میامی: امریکی نیشنل باسکٹ بال میں میامی ہیٹ نے پیلیکنز کو شکست دے دی۔ میامی میں کھیلے گئے میچ میں میامی ہیٹ نے شاندار کارکردگی دکھاتے ہوئے25 پوانٹس سے پیلیکنز پر فتح حاصل کی۔ فاتح ٹیم کی جانب سےلی بورن جیمز نے 32 پوائنٹس سکور کرتے ہوئے ٹیم کی جیت کو یقینی بنایا۔ اس فتح کے ساتھ میامی ہیٹ کی پوائنٹس ٹیبل پر پوزیشن بھی مزید بہتر ہو گئی ہے۔

لزبن: پرتگال سے تعلق رکھنے والے فٹ بال کھلاڑی کرسٹیانو رونالڈو نے اپنے کیریئر میں 400 گول کا سنگ میل طے کر لیا ۔ کرسٹیانو رونالڈو نے یہ تمام گول مجموعی طور پر کلب فٹ بال اور اپنے ملک کی نمائندگی کرتے ہوئے کھیلے جانے والی میچوں میں کئے۔ انھوں نے اپنی اس جیت کو پرتگال کے معروف سابق فٹ بالر یوسیبیو کے نام کیا جو دو روز قبل انتقال کر گئے تھے۔ کرسٹیانو رونالڈو نے ریال میڈرڈ کی جانب سے کھیلتے ہوئے یہ گول سیٹا ویگو کلب کے خلاف کیے۔ یہ میچ ریال میڈرڈ نے تین صفر سے جیتا۔ کرسٹیانو رونالڈو نے یوسیبیو کو مخاطب کرتے ہوئے کہا کہ ” میں اپنے یہ دونوں گول یوسیبیو کے نام کرتا ہوں لیکن درحقیقت یہ گول آپ ہی نے کیے ہیں۔ آپ ہمیشہ میرے دل میں رہے ہیں”۔ انہوں نے مزید کہا کہ ہم نے اب تک کے بہترین کھلاڑیوں میں ایک کو کھویا ہے۔ یوسیبیو نے اپنے کیریئر میں 733 گول سکور کئے اورکرسٹیانو رونالڈو نے انھیں سب کے لیے ایک مثال قرار دیا۔کرسٹیانو رونالڈو مانچیسٹر یونائیٹڈ کی جانب سے کھیلتے ہوئے 2008 میں بھی بیلن ڈی اور کا اعزاز جیت چکے ہیں۔رونالڈو 2009 میں آٹھ کروڑ پاﺅنڈ کا معاوضہ پا کر ریال میڈرڈ کا حصہ بنے تھے۔ یہ رقم اس زمانے میں ریکارڈ تھی۔ اس کلب کے لیے انھوں نے اب تک 203 گول کیے ہیں۔ رونالڈو 2009 میں تین پریمئیر لیگ، ایک چیمپئن لیگ، ایک ایف اے کپ، دو لیگ کپ اور ایک فیفا کا ایک عالمی کلب ایوارڈ جیت چکے ہیں۔ رونالڈو کی کامیابی سپین میں بھی جاری رہی جہاں انھوں نے 2010، 2011 اور 2012 کے دوران چیلسی کے باس ہوزے مورینو کی قیادت میں کوپا ڈیل رے اور لا لیگا کپ بھی جیتا تھا۔

کیلیفورنیا: امریکا میں فٹبال ورلڈ کپ کے لیے کھلاڑیوں کے انتخاب کے لیے تربیتی کیمپ شروع ہوگیا۔برازیل میں رواں سال دنیا کے سب سے بڑے میگا ایونٹ فٹبال ورلڈ کپ میں حصہ لینے کے لیے امریکی ریاست کیلی فورنیا کے شہرکارسن میں تربیتی کیمپ کا آغاز ہوگیا ہے۔امریکی فٹبال ٹیم کے کوچ جورگن کلن مانس نے میڈیا سے گفتگو کرتے ہوئے کہا ہے کہ ملک بھر سے تربیتی سیشن میں 26کھلاڑیوں کو فٹبال ورلڈ کپ کے لیے بلایا گیا ہے، جس میںسے 23 کھلاڑیوں کومنتخب کرکے برازیل بھیجا جائے گا۔کوچ کہنا تھا کہ ان کی ٹیم ورلڈ کپ میں بہترین کارکردگی کا مظاہرہ کرکے ثابت کردے گی کہ ان کی ٹیم کا شمار دنیا کی بہترین ٹیموں میں ہوتا ہے۔

لاس ویگاس: امریکی ریاست نیویڈا میں نیو فارمولاون ریس کی تیاریاں اپنے اختتام کو پہنچ گئیں۔ دنیا بھر سے شامل ہونے والے ڈرائیورز کا جوش و خروش بھی قابل دید تھا۔ ایف آئی اے فار مولاون ای چیمپئن شپ سیریز کی باقاعدہ رونمائی کی گئی۔ اس موقع پر انجینئرز اور ڈرائیورز سمیت شائقین کی بڑی تعداد بھی شریک تھی۔ الیکٹرک کار ریس میں فار مولا ون کے مقبول اور سابق ڈرائیورز بھی اپنی صلاحیتوں کے جوہر دکھائیں گے۔ اس ریس میں دس ٹیموں کے بیس ڈرائیورز حصہ لے رہے ہیں۔ خصوصی ریس کے لیے مختلف شہروں میں فارمولا ون کی طرز کے انٹرنیشنل ٹریک بنائے گئے ہیں۔

بہاولپور: نویں چولستان جیپ ریلی 2014میں غیر ملکی ڈرائیوروں کو مدعو کرنے کا فیصلہ کرلیا گیا ۔ذرائع کے مطابق میگا ایونٹ کو بین الاقوامی سطح پر متعارف کرانے کا فیصلہ کیا گیا ہے ،اس ضمن میں نویں چولستان جیپ ریلی میں ملکی کھلاڑیوں کے ساتھ ساتھ غیر ملکی کھلاڑیوں کو مدعو کیا جارہا ہے ۔پنجاب ٹورازم کارپوریشن ذرائع کے مطابق اس حوالے سے مختلف ممالک کے کھلاڑیوں کو دعوت نامے بھیجے جارہے ہیں ۔بین الاقوامی کھلاڑیوں کی آمد سے اس سال چولستان جیپ ریلی میں سیکیورٹی کے فول پروف انتظامات عمل میں لائے جائیں گے ۔