بٹ گرام(پی پی آئی)خیبر پختونخوا کے ضلع بٹ گرام کے رہائشی غیر قانونی کنکشنز (کنڈا) اور بجلی کے نادہندگان کے خلاف جاری کارروائی کے خلاف سڑکوں پر نکل آئے۔پی پی آئی کے مطابق مظاہرین نے ابتدائی طور پر بٹ گرام کے مرکزی بازار میں مظاہرہ کیا اور ختم نبوت چوک کے قریب قراقرم ہائی وے کو بلاک کر دیا۔
کوئٹہ (پی پی آئی) لو برڈ سوسائٹی کے تحت صوبے کی تاریخ کا پہلا برڈ شو 17ستمبر کو کوئٹہ میں منعقدہوگا، کوئٹہ برڈ شو کا میں لاہور، فیصل آباد، کراچی، اسلام آباد، پشاور سے پرندوں کے شائقین شرکت کریں گے جو اس وقت ملک کے ٹاپ بریڈرز ہیں۔ پی پی آئی کے مطابق صوبے بھر سے بھی بڑی تعداد میں لوگ اپنے برڈز کے ساتھ شو میں حصہ لیں گے اور اپنے برڈز کو شو بینچ پر رکھیں گے ججز پینل میں محسن ظفر، وقاص احمد اور محمد عمر شامل ہیں اس موقع پر فیچر کے حساب سے خوبصورت ترین پرندوں کو انعامات دیئے جائیں گے۔
کراچی (پی پی آئی)پیپلز پارٹی کے شریک چیئرمین آصف علی زرداری نے چیئرمین بلاول بھٹوزرداری اورپارٹی رہنماؤں کو اتحادیوں اور مقتدرہ سے ٹکراؤ کی پالیسی سے روک دیا ہے۔پی پی آئی کے مطابق کے مطابق آصف زرداری نے چیئرمین پیپلزپارٹی بلاول بھٹو اور پارٹی ارکان کون لیگ اور دیگر اتحادیوں سمیت مقتدرہ کے حوالے سے ٹکراؤ کی پالیسی سے روک دیا جبکہ الیکشن میں مساوی مواقع کے لئے آصف زرداری نے اپنا کردار ادا کرنے کیلئے تمام اختیارات سنبھال لئے ہیں۔ذرائع کے مطابق آصف علی زرداری نے تمام ارکان کو ٹکراؤ کی سیاست سے اجتناب کی ہدایت کی اور کہا کہ اگر باہمی گفتگو سے تحفظات دور نہ ہوئے تو پھر پیپلزپارٹی اپنے مزاحمتی آپشن محفوظ رکھتی ہے۔
کراچی( پی پی آئی)قومی کرکٹ ٹیم کے سابق کپتان راشد لطیف نے دانش کنیریا کی بے گناہی سے متعلق دستاویزات جلد منظر عام پر لانے کا کا اعلان کردیا۔راشد لطیف نے دعویٰ کیا ہے کہ ایسکس کاﺅنٹی کے کوچ پال گریسن اور کھلاڑی ٹام ویسلے نے تحریری بیان میں اعتراف کیا ہے کہ دانش کنیریا نے انہیں کبھی میچ فکسنگ کی آفر نہیں کی۔راشد لطیف نے پال گریسن اور ٹام ویسلے کا تحریری بیان حاصل کرنے کا بھی دعویٰ کیا ہے۔ راشد لطیف کے مطابق انگلش کھلاڑیوں نے اپنے تحریری بیان میں کہا ہے کہ دانش کنیریا نے انہیں کبھی فکسنگ کی آفر نہیں کی۔ انہوں نے ہمیشہ ایسکس کاﺅنٹی کے لئے اپنی بہترین خدمات پیش کیں۔ راشد لطیف کا کہنا ہے کہ وہ دانش کنیریا کی بے گناہی سے متعلق جلد دستاویزات سامنے لائیں گے۔
