حیدرآباد (پی پی آئی)مہنگی بجلی کیخلاف حیدرآباد چیمبر آف کامرس کی  اپیل پر پیر کو جزوی ہڑتال کی گئی،ہڑتال کے سبب شہر میں متعدد مقامات پر دکانیں بند رہیں، بعض تاجر تنظیموں نے ہڑتال سے لاتعلقی بھی ظاہر کی ہے۔پی پی آئی کے مطابق   برکی روڈ پرمہنگی بجلی کیخلاف اہل علاقہ سراپااحتجاج بن گئے،اہل علاقہ کی بڑی تعداد خواتین سمیت احتجاجی مظاہرے میں شریک،ہاتھوں میں بجلی کے بل تھامے مظاہرین کی نعرے بازی۔مظاہرین نے بجلی کے بلوں کو آگ لگا دی،مظاہرین کا کہنا تھا کہ بجلی کے بل غریبوں کو کھا گئے ریاست غریب دشمن بن چکی ہے،لوگ بجلی کا بل ادا کرنے کے لئے ذلیل ہو رہے ہیں۔ ایبٹ آباد  میں بجلی کے بلوں میں اضافہ کے خلاف تاجروں کا فوارہ چوک شاہراہ ریشم پر شدید احتجاج  کیا، احتجاج سے شاہراہ ریشم پر ٹریفک روانی بھی متاثر ہے۔

لودھراں (پی پی آئی)سیلاب زدگان پرایک اورآفت آن پڑی،بجلی کے اضافی بل پہاڑبن کرٹوٹ پڑے. دریائے ستلج میں سیلابی ریلے گھر،فصلیں اور کاروبار بہاکر لے گئے،رہی سہی کسر بجلی کے اضافی بلوں کے ذریعے بجلی گرا کرپوری کردی گئی،پی پی آئی کے مطابق    دریائے ستلج لودھراں میں سیلاب زدگان شہریوں نے دریامیں کھڑے ہوکراحتجاج کرتے ہوے وزیراعظم پاکستان سینوٹس لینے کی اپیل کر دی۔ سیلاب زدگان کا کہنا تھا کہ فصلیں گھر تباہ ہوگئے اورہزاروں روپے مالیت بجلی کے بلزنے مشکلات اوربڑھادی ہیں،گھرسے بے گھرہوچکے  ہیں،اب ہزاروں روپے  کے  بل کیسے ادا کریں، وزیراعظم اوروزیراعلیٰ  بل معاف کریں. سیلاب زدگان نے بجلی کے بل بھی سیلابی  ریلے میں بہادئیے۔

نئی دہلی/ اسلام آباد (پی پی آئی)بھارت کی جانب سے پاکستان میں پہلی بار خاتون ناظم الامور گیتا سری واستوا کو تعینات کیا گیا ہے۔ گیتا سری واستوا پاکستان اور ہندوستان کی برطانیہ سے آزادی کے بعد پہلی خاتون ناظم الامور ہیں جنہیں بھارتی ہائی کمیشن اسلام آباد میں تعینات کیا گیا ہے، پی پی آئی کے مطابق گیتا سری واستوا جلد اپنے عہدے کا چارج بھی سنبھال لیں گی۔ گیتا سری واستوا بھارتی ہائی کمیشن میں تعینات موجودہ ناظم الامور سریش کمار کی مدت ختم ہونے اور ان کے نئی دلی جانے کے بعد اپنے عہدے کا چارج لیں گی۔  یاد رہے کہ پاکستان اور بھارت کے درمیان 2019 میں ہونے والی کشیدگی کے بعد سے دونوں ممالک میں کوئی بھی فل وقتی ہائی کمشنر موجود نہیں ہے اور جونیئر سفارتکاروں کو ناظم الامور کے طور پر تعینات کیا جا رہا ہے۔

 اسلام آباد (پی پی آئی)سابق وزیراعظم عمران خان کی ہمشیرہ علیمہ خان نے کہا ہے کہ خان صاحب پاکستان کے لیے ستائیس سال سے اس مشن پر ہیں،جیل ان کیلئے بے معنی چیز ہے،اگر جیل میں رہنا پاکستان کے لیے بھلائی ہے تو اسی میں رہیں گے اور سمجھوتہ نہیں کریں گے۔پی پی آئی کے مطابق اسلام آباد ہائی کورٹ کے باہر علیمہ خانم خان نے میڈیا سے گفتگو کرتے ہوئے کہا ہے کہ جو کہہ رہے ہیں ملک سے باہر چلے جائیں تو وہ اپنا گھر  چھوڑ کر باہر نہیں جائیں گے،خان صاحب نے کہا ہے سیاسی پارٹی ہے اورپاکستان میں وہ یہی تبدیلی لانا چاہ رہے تھے،ہم اسوقت سیاست کے لیے نہیں اپنے بھائی کے لیے آ رہے ہیں۔انہوں نے کہا ہے کہ ہم کورٹ میں ریلیف کے لیے آئے ہیں کہ کم از کم جیل مینوئل کے مطابق جو اجازت ہے وہ تو دیں،یہاں پر دو سال کے بچے سے لے کر نوے سال کے بزرگ تک سبھی ہیں خان صاحب کے ساتھ ہیں۔