ویلنگٹن: برینڈن میکولم ٹیسٹ میچ میں ٹرپل سنچری بنانے والے نیوزی لینڈ کرکٹ ٹیم کے پہلے کھلاڑی بن گئے۔ نیوزی لینڈ کرکٹ ٹیم کے کپتان برینڈن میکولم بھارت کے خلاف دوسرے ٹیسٹ میچ کے آخری روز شاندار کھیل کا مظاہرہ کرتے ہوئے 302 رن بنا کر آوٹ ہوئے۔ اس تاریخی موقع پر میکولم کے والد بھی اسٹیڈیم میں موجود تھے جنہوں نے ہزاروں افراد کے ہمراہ کھڑے ہو کر ریکارڈ بنانے پر بیٹے کو خراج تحسین پیش کیا۔ نیوزی لینڈ کی جانب سے سب سے زیادہ رنز بنانے کا اعزاز اس سے پہلے مارٹن کرو کے پاس تھا جب انہوں نے 1991 میں سری لنکا کے خلاف 299 رنز بنائے تھے۔

کراچی: سندھ کے عثمان خان نے دفاعی چیمپئن محسن امین کو شکست دے کرچھٹی قومی جونیئراسنوکرچیمپئن شپ سے باہر کردیا۔ کراچی میں کھیلے جانے والے ایونٹ میں سندھ کے عثمان خان نے پنجاب کے دفاعی چیمپئن محسن امین کو دلچسپ مقابلے کے بعد تین دو فریم سے ہرایا۔ عثمان خان کی جیت کا اسکور62-54، 69-15،12-72، 19-73اور19-64 سے رہا۔ دیگر میچوں میں سندھ چیمپئن حارث ندیم، حنین عامر، عبدالرحیم ، شارق علی ، نعمان اقبال ، محمد فہیم، حمزہ اکبر، محمد فہد، محمد رفیق، محمد ابراہیم، عامر طارق جنید بابر ، سیف اللہ اورماجد علی نے بھی کامیابی حاصل کی۔

دبئی: کلدیپ یادیو انڈر 19کرکٹ ورلڈ کپ میں ہیٹ ٹرک کرنے والے پہلے بھارتی باﺅلر بن گئے ۔ انہوں نے یہ کارنامہ دبئی میں جاری میگا ایونٹ میں اسکاٹ لینڈ کے خلا ف میچ میں سرانجام دیا ۔کلدیپ یادیو نے اسکاٹ لینڈ کیخلا ف میچ میں تباہ کن بولنگ کرتے ہوئے 28رنز کے عوض 4کھلاڑیوں کو آﺅٹ کیا جس میں ان کی شاندار ہیٹ ٹرک شامل ہے ۔ انہوں نے نک فارار ،کائل سٹرلنگ اور ایلیکس باﺅم کو آﺅٹ کرکے تاریخ رقم کی ہے ۔

ایڈیلیڈ: جنوبی آسٹریلیا نے آئندہ سال شیڈول کرکٹ ورلڈ کپ میں پاک بھارت معرکے کو اپنی اسٹیٹ کا سب سے بڑا اسپورٹس ایونٹ قرار دے دیا ۔ عالمی کپ میں روایتی حریف کا مقابلہ ایڈیلیڈ کے نوتعمیر شدہ اسٹیڈیم میں برپا ہوگا ،جس میں تماشائیوں کی تعداد پچاس ہزار کردی گئی ہے ۔اہم ترین میچ کی تمام ٹکٹیںایک گھنٹے کے اندر فروخت ہوگئی تھیں ۔

مرید کے: آئی سی سی ویمن ٹی ٹوئنٹی ورلڈ کپ اور بنگلہ دیش کے خلاف ہونے والی سیریز کی تیاری کے لئے اعلان کردہ کھلاڑیوں کا تربیتی کیمپ کنٹری کلب کرکٹ گراﺅنڈ مرید کے میں شروع ہوگیا ۔تربیتی کیمپ یکم مارچ تک جاری رہے گا ۔ کیمپ میں 2سے 15مارچ تک بنگلہ دیش کے خلاف ہونے والی سیریز اور 16مارچ تا 6اپریل تک ہونے والی آئی سی سی ویمن ٹی ٹوئنٹی ورلڈ کپ بنگلہ دیش کی تیاری کی جائے گی ۔