لاہور: پاکستان کرکٹ بورڈ نے پابندی کا شکار دانش کنیریا کے ساتھ کھیلنے والے 5کرکٹروں پر جرمانے عائد کردیے۔دانش کنیریا کے ساتھ امریکا میں نمائشی میچ میں حصہ لینے پر وہاب ریاض، فواد عالم ، ناصر جمشید ، عبدالرزاق اور شاہ زیب حسن پر 5،5لاکھ روپے جرمانہ عائد کیا گیا ہے۔پی سی بی نے پچھلے ماہ معاملے کی تحقیقات کے لیے انتخاب عالم کی سربراہی میں3رکنی کمیٹی قائم کی تھی کمیٹی کے سامنے پانچوں کھلاڑیوں نے میچ میں حصہ لینے کا اعتراف کیا تھا اور ساتھ ہی یہ بھی کہا تھا کہ وہ این او سی کے حوالے سے لاعلم تھے۔کمیٹی نے تحقیقات کے بعد مڈل آرڈر بیٹسمن فواد عالم ،اوپننگ بیٹسمن ناصرجمشید، فاسٹ بولر وہاب ریاض ،آل راﺅنڈر عبدالرزاق اورشاہ زیب حسن پر جرمانے عائد کرنے کی سفارش کی تھی۔واضح رہے کہ وہاب ریاض، فواد عالم اور ناصر جمشیدلاہور میں جاری سمر ٹریننگ کیمپ کا بھی حصہ ہیں۔انگلش بورڈ کی جانب سے پابندی کا شکار دانش کنیریا پی سی بی کمیٹی کے سامنے پیش ہی نہیں ہو ئے۔ دانش کنیریا کا کیس انٹیگریٹی کمیٹی کو بھیج دیا گیا ہے۔ڈائریکٹر مارکیٹنگ بدر رفاعی کو بھی وارننگ دے دی گئی ہے۔

ممبئی: چنائی سپر کنگ نے آئی پی ایل کے رواں سیزن کے لیے زخمی ڈیوائن براووکے متبادل کے طور پر آسٹریلوی کرکٹر ڈیوڈ ہسی سے معاہدہ کر لیا۔براوو کنگز الیون پنجاب کے خلاف ان کے پہلے میچ میں کیچ کی کوشش میں کندھا کی انجری کا شکار ہوگئے تھے۔چنائی سپر کنگز نے آئی پی ایل کے بقیہ میچوں کے لیے ڈیوڈ ہسی سے معاہدہ کر لیا ،ہسی اسے قبل کولکتہ نائٹ رائیڈرز اور پنجاب کے لیے کھیل چکے ہیں،انھیں اس طرز کرکٹ میں عمدہ بیٹسمین کے طور پر جانا جاتاہے جبکہ وہ کار آمد بولر بھی ہیں۔

لندن: انگلینڈاگلے سال ایشنر سیریز سے قبل نیوزی لینڈ کے خلاف سیریز کی میزبانی کر ے گا ۔ نیوزی لینڈ کی ٹیم مئی 2015میں انگلینڈ کا دورہ کرے گی جس میں دو ٹیسٹ ،پانچ ایک روزہ اور ایک ٹی ٹوئنٹی میچ کھیلا جائے گا ۔سیریز کا پہلاٹیسٹ 21مئی سے لارڑ ز میں شروع ہوگا ۔انگلینڈ کر کٹ بورڑ کے چیف ایگزیکٹو نے کہا کہ ایشنر سے پہلے نیوزی لینڈ کے خلاف تینوں طرز کی سیرز کی میزبانی کے لیے ہم بہت خوش ہیں۔

کیلی فورنیا: برطانوی سائیکلسٹ بریڈ لے ویگنز نے ٹور آف کیلی فورنیا سائیکل ریس کا دوسرا مرحلہ جیت لیا۔ جیت کے ساتھ ریس میں مجموعی برتری بھی حاصل کرلی ۔ٹیم اسکائی کے چونتیس سالہ رائیڈر نے بیس کلومیٹر سے طویل فاصلہ 23منٹ اور18 سیکنڈز میں طے کیا۔ آسٹریلیا کے ڈینس روہن 44سیکنڈزکے فرق سے دوسرے نمبر پر رہے۔ بریڈلے ویگنز مجموعی برتری میں 5گھنٹے سات منٹ اور پینتیس سیکنڈ کے ساتھ سب سے آگے ہیں, ڈینس روہن دوسرے اور امریکا کے فینی ٹیلر تیسرے نمبر پر ہیں۔ لندن اولمپکس میں ٹائم ٹرائل مقابلے میں سونے کا تمغہ جیتنے والے ویگنز2012 میں بھی ٹورآف کیلی فورنیا جیت چکے ہیں۔ سات سو بیس کلو میٹر طویل کیلی فورنیا ریس میں دنیا بھر سے128 سائیکلسٹ حصہ لے رہے ہیں۔