لاہور(پی پی آئی)مسلم لیگ ن نے اکیس اکتوبرکو ملک بھرکے کارکنوں کو مینار پاکستان میں پہنچنے کی کال دیدی۔نواز شریف نے ائیرپورٹ پرسینئیر قیادت کو آنے کی ہدایت کردی، قائد مسلم لیگ ن کی گرفتاری کی صورت میں مینار پاکستان پر استقبالی جلسہ احتجاج کی شکل اختیار کر جائے گا۔اکیس اکتوبرکو ملک بھر کے کارکنوں کو مینار پاکستان میں پہنچنے کی کال دی گئی۔نوازشریف حفاظتی ضمانت ملنے کی صورت میں خود عوامی استقبال سے خطاب کریں گے۔ فیصلہ کیا گیا ہیکہ نوازشریف ہیلی کاپٹر  کے ذریعے لاہور ایئرپورٹ سے مینار پاکستان پہنچیں گے،مینار پاکستان جلسے سے خطاب کے بعد داتا دربار پر حاضری دیں گے۔

 کراچی (پی پی آئی)پیپلزپارٹی کے رہنما منظور وسان  نے الیکشن کمیشن پہنچ کر الیکشن کمیشن کے ممبر سندھ نثاردرانی سے ملاقات کی۔ملاقات کے بعد منظور وسان  کا صحافیوں سے غیررسمی گفتگو کے دوران کہنا تھا کہ ایم کیو ایم کا واویلا بلا جواز ہے،سندھ میں اعلیٰ عہدیدار انہی میں سے ہیں،ایم کیو ایم کا وطیرہ ہے تھپڑ بھی مارتی ہے اورروتی بھی ہے، یہ واحد پارٹی ہے جو تمام سیاسی جماعتوں کیساتھ ہر دورمیں شریک اقتدار رہی ہے۔پی پی آئی کے مطابق  رہنما پیپلزپارٹی کا کہنا تھاکہ عام انتخابات جنوری کے آخری ہفتے میں ہو سکتے ہیں،عام انتخابات میں کسی سیاسی جماعت کو اکثریت حاصل نہیں ہوگی،پیپلز پارٹی کا پی ٹی آئی سے انتخابی اتحادہو سکتا ہے،،آج کل مجھے نیند نہیں آتی اس لیے سیاسی خواب نہیں دیکھے۔

کراچی (پی پی آئی)سندھ ہائیکورٹ نے مرتضیٰ بھٹو قتل کیس کے فریقین کو 3 دن میں کیس کی پیپر بک بنانے کا حکم دے دیا اور ریمارکس میں کہا کہ حکم پر عملدرآمد نہ کیا توسخت حکم نامہ جاری کریں گے۔سندھ ہائی کورٹ میں سابق وزیراعظم بینظیر بھٹو کے بھائی مرتضیٰ بھٹو کے قتل کے مقدمے میں ملوث ملزمان کی بریت کیخلاف اپیلوں کی سماعت ہوئی، جسٹس نعمت اللہ پھلپھوٹو نے کیس کی سماعت کی۔پی پی آئی کے مطابق عدالت نے سرکاری وکیل سے استفسار کیا کہ کیس کی پیپر بک بنانے کا کب حکم دیا گیا، جس پر وکیل نے بتایا کہ عدالت نے 2011 میں اپیلوں کی پیپر بک بنانے کا حکم دیا تھا۔عدالت نے برہمی کا اظہار کرتے ہوئے کہا کہ اتنے عرصے کے بعد بھی حکم پر تاحال عملدرآمد نہیں ہوا، عدالت نے فریقین کو 3 دن میں کیس کی پیپر بک بنانے کا حکم دیتے ہوئے ریمارکس دیئے کہ حکم پر عملدرآمد نہ کیا توسخت حکمنامہ جاری کریں گے۔سرکاری وکیل نے سندھ ہائیکورٹ کو بتایا کہ کیس میں 18 ملزمان نامزد تھے اور شاہد حیات سمیت کچھ انتقال کر چکے ہیں۔عدالت نے اپیلوں کی سماعت تین ہفتوں کیلئے ملتوی کر دی۔واضح رہے کہ میر مرتضیٰ بھٹو کے ملازم نورمحمد گوگا نے ملزمان کی بریت کیخلاف 2010 میں اپیل دائر کی تھی، جس میں مؤقف پیش گیا کیا کہ 20 ستمبر 1996 کو میر مرتضیٰ بھٹو اور ان کے ساتھیوں کو گھر کے قریب گولیوں کا نشانہ بنایا گیا تھا۔اپیل میں مؤقف پیش کیا گیا کہ واقعہ کے بعد سرکار اورمرتضیٰ بھٹو کے ملازم نور محمد کی مدعیت میں دو مقدمات درج کئے گئے تھے لیکن دسمبر 2009 میں ماتحت عدالت نے 20 پولیس افسران کو بری کر دیا تھا۔