کراچی(پی پی آئی) کراچی میں مبینہ پولیس مقابلے کے بعد ایک ملزم کو زخمی حالت میں گرفتار کر لیا جبکہ ایک فرار ہونے میں کامیاب ہو گیا۔پی پی آئی کے مطابق کراچی کے علاقے پریڈی میں 2 ڈاکو لوٹ مار میں مصروف تھے کہ اطلاع ملنے پر پولیس موقع پر پہنچ گئی، پولیس کو دیکھتے ہی ملزموں نے فائرنگ شروع کر دی، جوابی کارروائی کے دوران ایک ملزم گولیاں لگنے سے زخمی ہو گیا جسے حراست میں لے لیا گیا۔ایس ایس پی ساؤتھ عمران قریشی نے کہا ہے کہ اندھیرے کا فائدہ اٹھاتے ہوئے ایک ڈاکو موقع سے فرار ہو گیا، گرفتار ملزم نے گینگ کے ہمراہ کئی واردات کیں، چائنہ مال میں سونے کی دکان کا صفایا بھی کیا تھا، ملزم کے قبضے سے سونا بھی برآمد کر لیا ہے۔

پنوعاقل(پی پی آئی)پنوعاقل میں معو بھٹو باغ کے قریب پولیس اور ڈاکوؤں کے درمیان مبینہ پولیس مقابلے میں بین الصوبائی گینگ کا اہم خطرناک کارندہ ہلاک ہوگیا جبکہ مبینہ مقابلے میں چار ڈاکو فرارہونے میں کامیاب ہوگئے  ڈاکو سے اسلحہ بھی برآمد کیا گیا ہے۔پی پی آئی کے مطابق ایس ایس پی سکھرکا بتاناہے کہ ہلاک ڈاکو سندھ اور پنجاب میں 11 پولیس جوانوں کی شہادت میں ملوث تھا، سندھ پنجاب میں دہشت کی علامت سمجھے جانے والے گینگسٹر خطرناک ڈاکو جانو انڈھڑ اور چھوٹو مزاری گینگ کا اہم ترین کارندہ اور گینگ کا کمانڈر تھا۔ایس ایس پی سکھر کے مطابق ہلاک ڈاکو سندھ اور پنجاب کے مختلف علاقوں میں اغواء   برائے تاوان، دہشت گردی، پولیس حملوں، ہائی وے رابری، قتل، اقدام قتل، سرکاری املاک کے نقصان سمیت متعدد سنگین وارداتوں میں مطلوب تھا۔ایس ایس پی سکھرکا کہنا ہے کہ  ہلاک ڈاکو کی شناخت سانول عرف ساون سکھانی کے نام سے ہوئی ہے، ڈاکو کے قبضے سے کلاشنکوف میگزین اور گولیاں برآمد ہوئی ہیں۔ہلاک ڈاکو کے مزید کرمنل ریکارڈ کی معلومات تھانوں اور مختلف اضلاع سے حاصل کی جا رہی ہے۔

کراچی (پی پی آئی)کراچی کے مختلف علاقوں میں پولیس نے کارروائیاں کرتے ہوئے منشیات فروشوں سمیت 7 ملزمان کو گرفتار کر لیا ہے جبکہ فائرنگ کے واقعات میں بچے سمیت 3 افراد زخمی ہو گئے ہیں۔تفصیلات کے مطابق کراچی کے علاقے سچل ا سکیم 33 میں اینٹی وہیکل لفٹنگ سیل پولیس اور ملزمان کے درمیان مقابلہ ہوا، دو طرفہ فائرنگ تبادلے کے دوران 2 موٹر سائیکل لفٹرز کو زخمی حالت میں گرفتار کر کے ان کے قبضے سے اسلحہ اور چھینی گئی موٹر سائیکل برآمد کر لی گئی،پی پی آئی کے مطابق گرفتار ملزم راغب اور شاہ رخ موٹر سائیکل کی چوری اور چھیننے کی درجنوں وارداتوں میں ملوث ہیں۔ادھر سہراب گوٹھ الآصف سکوائر کے قریب مبینہ پولیس مقابلے کے دوران ایک زخمی سمیت 2 ملزمان کو گرفتار کر لیا گیا، ملزم آصف اور رفیع اللہ شہریوں سے لوٹ مار کر رہے تھے کہ اسی دوران پولیس موقع پر پہنچ گئی، ملزمان نے پولیس پارٹی پر فائرنگ کر دی، جوابی فائرنگ میں ملزم آصف زخمی حالت میں پکڑا گیا جبکہ اس کے فرار ہونے والے ساتھی رفیع اللہ کو تعاقب کے بعد گرفتار کیا گیا۔پی پی آئی کے مطابق ملیر میمن گوٹھ میں پولیس نے خفیہ اطلاع پر مسافر بس کے اندر کارروائی کرتے ہوئے دو منشیات فروشوں کو گرفتار کر لیا، ملزم فرمان اور بدر السلام کے سامان کی تلاشی کے دوران ڈیڑھ کلو کرسٹل منشیات برآمد ہوئی، منشیات کو بیگ کے خفیہ خانوں میں مہارت کے ساتھ چھپایا ہوا تھا۔پولیس کے مطابق ملزمان منشیات پشاور سے لاکر کراچی کے مختلف علاقوں میں سپلائی کرتے تھے جبکہ مومن آباد فقیر کالونی میں بھی کارروائی کے دوران ایک منشیات فروش کو دھر لیا گیا، ملزم نزاکت علی سے آدھا کلو سے زائد چرس برآمد کر لی گئی۔لانڈھی داؤد چورنگی کے قریب نامعلوم سمت سے آنے والی گولی لگنے سے 5 سالہ بچہ اویس زخمی ہوگیا جبکہ اورنگی ٹاؤن کے علاقے بلوچ گوٹھ اور اجتماع گاہ کے قریب الگ الگ ڈکیتی کی وارداتوں کے دوران مزاحمت پر آصف خان اور عبدالخالق نامی شہری زخمی ہو گئے جنہیں طبی امداد کیلئے ہسپتال منتقل کر دیا گیا، پولیس نے مقدمات درج کر کے ملزمان کے تلاش شروع کر دی ہے۔