کوئنز ٹاﺅن: نیوزی لینڈ کے مایہ ناز آل راﺅنڈر جیسی رائیڈر نے ویسٹ انڈیز کے خلاف اپنے ون ڈے کیریئر کی تیسری سنچری سکور کی۔ جیسی رائیڈر نے بدھ کو ویسٹ انڈیز کے خلاف تیسرے ون ڈے کرکٹ میچ میں انتہائی شاندار بلے بازی کرتے ہوئے 104 رنز بنائے۔ انہوں نے کورے اینڈرسن کے ساتھ ملکر چوتھی وکٹ میں 191 رنز کی شراکت داری قائم کی۔ انہوں نے اس دوران 51 گیندوں کا سامنا کیا اور 5 چھکوں اور 12 چوکوں کی مدد سے انفرادی 104 رنز بنائے۔ انکو 104 کے انفرادی سکور پر ہولڈر نے ملر کے ہاتھوں کیچ آﺅٹ کیا۔ جیسی رائیڈر اور کورے اینڈرس کی سنچری کو بدولت نیوزی لینڈ نے ویسٹ انڈیز کو میچ میں 159 سے شکست دی۔

کراچی: پاکستان کرکٹ ٹیم کے سابق کپتان شاہد آفریدی نے تیز ترین سنچری کا ریکارڈ ٹوٹنے پر حیرانگی کا اظہار کردیا، انھوں نے کہا خواہش تھی کہ ریکارڈ ان کی ریٹائرمنٹ تک برقرار رہتا۔خصوصی بات چیت کرتے ہوئے شاہد آفریدی نے کہا کہ صبح وہ سو رہے تھے جب ان کی تیز ترین سنچری کا ریکارڈ ٹوٹنے کے بارے میں بھانجے سے خبر ملی، جسے سن کر وہ کافی حیران ہوئے۔انہوں نے کہا کہ کرس گیل اور ڈیوڈ وارنر سے ریکارڈ ٹوٹنے کا خطرہ تھا، سوچا بھی نہیں تھا کہ نیوزی لینڈ کا کوئی کھلاڑی ان کا ریکارڈ توڑ دے گا۔ کولن انڈریسن کے بارے میں کبھی نہیں سنا۔ان کا کہنا تھا کہ ریکارڈ تو بنتے ہیں، ٹوٹنے کے لئے ہیں لیکن ان کی خواہش تھی کہ تیز ترین سنچری کا ریکارڈ ان کی ریٹائرمنٹ تک قائم رہتا لیکن ایسا نہیں ہوا

کراچی: پاکستان کرکٹ ٹیم نے گیارہ سال بعد ٹیسٹ کرکٹ میں کسی بھی بائیں ہاتھ کے بیٹسمین کو شامل نہ کرکے منفرد ریکارڈ قائم کردیا۔پاکستان نے سری لنکا کے خلاف ابو ظہبی ٹیسٹ میں2002 کے بعد یہ منفرد ریکارڈ بنایا ہے، قومی ٹیم میں کوئی بھی بائیں ہاتھ کا بیٹسمین شامل نہیں ہے۔اس سے قبل دوہزار دو میں لاہور میں نیوزی لینڈ کے خلاف کھیلے جانے والے ٹیسٹ میں پاکستانی ٹیم میں کوئی بھی لیفٹ ہینڈڈ بیٹسمین موجود نہیں تھا۔اس ٹیسٹ کی خاص بات انضمام الحق کی ٹرپل سنچری تھی، جس نے پاکستان کو اننگز اور324رنز سے فتح دلائی تھی۔

لاہور: بھارت کے خلاف سیریز کے لیے پاکستان بلائنڈ کرکٹ ٹیم کے 24 ممکنہ کھلاڑیوں کے ناموں کا اعلان کر دیا گیا۔ پاکستان بلائنڈ کرکٹ کونسل کی جانب سے روایتی حریف ٹیم کے خلاف 24 رکنی اسکواڈ کا اعلان کیا گیا۔ پی بی سی کے مطابق بلائنڈ کرکٹ کی حتمی 15 رکنی ٹیم کا اعلان فروری کے پہلے ہفتے میں کیا جائے گا۔ بلائنڈ کرکٹ کونسل کے چیرمین سلطان شاہ کے مطابق بھارتی ٹیم آئندہ سال فروری میں پاکستان کا دورہ کرے گی۔ دونوں ٹیموں کے درمیان ہونیوالی کرکٹ سیریز میں تین ٹی 20 اور تین ہی ایک روزہ میچز کھیلیں جائیں گے۔

کراچی: پاکستان اولمپک ایسوسی ایشن کے صدرسید عارف حسن کا کہنا ہے کہ پی ایچ ایف نے باضابطہ رابطہ نہیں کیا ، اب بھی وقت ہے ایشین گیمز میں انٹری بھیجی جاسکتی ہے۔ کراچی میں خصوصی گفتگو کرتے ہوئے عارف حسن کا کہنا تھا کہ انٹرنیشنل اولمپک کمیٹی نے وفاقی حکومت پر واضح کردیا ہے کہ پاکستان اولمپک ایسوسی ایشن کے معاملا ت میں مداخلت کا انجام ٹھیک نہیں ہوگا۔ اورآئی او سی نے پاکستان اسپورٹس بورڈ کواپنا رویہ درست کرنے کے لیے اکتیس جنوری تک کا وقت دیا ہے۔ ایک سوال کے جواب میں عارف حسن نے بتایا کہ پاکستان ہاکی فیڈریشن نے ان سے کوئی باضابطہ رابطہ نہیں کیا۔ عارف حسن نے مزید بتایا کہ پاکستان میں کھیلوں کے فروغ کے لیے فیڈریشن کے باہمی اختلافات کا خاتمہ انتہائی ضروری ہے۔