لاہور: پاکستان کرکٹ ٹیم کے اوپننگ بیٹسمن ناصر جمشید ورلڈکپ 2015میں قومی ٹیم کی نمائندگی کے لیے پر عزم ہیں۔اوپننگ بیٹسمن کا کہنا ہے کہ وہ ورلڈکپ میں پاکستان کی فتوحات میں اہم کردار ادا کرنا چاہتے ہیں۔نیشنل کرکٹ اکیڈمی میں میڈیا سے گفتگو کرتے ہوئے ناصر جمشید کا کہنا تھا کہ وہ فارم اور فٹنس بحال کر کے ٹیم میں واپسی کے لیے پرعزم ہیں۔ان کا کہنا تھا کہ وہ فٹنس کے ذریعہ اپنے وزن پر قابو پانے اور کوچزکی رہنمائی میں بیٹنگ کی خامیوں پر قابو پانے کے لیے کوشاں ہیں۔انھوں نے مزید کہا کہ وہ فارم اور فٹنس ثابت کرکے سری لنکا اور آسٹریلیا کے خلاف ٹیم میں جگہ بنانے کے لیے کوشاں ہیں ،جارح مزاج بیٹسمن کا کہنا تھا کہ موقع ملنے پر وہ ماضی کی غلطیاں نہیں دہرائیں گے اور شائقین اب انھیں ایک نئے روپ میں دیکھیں گے۔واضح رہے کہ ناصر جمشید مسلسل خراب فارم کی وجہ سے قومی ٹیم سے باہر ہیں۔

شارجہ: انڈین پریمئیر لیگ میں مشکلات سے دوچار ممبئی انڈینز نے سابق آسٹریلوی کپتان رکی پونٹنگ کی خد مات حاصل کرلیں ۔ سابق آسٹریلوی کپتان ممبئی انڈینز کی مشاورتی ٹیم کا حصہ ہوں گے۔رکی پونٹنگ آئی پی ایل کے چھٹے ایڈیشن میں ممبئی انڈینز کی کپتانی بھی کرچکے ہیں۔ممبئی انڈینز کی انتظامیہ نے اس بات کی تصدیق کر تے ہوئے بتایا ہے کہ رکی پونٹنگ ممبئی کی مشاورتی ٹیم کاحصہ ہوںگے۔اس اقدام کے بعد ممبئی انڈینز کو عظیم بلے باز سچن ٹنڈولکر کے ساتھ ساتھ رکی پونٹنگ کی خدمات بھی حاصل ہوں گی۔ رکی پونٹنگ کا کہنا ہے کہ وہ ایک بار پھر ممبئی انڈینز کے ساتھ کام کرنے کے لیے پوری طرح تیار ہیںاور امید کرتے ہیں کہ ٹیم اپنی صلاحیتوں کے مطابق شاندار کھیل پیش کرکے ایونٹ میں واپسی کرگی۔ واضح رہے کہ آئی پی ایل میں ممبئی انڈینزکی خراب کارکردگی کا سلسلہ جاری ہے۔ممبئی کی ٹیم ایونٹ میں اپنے چاروں میچز ہار کر پوائنٹس ٹیبل پر آخری نمبر پر موجودہے۔

دبئی: ایشین اسنوکرچیمپئین شپ میں پاکستانی کھلاڑیوں آصف ٹوبا اوراسجد اقبال نے فاتحانہ آغازکیا۔ دبئی میںجاری ایشین اسنوکر چیمپیئن شپ میں پاکستان کے کیوئسٹ محمد آصف ٹوبا اور اسجد اقبال نے شاندار کھیل کا مظاہرہ کیا۔ محمد آصف ٹوبا نے شام کے حاتم شیخ خلیل صفر کے مقابلے میں چار فریم شکست دی،دوسری جانب اسجد اقبال نے بھی اپنا میچ باآسانی جیت لیا اور کوریا کے کیوئسٹ کو چارصفر سے زیر کیا۔

