ڈھاکا:  آئی سی سی ورلڈ ٹی 20 کا پہلا میچ ایشیا کی دو کرکٹ سپر پاورز روایتی حریف پاکستان اور بھارت کے درمیان آج ہونے والے میچ کے تمام ٹکٹیں ایک دن پہلے ہی فروخت ہوچکی ہیں، بہت سے تماشائیوں کو مایوسی کا بھی سامنا کرنا پڑا۔ ایشیا کپ میں پاک بھارت میچ انتہائی سنسنی خیز رہا تھا جس کی وجہ سے ورلڈ کپ میں بھی دونوں ٹیموں کے درمیان ایونٹ کا پہلا میچ سنسنی خیز ہونے کا امکان ہے۔ بنگلہ دیش میں کروڑوں کرکٹ کے دیوانوں میں کرکٹ کا جنون عروج پر پہنچ گیا ہے۔ پاک بھارت ٹاکرے کے لئے ٹکٹ نایاب ہیں ٹکٹ ایڈوانس میں فروخت ہوچکے ہیں اور دونوں ملکوں سے بڑی تعداد میں تماشائی بنگلہ دیش میں اپنی اپنی ٹیم کی حوصلہ افزائی کیلئے آئے ہیں جن میں بڑی تعداد فلمی ستاروں اور تاجروں کی بھی ہے اس وجہ سے پاک بھارت میچ کی دلچسپی میں مزید اضافہ ہوگیا ہے اور پوری دنیا کی نظریں ورلڈ ٹی 20 کے پہلے میچ میں مرکوز ہیں۔ دوسری جانب سٹے باز بھی بڑی تعداد میں حرکت میں آگئے ہیں اور اربوں روپے کا جواہونے کا امکان بھی ظاہر کیا جا رہا ہے۔ ایشیا کپ میں بھارت کی پاکستان کے ہاتھوں شکست نے ورلڈ کپ میں دونوں ٹیموں کے افتتاحی میچ کو مزید دلچسپ بنا دیا ہے۔

لاہور:  ورلڈ ٹی ٹوئنٹی کا سب سے بڑا معرکہ روایتی حریف پاک بھارت ٹیموں کے درمیان آج ہوگا۔ سابق اور موجودہ کرکٹرز نے میچ کیلئے گرین شرٹس کو فیورٹ قرار دیا ہے۔ ان کا کہنا ہے کہ ایشیا کپ کی فتوحات کے تسلسل کو برقرار رکھ کر بھارتی سورماوں کو زیر کیا جاسکتاہے۔ چند دن پہلے بنگلہ دیش میں ایشیا کپ کے میچ میں شاہد آفریدی کی بدولت پاکستان نے بھارت کو ناکوں چنے چبوائے،اس تاریخی کامیابی کی وجہ سے قومی شاہینوں کو میگا ایونٹ کے افتتاحی میچ میں بھارت پر نفسیاتی برتری حاصل ہوگی۔کرکٹرز نے بہترین باولنگ اٹیک کی موجودگی میں شاہینوں کو فیورٹ قرار دیا ہے۔ سابق کرکٹرزکے مطابق ایشیا کپ میں بھارت اور بنگلہ دیش کے خلاف بڑے اہداف کے حصول کی وجہ سے گرین شرٹس کے حوصلے بلند ہیں اور بھارتی ٹیم کو شکست سے دو چار کر نے کے لیے کارکردگی کے تسلسل کو برقرار رکھنا ہوگا۔ کرکٹرز نے اعصاب شکن میچ میں بھارت کو زیر کرنے کیلئے جارحانہ حکمت عملی اختیار کرنے کی ضرورت پر زور دیا۔

سڈنی: سابق آسٹریلوی کرکٹ ٹیم کے کوچ مکی آرتھر کوکریبیئن پریمئر لیگ میں جمیکا ٹیلواکا کوچ مقرر کر دیا گیا۔جنوبی افریقا سے تعلق رکھنے والے مکی آرتھر کو پچھلے سال آسٹریلوی کر کٹ ٹیم کی کوچنگ سے اسوقت معزول کردیا گیا تھا جب انگلینڈ نے ایشنر سیریز میں آسٹریلیا کو تاریخی شکست دو چار کیا تھا۔ دوسری جانب مکی آرتھر اور ویسٹ انڈین اسٹار بیٹسمین کرس گیل درمیان تعلقات کے حوالے خدشہ ظاہر کیا جا رہا ہے کہ دونوں کے درمیان ناخوشی کا رشتہ قائم رہے گا۔ تاہم مکی آرتھر نے کوچنگ کے معاہدے پر دستخط کردیے ہیں ۔ ایک اور سابق آسٹریلین کوچ ٹم نیلسن کوبھی کیریبیئن لیگ میں انٹیگا ہوکس بلز کے کوچ مقررکئے جانے کاا مکان ہے ۔ ٹم نیلسن نے اس حوالے سے کہا ہے کہ میں ٹاپ لیول کے ٹورنامنٹ کے اچھے ماحول میں ٹیلینٹڈ کھلاڑیوں کی کوچنگ کے لیے پر جوش ہوں۔

