پر فیصلہ محفوظ کر لیا۔بعد ازاں احتساب عدالت نے محفوظ فیصلہ سناتے ہوئے نوازشریف کے وارنٹ گرفتاری معطل کر دیئے اور کہا کہ اگر نواز شریف 24 اکتوبر کو پیش نہ ہوئے تو مزید کارروائی ہوگی۔

کراچی (پی پی آئی)پاکستان  اسٹاک مارکیٹ سٹاک ایکسچینج میں  مثبت رجحان دیکھنے میں آیا ہے۔پی پی آئی کے مطابق اسٹاک مارکیٹ میں 312 پوائنٹس اضافے کے ساتھ 100 انڈیکس 49 ہزار 744 پوائنٹس کی سطح پر ٹریڈ کر رہا ہے۔