بیونس آئرس: ارجنٹائن موٹو جی پی ریس کے پریکٹس سیشن میںدفاعی چیمپئن اور چیمپئن شپ لیڈر مارک مارکیز نے سب کو پیچھے چھوڑ دیا۔ورلڈ چیمپئن اسپین کے مارک مارکیز پہلی پوزیشن پر براجمان ہیں ،اسپین ہی کے ڈینی پیڈروسا صفر اعشاریہ ایک سات صفر سیکنڈ کے فرقسے دوسرے اور الیکس ایسپارگارو تیسرے تیز ترین رائیڈر قرار پائے۔ موٹو ٹو ایونٹ کے پریکٹس سیشن میں فرانس کے جان زارسرفہرست رہے،جرمنی کے جوناس فولجر کی دوسری اور سوئزرلینڈ کے ڈومینیک تیسرے نمبر پر رہے ۔

بارسلونا: عالمی نمبر ایک رافیل نڈال بارسلونا اوپن ٹینس ٹورنامنٹ میں ہم وطن نکولس المیگرو سے اپ سیٹ شکست کے بعد ٹورنامنٹ سے باہر ہو گئے ، ڈبلز میں اعصام الحق اور روہن بھوپانا کینیڈ ا،سربیاکی جوڑی سے شکست کھا گئے ۔اسپین کے شہر بارسلونا میں جاری اے ٹی پی سنگلز ایونٹ کے کوارٹر فائنل میںمیزبان سٹارورلڈ نمبر ایک رافیل نڈال کو ہم وطن کھلاڑی نکولس المیگرو سے اپ سیٹ شکست کا سامناکرنا پڑا۔ عالمی نمبر 20 المیگرو نے دو گھنٹے 47 منٹ کے طویل مقابلے کے بعد دفاعی چیمپئن کو ناک آوٹ کیا ، المیگرو کی فتح کا سکور 2-6 ،7-6 اور6-4 رہا۔اسے پہلے مقابلوں میں لٹویا کے ارنٹس گلبز نے روسی حریف تیمورز کوا سٹریٹ سیٹس میں 6-1اور6-4 سے شکست دے کر سیمی فائنل کے لیے کوالیفائی کرلیا،جاپان کے نیشی کوری نے کروشیا کے مارین سلک کو 6-1 اور6-3 سے شکست دی۔ڈبلز مقابلوں میں اعصام الحق اور روہن بھوپانا پر مشتمل پاک بھارت جوڑی کو کینیڈا کے ڈینئیل اور سربیا کے زیموجک نے 6-7، 7-5 اور10-7 سے شکست دے کر ٹورنامنٹ سے باہر کر دیا۔

ساﺅ پاﺅلو: سابق عظیم فٹبال پیلے کا کہنا ہے کہ برازیل ورلڈکپ فٹ بال2014 میں شامل کسی ٹیم سے خوف ذدہ نہیں، افتتاحی میچ اور گروپ میں کسی بھی ٹیم کا سامنا کرنے کے لئے تیار ہے۔ فٹبال عالمی کپ کے ڈراز جمعہ کو نکالے جائیں گے جس کے ذریعے طے ہوگا۔پیلے ساوپاولو میں اولمپک چیمپئن تیراک مائیکل فیلپس کے ساتھ تشہیری مہم میں مصروف ہیں۔اشتہاری فلم کی عکس بندی کے دوران صحافیوںسے گفتگو کر تے ہوئے پیلے نے کہا کہ پانچ مرتبہ کا عالمی چیمپئن برازیل کسی بھی ٹیم سے خائف نہیں اور وہ ہوم گراونڈ پر کھیلے جانے والے ورلڈ کپ میں کسی بھی ٹیم کا سامنا کرنے کو تیار ہے۔اس وقت جرمنی اور اسپین کی ٹیمیں بلاشبہ سب سے بہتر ہیں، لیکن عالمی کپ میں ہمیشہ غیر متوقع نتائج بھی سامنے آتے ہیں۔ توقع اور خواہش ہے کہ برازیل فائنل تک ضرور پہنچے۔ برازیل کے فٹبال لیجنڈ پیلے دنیا کے واحد کھلاڑی ہیں جنھیںمسلسل تین ورلڈ کپ کی فاتح ٹیموں کی نمائندگی کا اعزاز حاصل ہے۔