جوہانسبرگ: پاکستان کے ممتاز آف اسپنر سعید اجمل نے جنوبی افریقا ٹی 20کپ میں منفرد ریکارڈ قائم کردیا ، اجمل نے مسلسل تیسرے میچ میں تیسری مرتبہ تین وکٹیں حاصل کیں ۔ سعید اجمل کی شاندار کارکردگی کی بدولت ٹائٹنز نے لائنز کو چھ وکٹوں سے ہرادیا ۔ تاہم پاکستانی بولر سہیل تنویر وکٹ لینے سے محروم رہے ۔سہیل تنویر نے 19رنز کی اننگز کھیلی ۔

کولمبو: اینجلو پریرا اور جہان مبارک نے سری لنکا اسپورٹس کلب کیخلاف 405رنز کی ریکارڈ شراکت قائم کرلی ۔ یہ چوتھی وکٹ پر سری لنکا کی فرسٹ کلاس کرکٹ کی تاریخ میں سب سے بڑی شراکت ہے ۔ اینجلو پریرا کے 244اور جہان مبارک کے 164رنز کی بدولت این سی سی نے میچ کو ایک اننگز اور 39رنز سے جیت لیا ۔

لندن: انگلش کرکٹ ٹیم کے کپتان الیسٹر کک نے تصدیق کی ہے کہ وہ آئندہ ماہ ویسٹ انڈیز کیخلاف تین میچوں کی ون ڈے سیریز میں شرکت نہیں کریں گے ۔کک کا کہنا تھا کہ انہوں نے ٹیم کے ساتھ ٹی ٹوئنٹی ورلڈ کپ کھیلنا ہے چنانچہ وہ چاہتے ہیں کہ چھ ہفتوں کے دوران انگلش ٹیم کی تعمیر نو کے مراحل سے گزرے ۔

لاہور: پاکستان نے بھارت کے خلاف نیوٹرل وینیو پر کرکٹ سیریز کھیلنے کے لیے رضامندی ظاہر کر دی جسے بھارتی لابی کی جیت خیال کیا جا رہا ہے۔باوثوق ذرائع کا کہنا ہے کہ پاکستان نے یو اے ای سمیت نیوٹرل وینیو پر کھیلنے کی بھارتی پیشکش منظور کر لی ہے۔ یہ خبر کرکٹ قبضہ کے حوالے سے اہمیت اختیار کر گئی ہے۔ بھارت، انگلینڈ اور آسٹریلیا کی کرکٹ حکمرانی کے حوالے سے “قبضہ گروپ” کو پاکستان کی طرف سے سخت مزاحمت کا خطرہ تھا اس خطرے کو ٹالنے کے لیے بھارت نے پاکستان کو مختصر سیریز کھیلنے پیشکش کی جسے پاکستان کی کرکٹ طرف سے منظور کر لیا گیا ہے۔ کرکٹ مصروفیت کے باعث پاک بھارت سیریز کب ہو گی شیڈول نہیں بتایا گیا اور اب بھارتی پیشکش کو مان لینے کو یہی عندیہ سمجھا جا رہا ہے کہ پاکستان ہمسایہ ملک بھارت کے حق میں ووٹ دے گا۔