میرپورخاص: میر پورخاص میں پولیس کاجرائم پیشہ عناصر کے خلاف کریک ڈاﺅن موٹر سائیکلیں ،اسلحہ ،شراب اور چرس سمیت قتل کے الزام میں ملوث ایک ملزم گرفتار کر لیا۔میرپورخاص پولیس کی جرائم پیشہ افراد کے خلاف کریک ڈاون ،مختلف جگہوں پر چھاپے مار کر 26چھینی گئی موٹر سائیکلیں، 10ٹی ٹی پسٹل بمعہ گولیاں،1عدد بندوق ، 32شراب کی بوتلیں ،4500سو گرام چرس برآمد کرنے کے علاوہ سابق اسسٹنٹ مختیار کار ،ان کی بیوی اور چار سالہ بیٹی کو بے دردی سے قتل کرنے والے ملزمان میں ایک اہم ملزم گرفتار کر لیا گیا ۔ ایس ایس پی میرپورخاص جام ظفراللہ دھاریجو نے پریس کانفرنس سے خطاب کرتے ہوئے کہا کہ گزشتہ چند دنوں سے میرپورخاص شہر میں موٹر سائیکل چوری اور چھینی جانے کی وارداتوں کے علاوہ لوٹ مار کی دیگر وارداتوں کی عوامی شکایات پر پولیس حرکت میں آگئی اس دوران پولیس نے مختلف جگہوں پر کامیاب چھاپے مار کر جوہر کالونی میں رہائش پذیر سابق اسسٹنٹ مختیا رکا ر نور عالم اس کی بیوی اور اس کی چار سالہ بیٹی کے قتل کا اہم ملزم مختیار پلی کوگرفتار کر لیا جب کہ اس کیس میں ملوث ملزمہ نسرین پلی پہلے سے گرفتار ہے ، ملزمان سے تین سونے کی چوڑیاں ، مقتول نور عالم کا نام لکھی انگوٹھی سمیت پانچ عد د سونے کی انگوٹھیاں ، مرحومہ مریم پلی کا موبائل فون ، دو کیمرے،ایک کمپیوٹر مانیڑ سمیت آلہ قتل بھی برآمد کر لیا ۔ایس ایس پی نے مزید بتایا کہ مورخہ 23اپریل کو کھپرو بس اسٹینڈ پر محبوب علی مری پرسیٹی سائیڈ کی دُکان پر ڈکیتی کرنے والا ملزم سلمان عر ف زیبر پولیس نے گرفتار کرکے اس کے قبضے سے واردات میں استعمال ہونے والا ایک ٹی ٹی پسٹل برآمد کرلیا جب کے اس کے دیگر ساتھی رضوان بلوچ ، عبداللہ بلوچ فائرنگ کرتے ہوئے فرار ہونے میں کامیا ب ہو گئے ،ایس ایس پی نے بتایا کہ ملزم سلمان عرف زبیر اور اس کے دیگر ساتھی اس سے قبل SLDپھا ٹک کے قریب بابر جھنڈیر نامی شخص سے اسلحے کے زور پرواردات کی تھی جس میں یہ موقع سے فرار ہو گیا تھا جب کے اس کے دیگر ساتھی عاقب اور احسن کو پولیس نے گرفتار کر لیاگیا تھا ۔ کھپرو اسٹینڈمیں واقع نور شاہ مارکیٹ میں سرون کمار کی دکان سے ایک لاکھ روپے کیش لوٹنے والے ملزمان امداد علی عرف مدو ماچھی سکنہ گوٹھ اللہ بخش کاکا ، عرفان ولد ابوبکر پھنور سکنہ دیھ 118گوٹھ عبداللہ پھنور اور ملزم محمد علی کشمیری بٹ سکنہ آزاد کشمیر کو گرفتار کر کے ان کے قبضے سے بڑی تعداد میں لوٹا گیا مال برآمد کر لیا گیا۔ اس موقع پر ایس ایس پی جام ظفراللہ دھاریجو نے کہا کہ صحافی جہاں ہم پر تنقید کرتے ہیں وہی ہماری پولیس کے اچھے کارناموں کو بھی اجاگر کیا کریں اور عوام کے ساتھ ساتھ میڈیا ہماری رہنمائی کریں تو ہم پورے ڈویژن سے جرائم کو اکھاڑ کر ختم کر دیں گے۔

