کانپور: بھارت نے ویسٹ انڈیز کو تیسرے ون ڈے میں شکست دیکر تین میچوں کی سیریز دو ایک سے جیت لی ۔ سیریز کے تیسرے اور فیصلہ کن میچ میں میزبان ٹیم نے ٹاس جیت کر فیلڈنگ کا فیصلہ کیا۔ مہمان ویسٹ انڈینز کا آغاز اچھا نہ رہا۔ سیموئلز 71 اور کیرون پاول 70 رنز کے ساتھ ٹوٹل کو 263 رنز تک پہنچانے میں کامیاب ہوئے۔ بھارت کی جانب سے روی چندران ایشون نے 2 وکٹیں حاصل کیں۔ جواب میں میزبان ٹیم نے مقررہ ہدف چھیالیس اعشاریہ ایک اوور میں پانچ وکٹوں کے نقصان پر حاصل کر لیا۔ شیکھر دھون نے ذمہ دارانہ بیٹنگ کرتے ہوئے 119 رنز کی شاندار اننگز کھیلی۔ یو وراج سنگھ نے 55 رنز اسکور کر سکے۔

لاہور: قومی ٹیم کے آل راونڈر عبدالرزاق کے ستارے گردش میں آ گئے۔ دبئی میں مختصر فارمیٹ میں آوٹ آف فارم کھلاڑی کو گھر آنے کے چند دن بعد بدقسمتی نے گھر میں چوری کا سامنا بھی کروا دیا۔ قومی آل راونڈر عبدالرزاق کی ٹی ٹوئنٹی ٹیم میں ایک سال کے بعد واپسی ہوئی بہت ساری امیدیں لے کر دبئی کے میدان میں اترے لیکن وہ پہلے میچ میں دس رنز سے زیادہ سکور نہ کر سکے۔ سیریز کے دوسرے میچ میں بھی قسمت نے ساتھ نہ دیا اور انہیں بغیر کھاتہ کھولے ہی پویلین لوٹنا پڑا۔ عبدالرزاق دبئی سے مایوس گھر پہنچے تو چند دن بعد ہی بدقسمتی نے انہیں دوبارہ آن لیا۔ لاہور کے پوش علاقے ڈیفنس میں عبد الرزاق کے گھر چور لاکھوں روپے کی مالیت کے زیورات اور کرنسی لے اڑے۔ قومی کرکٹر کے مطابق چور گھر میں واش روم کی کھڑکی سے داخل ہوئے اور لاکر اٹھا کر لے گئے۔ قومی کرکٹر عبدالرزاق کا کہنا ہے کہ لاکر میں پاسپورٹ، کاغذات اور لاکھوں مالیت کے زیوارت موجود تھے۔ صبح ہوتے ہی پولیس بھی موقع وردات پر پہنچی اور گھر کا جائزہ لیا۔ قومی کرکٹر عبدالرزاق کا کہنا ہے ڈیفنس جیسے علاقے میں چوری ہونا قابل افسوس بات ہے۔

کراچی: عالمی امیچیور اسنوکر چیمپئن شپ میں شرکت کے لیے پاکستانی 4 رکنی اسنوکر ٹیم لٹویا روانہ ہو گئی، اٹھائیس نومبر سے شروع ہونیوالی عالمی چیمپئن شپ میں محمد آصف اعزاز کا دفاع کریں گے۔پاکستانی اسنوکر ٹیم کوعالمی امیچیور اسنوکر چیمپئن شپ میں شرکت کے لئے کافی تگ ودو کے بعد ویزے ملے۔ ٹیم کے دیگر کھلاڑیوں میں محمد سجاد، عمران شہزاد اور شاہد آفتاب شامل ہیں۔ کراچی ایئر پورٹ پر میڈیا سے گفتگو کرتے ہوئے محمد آصف کا کہنا تھا کہ اس مرتبہ بھی پاکستان کا نام روشن کریں گے اور جیت کر وطن واپس لوٹیں گے۔

سڈنی: لیجنڈری آسٹریلوی کرکٹر شین وارن کی آسٹریلیا سے انگلینڈ منتقلی کی افواہوں نے زور پکڑ لیا ۔لیجنڈری آسٹریلوی کرکٹر شین وارن نے میلبورن میں اپنی رہائش گاہ پندرہ ملین آسٹریلوی ڈالرز میں فروخت کردی ہے، جس کے بعد ان کے انگلینڈ میں رہائش اختیار کرنے کی اطلاعات زور و شور سے گرم ہیں۔سابق کرکٹر شین وارن کے قریبی ذرائع کے مطابق اس فیصلے کی وجہ ممتاز برطانوی اداکارہ ایلزبتھ ہرلے سے تعلقات کی تجدید ہوسکتی ہے۔

لاہور: ٹینس اسٹار اعصام الحق کا کہنا ہے کہ فی الحال دوسری شادی کا ارادہ نہیں ہے۔ ورلڈ نمبر ون بننے تک ٹینس نہیں چھوڑوں گا۔باغ جناح لاہور کے ٹینس کورٹ میں ایک ٹورنامنٹ کے موقع پر میڈیا سے بات چیت کرتے ہوئے اعصام الحق نے کہا کہ وہ دوسری شادی ضرور کریں گے لیکن ابھی ان کی تمام تر توجہ ٹینس پر ہے،وہ نمبر ون کا ٹائٹل جیتنے تک کھیل کو خیر باد نہیں کہیں گے جبکہ سابق کوچ رشید ملک کہتے ہیں کہ ٹینس کو مکمل تباہی سے بچانے اور نئے ٹیلنٹ کو سامنے لانے کے لئے گراس روٹ پر ایونٹس کے انعقاد کرناچاہیے۔ٹورنامنٹ میں مینز سنگل فیضان خرم،گرلز انڈر18ردا خالد،بوائز انڈر14حافظ عبدالعلی اور انڈر12 حمزہ بن ریحان فاتح رہے۔