لاہور: پی سی بی کے چیئرمین نجم سیٹھی نے امید ظاہر کی ہے کہ ورلڈ ٹی ٹوینٹی کے افتتاحی میچ میں روایتی حریف بھارت کے خلاف پاکستان فتح سے ہمکنار ہوگا۔ قذافی اسٹیڈیم لاہور میں میڈیا سے بات چیت کرتے ہوئے نجم سیٹھی کا کہنا تھا کہ ایشیا کپ میں شاہد آفریدی کے دو چھکے لگانے سے ملنے والی فتح سے گرین شرٹس کا مورال ہائی ہے۔ شاہد آفریدی بھی نوے فیصد فٹ ہوچکے ہیں اور کھلاڑیوں کے متحد ہو کر کھیلنے کی صورت میں فتح پاکستان کا مقدر بنے گی۔ چیئرمین پی سی بی نے کہا کہ میدان میں کھلاڑیوں کو لڑانا کپتان اور کوچز کا کام ہے جبکہ چیئرمین کا کام کھلاڑیوں کی حوصلہ افزائی کرنا ہے جو وہ کررہے ہیں۔

ڈھاکا: جنو بی افریقا کی کرکٹ ٹیم ٹیٹوئنٹی ورلڈ کپ میں کپتان فیف ڈوپلیسی اور فاسٹ باﺅلر ڈیل اسٹین کے فٹنس مسائل کے باعث پریشانی کا شکار ہوگئی ہے۔پروٹیزہفتے کو سری لنکا کے خلاف اپنا افتتاحی میچ کھیلےں گے تاہم کپتان فیف ڈوپلیسی اور ڈیل اسٹین کی شر کت مشکوک ہے، دونوں کھلاڑی ہمسٹرنگ کا شکار ہو گئے تھے۔ڈیل اسٹین آسٹریلیا کے خلاف حالیہ سیریز میں ہمسٹرنگ کا شکار ہوئے تھے تاہم ٹی ٹوئنی ورلڈ کپ کے پہلے وارم اپ میچ میں 2.2اوور کرانے کے بعد دوبارہ انجری کا شکار ہوگئے تھے ۔ کپتان فیف ڈوپلیسی کے سری لنکا کے خلا ف میچ میںشرکت کے حوالے پچاس فی صد امکان ظاہر کیا جا رہاہے۔ کر کٹ جنوبی افریقا کی جا نب سے جاری اعلامیے میں کہا گیا ہے کہ میڈیکل ٹیم کھلاڑیوں کی زخموں کے علاج کے لیے بہت محنت کر رہے ہیں،انھیں بہترین علاج دیا جا رہا ہے اور امید ہے کہ ورلڈ کپ کے پہلے میچ سے قبل فٹ ہو جائیں گے ۔ فیف ڈوپلیسی کی غیر حاضری کی صورت میں ان کی جگہ اے بی ڈی ولیئر پروٹیز کی قیادت کریںگے،جنوبی افریقا کا دوسرامیچ پیر کو نیوزی لینڈ کے خلا ف ہوگا ، جبکہ سیمی فائنل تک رسائی کے لیے انگلینڈ اور فرسٹ راﺅنڈ کوالیفائر ٹیم کے خلا ف کامیابیاں حاصل کر نا ہو گی۔

ڈھاکا: پاکستانی کرکٹ ٹیم کے کپتان محمد حفیظ نے کہا ہے کہ شاید آفریدی سو فی صد فٹ نہیں ہیں لیکن ٹی 20 ورلڈ کپ میں شرکت کے لیے پرجوش ہیں۔ڈھاکا میں میڈیا سے گفتگو کرتے ہوئے قومی کپتان محمد حفیظ کا کہنا تھا کہ شاید آفریدی سوفیصد فٹ نہیں ہیں لیکن ٹی 20 ورلڈ کپ میں شرکت کے لیے پرجوش ہیں۔محمد حفیظ کا مزید کہنا تھا کہ آل راونڈرز کی کارکردگی بہتر ہے۔ایونٹ میں فاسٹ بولرز اہم ہوں گے۔دوسری جانب بھارتی کپتان مہندر سنگھ دھونی کا کہنا تھا کہ اس سے فرق نہیں پڑتا کہ پاکستان ٹی 20 میچز میں بھارت سے ایک بار بھی نہیں جیت سکا ، یہ ایک نیا میچ ہے اس میں بھرپور کارکردگی دکھانی ہو گی۔