کراچی: پی سی بی کی جانب سے قومی ٹی ٹوئنٹی کرکٹ کپ کے موقع پر کھلاڑیوں کو انسداد بدعنوانی کے حوالے سے لیکچرز دیئے گئے۔ گزشتہ چار سال میں پاکستان کے چار معروف کھلاڑی بدعنوانی کی زد میں آکر اپنے کرکٹ کیریئر کا خاتمہ کر چکے ہیں،ان میں سلمان بٹ،محمد آصف اور محمد عامر اسپاٹ فکسنگ اسکینڈل میں دھر لئے گئے تھے جبکہ اسپنر دانش کنیریابھی کاونٹی کرکٹ میں اسپاٹ فکسنگ کے الزام کی زد میں آئے۔ آئندہ سال ورلڈ کپ کو مدنظر رکھتے ہوئے بورڈ نے فیصلہ کیا ہے کہ تجربہ کار اور نوآموز تمام کھلاڑیوں کو اینٹی کرپشن لیکچرز دیئے جائیں گے۔ قومی ٹی ٹوئنٹی کپ کے دوران سیالکوٹ اسٹالینز، کوئٹہ بیئرز، حیدرآباد ہاکس، کراچی ڈولفنز، راولپنڈی ریمز اور کراچی زیبراز کے کھلاڑیوں نے ان لیکچرز میں شرکت کی جن کی نگرانی پاکستان کرکٹ بورڈ کے سیکیورٹی منیجرمیجر (ر) اظہر عارف کررہے تھے۔ لیکچرز میں سہیل تنویر، سرفراز احمد، محمد سمیع، عبد الرحمٰن، انور علی، خرم منظور، خالد لطیف، بلاول بھٹی ،شرجیل خان سمیت تمام کھلاڑیوں نے شرکت کی۔ واضح رہے آل راونڈر شاہد خان آفریدی لیکچرز سے غیر حاضر رہے۔

کراچی:گیارہویں پاکستان پریمیئر فٹ بال لیگ میں مزید دو میچوں کے فیصلے ہو گئے ہیں۔جس میں مسلم ایف سی کیلئے محمد حنیف نے ہیٹرک بھی سکور کی۔ کراچی پورٹ ٹرسٹ اسٹیڈیم میں کھیلے گئے ایونٹ کے میچز میں میزبان کراچی پورٹ ٹرسٹ نے پاکستان انٹرنیشنل ایئرلائن کو دو گول جبکہ مسلم فٹ بال کلب نے بلوچ ایف سی کو تین، صفر سے ہرا دیا۔

سڈنی:آسٹریلین کرکٹ ٹیم کے کپتان مائیکل کلارک نے ایک روزہ بین الاقوامی کرکٹ سے ریٹائیرمنٹ لینے کی تجویز مسترد کردی ۔مائیکل کلارک ان دنوں انجری کے شکار ہیں ان کا کہنا تھا کہ ون ڈے کرکٹ سے فل حال ریٹائیرمنٹ کا کوئی ارادہ نہیں ہے، انھوں نے کہا کہ میں 17سال کی عمر میں کمر کی انجری کی شکایت سے گزر رہا ہوں لیکن کمر درد کی وجہ سے میں نے کوئی میچ مس نہیں کیا ،ان کا مزید کہنا تھا کہ ون ڈے انٹرنیشنل کرکٹ میں خود کو زیا دہ اچھا محسوس کرتا ہوں ۔

انچیون:17 ویں ایشین گیمز کے جمناسٹکس ایونٹ میں جاپان نے فیورٹ چین کو اپ سیٹ کرتے ہوئے گولڈ میڈل جیت لیا،جنوبی کوریا نے سلور جبکہ چین نے برانز میڈل پر اکتفا کیا ہے۔اتوار کو مقابلوں کے اختتام پر میڈلز ٹیبل پر میزبان جنوبی کوریا کی برتری قائم رہی، جس نے 12 سونے،10 چاندی اور9 کانسی کے تمغے جیتے ہیں، چین تیزی سے ان کا تعاقب جاری رکھے ہوئے، اس نے اب تک 12گولڈ،9 سلور اور11 برانز میڈلز اپنے قبضے میں کیے ہیں، جاپان مجموعی طور پر 26 تمغوں کے ساتھ تیسرے نمبر پر ہے، جس میں 7طلائی، 8 نقرئی اور11 کانسی کے میڈلز موجود ہیں،منگولیا نے چوتھے اور قازقستان پانچویں نمبروں پر ہیں۔