سنتیاگو: عالمی نمبر ایک ٹینس اسٹار رافیل نڈال کو سربین اسٹار نوواک جوکووچ کے ہاتھوں نمائشی میچ میں شکست کر نا پڑا۔دونوں کھلاڑی چلی کے شہر سنتیاگو میں ایک نمائشی میچ میں شریک ہوئے ۔ دو ہفتے قبل اے ٹی پی ورلڈ ٹور فائنلز میں بھی نڈال کو جوکووچ کے ہاتھوں شکست کے بعد ٹائٹل سے ہاتھ دھونا پڑا تھا ۔ نمائشی میچ کا انعقاد ٹینس کے دو کھلاڑی نکولس میسو اور ڈیوڈ نیلبیڈین کے ریٹائرمنٹ کے موقع پر کیا گیا تھا ۔جوکووچ نے نڈال کو اسٹریٹ سیٹس میں 6-4,7-6(3)سے ہرایا ۔دونوں کھلاڑیوں کے درمیان دوسرا نمائشی میچ ارجنٹائن کے شہر بیونس آئرس میں اتوار کو ہوگا۔

ماسکو: روسی ٹینس اسٹار ماریا شراپووا نے انجری سے مکمل صحت یابی کے بعد آئندہ ماہ دسمبر میں شیڈول برسبین انٹرنیشنل سے ٹینس کورٹ میں واپسی کا فیصلہ کرلیا۔ایونٹ انتظامیہ نے بھی شراپووا کی شرکت کی تصدیق کردی ہے ۔رواں برس جون میں ومبلڈ ن ٹورنامنٹ کے دوران ماریا شراپووا انجری کا شکار ہوگئی تھیں جس کے باعث وہ یوایس اوپن سے دستبردار ہوگئیں اور سیزن کے آخری چیمپئن شپ ڈبلیو ٹی اے میں شرکت سے محروم رہیں ۔چار بار کی عالمی چیمپئن برسبین اوپن سے اپنے سیزن کا افتتاح کریں گی ۔

لاہور: پاکستان کرکٹ بورڈ کے چیئرمین نجم سیٹھی نے کرکٹ ٹیم کے ٹیسٹ اور ایک روزہ میچوں میں کپتان مصباح الحق کا دفاع کرتے ہوئے کہا ہے کہ وہ2015 کے ورلڈ کپ تک کپتان رہیں گے۔ابو ظہبی میں جنوبی افریقہ کے خلاف پاکستان ٹیم کی مایوس کن کارکردگی کے بعد مصباح الحق کو تنقید کا نشانہ بنایا جا رہا تھا لیکن نجم سیٹھی کی طرف سے اس بیان کے بعد ان پر دباو میں کمی ہوگی۔کئی سابق کھلاڑیوں اور کرکٹ ناقدین نے مصباح کی کپتانی پر اعتراضات کرنا شروع کر دیے تھے اور سابق کپتان رمیز راجہ نے مصباح کو ’سپائن لیس‘ یعنی ایک غیر جرات مند کپتان قرار دیا تھا۔بورڈ کی طرف سے جاری ہونے والے ایک بیان میں کہا گیا کہ چیئرمین کو کپتان پر مکمل اعتماد ہے اور وہ سنہ دو ہزار پندرہ تک پاکستان ٹیم کی کپتانی کرتے رہے گے۔پاکستان کی ٹیم زمبابوے کے خلاف بھی ٹیسٹ سیریز میں کامیابی حاصل نہیں کر پائی تھی جس کے بعد مصباح الحق کی کپتانی پر تنقید میں تیزی آئی تھی۔مصباح الحق رواں سال پاکستان میں سب سے زیادہ سکور کرنے والے کھلاڑی ہیں۔

بارسلونا:ارجنٹائن کے سپر اسٹار فٹ بالر لیونل میسی نے کرسٹیانو رونالڈو کی فیفا ورلڈ کپ میں شرکت پر انتہائی خوشی کا اظہار کیا ہے۔لیونل میسی کا کہنا تھا کہ جب پرتگال نے برازیل میں شیڈول فیفا ورلڈ کپ کے لئے کوالیفائی کیا تو انہیں انتہائی خوشی ہوئی کیونکہ وہ چاہتے ہیں کہ ورلڈ کپ میں بہترین ٹیموں کے درمیان مقابلہ ہو۔ ان کا کہنا تھا کہ کرسٹیانو رونالڈو ایک بہترین کھلاڑی ہیں اور ان کا اسکورنگ ریٹ بہت اعلٰی ہے۔واضح رہے لیونل میسی کو گزشتہ روز سب سے زیادہ گول کرنے پر یورپین لیگ کے ”گولڈن بوٹ ایوارڈ“ سے نوازاگیا تھا ۔26سالہ فٹبالر نے اپنی عمدہ پرفارمنس کی بدولت بارسلونا کے 2012-13سیزن میں اسپینش لیگ ٹائٹل کی فتح میں اہم کردار ادا کیا ۔میسی نے 46مرتبہ گیند کو جال کی راہ دکھائی ۔میسی اس سے قبل 2011-12کے سیزن میں ریکارڈ 50گول کرچکے ہیں ۔

لندن: انگلش ٹیم کے معروف بلے باز کیون پیٹرسن نے 2016 تک کرکٹ کھیلنے کی خواہش کا اظہار کر دیا۔انگلش ٹیم کے بیٹسمین کیون پیٹرسن ایشز سیریز کے پہلے میچ میں شرکت کر کے کیرئیر میں ٹیسٹ میچوں کی سنچری مکمل کریں گے۔ انہوں نے آسٹریلیا کے خلاف ہی جولائی 2005میں ٹیسٹ ڈیبیو کیا تھا۔ کیون پیٹرسن کچھ عرصے سے گھٹنے کی انجری میں مبتلا تھے جس کی وجہ سے ان کی ورلڈ کپ دو ہزار پندرہ میں شرکت مشکوک قرار دی جا رہی تھی تاہم انجری سے صحت یاب ہونے والے کیون پیٹرسن نے انٹرویو کے دوران بتایا کہ جب تک ان کی صحت نے ساتھ دیا وہ کرکٹ کھیلیں گے۔ انگلش بلے باز کیون پیٹرسن نے نو سالہ کرکٹ کیرئیر میں ننانوے ٹیسٹ، 136 ون ڈے اور 37 ٹی ٹوئنٹی انٹرنیشنل میچز میں شرکت کی۔

سوچی: خواتین کی سکیئنگ اولمپک چیمپئن لنڈسے وان ٹریننگ کے دوران زخمی ہو گئیں۔لنڈسے وان روس میں ہونے والے ونٹر اولمپکس کی تیاریوں میں حصہ لے رہی تھیں۔ وہ یو ایس سکی ٹیم کے ساتھ پریکٹس کے دوران گر کر زخمی ہوئیں۔ 29 سالہ اولمپک گولڈ میڈلسٹ اس سے پہلے بھی سکیئنگ مقابلوں کے دوران گر کر زخمی ہو گئیں تھیں۔ ڈاکٹرز کا کہنا ہے کہ انجری زیادہ ہونے کی صورت میں لنڈسے کی ونٹر اولمپکس میں شرکت خطرے میں پڑ سکتی ہے۔