اسلام آباد (پی پی آئی(غیرقانونی افغان باشندوں کو پاکستان میں متعدد جرائم کی بڑھتی شرح کی اہم وجہ قرار دے دیا گیا، خیبرپختونخواافغان پناہ گزینوں کی غیرقانونی سرگرمیوں سے سب سیزیادہ متاثرہے پی پی آئی کے مطابق خیبرپختونخوا میں مقیم غیرقانونی افغان شہریوں کو صوبے میں بڑھتے جرائم کی بڑی وجہ قرار دیتے ہوئے کہا کہ خیبرپختونخوا افغان پناہ گزینوں کی غیرقانونی سرگرمیوں سے سب سے زیادہ متاثر ہے۔ذرائع کا کہنا تھا کہ اس وقت خیبرپختونخوا میں 3 لاکھ 21 ہزار 677 غیر قانونی افغان باشندے رہائش پذیرہیں اور افغان باشندے اغوا برائے تاوان، منشیات فروشی، غیرقانونی اسلحہ، ٹریفک حادثات، انسانی اسمگلنگ اور دیگر جرائم میں ملوث ہیں جبکہ بہت سے غیر قانونی افغان باشندے خیبرپختونخوا میں مختلف جرائم میں مطلوب ہیں۔ذرائع نے بتایا کہ مختلف جرائم میں مطلوب 3 ہزار 911 غیر قانونی افغان باشندوں کوگرفتارکیاجاچکا ہے،  2014 سے اب تک 287 افغان باشندے غیر قانونی سرگرمیوں پر گرفتار ہیں اور غیر قانونی سرگرمیوں پر 21 افغان باشندوں کو سزائے موت دی جاچکی ہے۔ذرائع کے مطابق خیبرپختونخوا کی جیلوں میں 432 غیر قانونی افغانوں کے مختلف مقدمات زیرسماعت ہیں، ان میں سے44 غیرقانونی افغان باشندوں پر جرم ثابت ہوچکا ہے۔

کراچی (پی پی آئی)عالمی منڈی میں خام تیل کی قیمت گزشتہ 2 ہفتوں کی کم ترین سطح پر آ گئی ہے۔ پی پی آئی کے مطابق  برینٹ آئل کے دسمبر کیلئے سودے 1.72 فیصد کمی کے ساتھ 91.8 ڈالر فی بیرل میں طے پائے۔اسی طرح ویسٹ ٹیکساس انٹرمیڈیٹ کے نومبر کے لیے سودے 0.85 فیصد کمی کے ساتھ 88.58 ڈالر فی بیرل میں طے پائے۔ خام تیل کی یہ قیمتیں 13 ستمبر کے بعد کم ترین سطح پر ہیں اس لئے خیال کیا جارہا ہے کہ  پاکستان میں تیل کی قیمتوں میں کمی کی جاسکتی ہے۔

لاہور(پی پی آئی)پنجاب میں ا?شوب چشم کے مریضوں کی تعداد میں اضافہ پر تعلیمی اداروں میں جمعرات سے اتوار تک چھٹیوں کا اعلان کردیا گیا ہے۔پی پی آئی کے مطابق  آنکھوں کے وائرس کے باعث نجی اور سرکاری سکولوں میں جمعرات اور ہفتہ کو عام تعطیل کااعلان  کردیا گیا،جمعہ کے روز عیدمیلادالنبیﷺکی چھٹی ہو گی،اتوار کی ہفتہ وار چھٹی کے بعد سوموار کو دوبارہ سکول کھلیں گے،سوموار کو صبح تمام سکولوں کے باہر بچوں کو داخلے کے وقت اساتذہ چیک کریں گے۔وزیراعلیٰ پنجاب محسن نقوی نے کہاکہ جن بچوں میں آشوب چشم کی شکایت ہوئی ان کو واپس گھروں کو بھیجا دیا جائے،چھٹیوں کا اطلاق پورے صوبے پر ہوگا۔

 اسلام آباد (پی پی آئی)سپریم کورٹ نے انکم ٹیکس کمشنر کو عدالت کا وقت ضائع کرنے پر 10ہزار روپے جرمانہ کردیا، عدالت نے کیس کے حکمنامے میں اہم آبزرویشنز بھی دیں۔پی پی آئی کے مطابق سپریم کورٹ میں انکم ٹیکس کمشنر کے ٹیکس  کی تشخیص کے اختیار سے متعلق نظرثانی کیس کی سماعت ہوئی، چیف جسٹس قاضی فائز عیسیٰ کی سربراہی میں 3رکنی بنچ نے سماعت کی، دوران سماعت ایڈیشنل کمشنر ان لینڈ ریونیو پشاور سہیل احمد عدالت میں پیش ہوئے۔وکیل نے کہاکہ کمشنر ان لینڈریونیو پشاور نے ٹیکس کی تشخیص کے اختیارات ڈپٹی کمشنر کو دیئے،چیف جسٹس پاکستان نے کہاکہ کمشنر ان لینڈ ریونیو پشاور نے اپنے تمام اختیارات ڈپٹی کمشنر کو کیسے منتقل کردیئے؟انکم ٹیکس آرڈیننس کے سیکشن 122کے تحت کمشنر اپنے اختیارات کسی کو دینے کا مجاز نہیں،اختیارات کی منتقلی کا گزٹ نوٹیفکیشن کہاں ہے؟وکیل ایف بی آر نے کہاکہ اختیارات منتقلی آرڈر ہوا تھا لیکن اس کو پبلش نہیں کیاگیا،چیف جسٹس قاضی فائز عیسیٰ نے کہاکہ ایف بی آر اپنے آرڈر چھپا کر کیوں رکھتا ہے؟ایف بی آر کیا آرڈر کی اشاعت اس لئے نہیں کرتا کہ مخصوص کیسز میں استعمال کر سکے؟یہ کیس عدالت کا وقت ضائع کرنے کی کلاسک مثال ہے،سپریم کورٹ نے 2022میں فیصلہ دیا کہ کمشنر صرف ٹیکس کا تعین کر سکتا ہے،سپریم کورٹ نے 2022میں فیصلہ دیا کہ کمشنر اختیارات منتقل نہیں کر سکتا،جب مقننہ قانون سازی کردے تو اس پر عمل کرنا لازم ہوتا ہے۔چیف جسٹس پاکستان نے کہاکہ عدالت اور ہم سب کا کام پارلیمنٹ کے بنائے قانون پر عمل کرنا ہے،سپریم کورٹ کے حکم نامے کی کاپی کمشنر ایف بی آر کو ارسال کی جائے، حکم نامہ ایف بی آر کے تمام ڈائریکٹرز اور حکام کو بھی ارسال کیا جائے۔