میرپورخاص: ممبر سندھ اسمبلی خیرالنساءمُغل نے سرجن سول اسپتا ل ڈاکٹر غلام حسین انڑکت سول اسپتا ل میر پور خاص کے انتظامی اموربہتر طور چلانے کی ہدایت کی۔ رکن سندھ اسمبلی خیرالنسامُغل نے سخت برہمی کا اظہار کرتے ہوئے سول سرجن ڈاکٹر غلام حسین اُنڑ کو ہدایت کی ہے کہ وہ ہسپتال کے انتظامی امور کو بہتر طور پر چلائیں ۔رکن اسمبلی نے سول ہسپتال میرپورخاص میں ہسپتال کے مسائل کے متعلق منعقدہ اجلاس کی صدارت کرتے ہوئے سول سرجن کو ہدایت کی کہ گھوسٹ ڈاکٹروں اور اسٹاف کی رپورٹ دی جائے تا کہ ان کے خلاف قانونی کارروائی کی جاسکے۔ایم پی اے نے ہدایت کی کہ ہسپتال میں علاج و معالج اور صحت و صفائی کی بگڑتی ہوئی صورتحال کو درست کیا جائے بصورت دیگر کوتاہی کے مرتکب افسران ،ڈاکٹروں اور اسٹاف کے خلاف سخت قانونی کارروائی کی جائے گی۔انھوں نے ہسپتال کے انتظامی امور بہتر طور پر نہ چلانے پر سول سرجن پر برہمی کا اظہار کرتے ہوئے سخت ہدایت کی کہ و ہ اپنی کارکردگی بہتر کریں۔اس موقع پر سول سرجن ،ڈائریکٹر ایڈمنسٹریشن ہیلتھ سندھ حیدرآباد ڈاکٹر رفیق کھوکھر اور ڈاکٹر اشتیاق نے ہسپتال میں ڈاکٹروں کی کمی ،فنڈز کی کمی اور دیگر مسائل کی نشاندہی کی جس پر ایم پی اے نے یقین دلایا کہ ہسپتال کے جائز مسائل حل کرانے کیلئے اعلیٰ حکام سے بات چیت کی جائے گی۔بعدازاں ایم پی اے نے صحافیوں سے گفتگو کرتے ہوئے کہا کہ پیپلز پارٹی جب بھی اقتدار میں آئی ہے تعلیم، صحت اور روزگارکی فراہمی کو ترجیح دی ہے ۔ایک سوال کے جواب میںانھوںنے کہا کہ گائنی وارڈ میں آپریشن نہ ہونا ،مردہ خانہ میں لاوارث ظاہر کرکے لاش کو جلد فارغ کرنا ،جنریٹر نہ چلانا انسانیت کی تذلیل ہے جس پر انھوں نے سول سرجن کو ہدایت کی کہ آئندہ اس قسم کی کوتاہی ہر گز برداشت نہیں کی جائے گی۔ایک اور سوال کے جواب میں انھوںنے کہا کہ سول ہسپتال کی بگڑتی ہوئی صورت حال کو کافی حد تک سدھارا جارہا ہے اور کہا کہ انتظامیہ کی نااہلی کی وجہ سے مسائل پیداہورہے ہیں۔

لاہور: پاکستان اولمپک ایسوسی ایشن کے صدر ریٹائر جنرل عارف حسن کا کہنا ہے کہ ایشین گیمز میں پاکستان کا 218 رکنی دستہ شرکت کرے گا۔لاہور میں پریس کانفرنس کرتے ہوئے پی او اے کے صدر عارف حسن نے کہا کہ پاکستان ایشین گیمز میںفٹ بال، ٹینس، کبڈی، اتھلیٹکس سمیت بائیس مختلف کھیلوں میںحصہ لے گا، انھوں نے کہا کہ پاکستان ہاکی فیڈریشن نے ایشین گیمز کے لئے ابھی تک رابطہ نہیں کیا۔ عارف حسن نے کہا کہ کامن ویلتھ گیمز میں پاکستان کا 53 رکنی دستہ شرکت کرے گا، انھوں نے کہا کہ اگر قومی کھیل ہاکی ٹیم کو ایشین گیمز میں نہ بھیجا گیا تو ملک کا نقصان اور بدنامی ہوگی۔