اسلام آباد (پی پی آئی)عالمی مالیاتی ادارے (آئی ایم ایف) نے فسکل مانیٹر رپورٹ 2023 جاری  کی ہے جس میں خسارہ جی ڈی پی کے 6.5 فیصد کے بجائے 7.6 فیصد رہنے کی پیشگوئی کی گئی ہے،رپورٹ کیمطابق اس سال پاکستان کا مالی خسارہ ہدف سے 1137 ارب زیادہ ہونے کا تخمینہ لگایا گیا ہے۔  رپورٹ میں کہا گیا ہے کہ سال 2024-23 میں خسارہ 8 ہزار42 ارب روپے تک پہنچ جائے گا جبکہ حکومت نے مالی خسارے کا ہدف 6 ہزار 905 ارب روپے مقرر کر رکھا ہے،  پی پی آئی کے مطابققرضوں کی شرح 60 فیصد کے قانونی ہدف کے بجائے 72.2 فیصد رہے گی، اس سال پرائمری سرپلس 0.4 فیصد ہدف کے مطابق 421 ارب رہنے کا امکان ہے۔  اس کے علاوہ  مجموعی محاصل 12.5 فیصد اور  مجموعی اخراجات جی ڈی پی کا 20.1 فیصد رہیں گے۔

کراچی (پی پی آئی) شارع فیصل کراچی  پر واقع کثیر المنزلہ ’ریجنٹ پلازہ ہوٹل‘ کے مالک ’پاکستان ہوٹلز ڈیولپرز لمیٹڈ (پی ایچ ڈی ایل)‘ نے گزشتہ روز سرمایہ کاروں کو بتایا کہ صحت کے شعبے میں کام کرنے والی ایک نمایاں غیرمنافع بخش تنظیم نے 14 ارب 50 کروڑ روپے میں ریجنٹ پلازہ ہوٹل خریدنے کی پیشکش کی ہے۔فرم نے سید شبر زیدی کا دستخط شدہ آفر لیٹر بھی ساتھ منسلک کیا، جو سندھ انسٹی ٹیوٹ آف یورولوجی اینڈ ٹرانسپلانٹیشن (ایس آئی یو ٹی) ٹرسٹ کی جانب سے بطور ٹرسٹی خدمات سرانجام دیتے ہیں۔ریجنٹ پلازہ کو موجودہ حالت میں خریدنے کی باضابطہ پیشکش 25 ستمبر کو پاکستان ہوٹلز ڈیولپرز لمیٹڈ کے ایک عوامی انکشاف کے بعد سامنے آئی ہے جس میں فرم نے سرمایہ کاروں کو مطلع کیا تھا کہ ایس آئی یو ٹی ٹرسٹ اس کے اثاثوں اور واجبات کا تعین کرنے کے لیے اس کی جائیداد کے دستاویزات کا جامع جائزہ لینا چاہتا ہے۔’چیس سیکیورٹیز‘ کے ریسرچ ڈائریکٹر یوسف ایم فاروق نے کہا کہ ایس آئی یو ٹی ٹرسٹ کی جانب سے ہوٹل کی مجوزہ خریداری کی واضح وجہ اس کو ہسپتال میں تبدیل کرنا ہے۔انہوں نے کہا کہ ایس آئی یو ٹی ٹرسٹ ’پاکستان ہوٹلز ڈیولپرز لمیٹڈ‘ کو نہیں بلکہ صرف اس کی پراپرٹی حاصل کر رہا ہے، یوں اس لین دین سے حاصل ہونے والی آمدنی کمپنی کو جائے گی، جو اس کے بعد ریونیو کما کر دینے والے ہوٹل کے بغیر بھی اپنے موجودہ اسٹیٹس کو برقرار رکھے گی۔’ریجنٹ پلازہ ہوٹل اینڈ کنونشن سینٹر‘ مرکزی شاہراہ فیصل پر 13 ہزار 200 مربع گز کے رقبے پر واقع ہے، کثیر المنزلہ عمارت کا کل احاطہ شدہ رقبہ 47 ہزار 34 مربع گز ہے۔پی ایچ ڈی ایل کی ملکیت میں تقریباً 14 ایکڑ کے مجموعی رقبے کی 2 دیگر زمینیں ٹھٹہ میں واقع ہیں، یہ واضح نہیں ہے کہ آیا مجوزہ لین دین میں ٹھٹہ کی یہ پراپرٹی شامل ہے یا نہیں۔ہوٹل میں 400 کمرے ہیں جن میں ٹھہرنے والوں کی شرح مالی سال 23-2022 میں 19 فیصد رہی، گزشتہ 2 مالی سالوں میں قبضے کی شرح 20 فیصد اور 9 فیصد رہی۔تازہ ترین سالانہ اکاؤنٹس سے پتا چلتا ہے کہ کمپنی نے اپنے اہم رئیل اسٹیٹ کی قیمت 8 ارب 90 کروڑ روپے رکھی ہے، اس ہوٹل کی عمارت کی قیمت 92 کروڑ 42 لاکھ روپے ہے۔واضح رہے کہ ایس آئی یو ٹی کی بنیاد ممتاز سرجن ڈاکٹر سید ادیب الحسن رضوی نے 4 دہائیاں قبل کراچی کے سول ہسپتال کے برنز یونٹ میں 8 بستروں پر مشتمل وارڈ کے طور پر رکھی تھی۔کئی برسوں کے دوران بڑے پیمانے پر توسیع سے گزرنے کے بعد یہ ادارہ اب ایک خیراتی ٹرسٹ کے طور پر کام کر رہا ہے اور متعدد ہسپتالوں کے ذریعے ہر سال 5 لاکھ سے زائد مریضوں کو طبی سہولیات اور مالی امداد فراہم کرتا ہے۔