لاہور( پی پی آئی)عالمی اسنوکر چیمپئن محمد آصف کوحکومت کی طرف سے اعلان کردہ انعامی رقوم اب تک نہ مل سکی ۔ صوبائی حکومتوں کی جانب سے کیے گئے وعدے دھرے کہ دھرے رہ گئے۔ عالمی چیمپئن محمد آصف نے بلغاریہ میں ورلڈ ایمچر اسنوکر چیمپئن بننے کا اعزاز حاصل کیا تھا۔اس موقع پر صوبائی حکومتوں نے بھاری کیش انعامات کے اعلانات کیے جس کے بعد خود محمد آصف بھی اپنے آپ کو مالا مال سمجھنے لگے۔ لیکن یہ سب خواب ہی رہ گیا۔ نہ انعامی رقم جاری کی گئی ہیں اور نہ ورلڈ چیمپئن کے حالات میں بہتری آئی۔ محمد آصف کا کہنا ہے کہ انکے ساتھ ناروا سلوک ہوا جس سے انھیں مایوسی ہوئی ہے۔ محمد آصف پی بی ایس اے کے سربراہ عالمگیر شیخ نے کہا کہ وہ مسلسل صوبائی حکومتوں سے رابطہ میں ہیں تاکہ انعامی رقم جلد جاری کی جاسکے۔ عالمگیر شیخ کا کہنا تھا کہ سالانہ آٹھ لاکھ روپے گرانٹ میں کھلاڑیوں کو تیار کرنا آسان نہیں ہے۔ مطالبات پورے نہ ہوئے تو دھرنے بھی دینگے لیکن ورلڈ چیمپئن کا بھرپور ساتھ دینگے۔
سنسناٹی ،اوہائیو( پی پی آئی)سپین کے رافیل نڈال نے سنسناٹی اوپن کا ٹائٹل اپنے نام کر لیا۔ ورلڈ نمبر ون سرینا ولیمز فائنل میں بیلا روس کی وکٹوریا آزرنیکا سے شکست کھا گئیں۔فائنل میں نڈال نے جان ازنر کو سٹریٹ سیٹس میں شکست دی۔ میچ کا سکور سات، چھ اور سات چھ رہا۔ نڈال اس سے پہلے کبھی سنسناٹی اوپن کے فائنل تک نہیں پہنچے تھے۔ خواتین کے مقابلے میں بیلا روس کی وکٹوریا آزرنیکا نے امریکہ کی سیرینا ولیمز کو دو چھ، چھ دو اور سات چھ سے شکست دے کر ٹائٹل اپنے نام کر لیا۔
لاہور( پی پی آئی)ایشیا کپ ہاکی ٹورنامنٹ میں گولڈ میڈل کی امیدیں لئے 18رکنی قومی ہاکی ٹیم ملائیشیا پہنچ گئی۔ تفصیلات کے مطابق علامہ اقبال انٹرنیشنل ائیرپورٹ لاہور سے ملائیشیا روانہ ہونے والوں میں سلمان اکبر، عمران بٹ، محمد عمران کپتان، وسیم احمد، محمد عرفان، رضوان جونیئر، محمد توثیق، راشد محمود، فرید احمد، عامر شہزاد، وقاص شریف، شفقت رسول، عبدالحسیم، شکیل عباسی، زبیر علی، علی شان، محمد دلیر اور عمر بھٹہ شامل ہیں۔ یاد رہے کہ نواں ایشیا کپ ہاکی ٹورنامنٹ 24 اگست سے یکم ستمبر تک ملائیشیا کے شہر ایپوہ میں کھیلا جانا ہے۔ ایونٹ میں آٹھ ممالک کی ٹیمیں حصہ لے رہی ہیں۔ ٹورنامنٹ کی فاتح ٹیم کو ورلڈ کپ کھیلنے کا اعزاز حاصل ہوگا۔ ایشیا کپ میں شریک ٹیموں کو دو گروپوں میں تقسیم کیا گیا ہے۔روانگی کے وقت کپتان محمد عمران کا کہنا تھاکہ ہمارے پاس غلطی کی کوئی گنجائش نہیں اس لئے ہم بھرپور تیاریوں کے ساتھ ملائیشیا جا رہے ہیں اور ایشیا کپ ٹائٹل اپنے نام کر کے ہی وطن واپس لوٹیں گے۔
لاہور( پی پی آئی)پاکستان کرکٹ ٹیم کے سابق کپتان وسیم اکرم نے کہا ہے کہ نوجوان کھلاڑی ہی پاکستان کرکٹ کا مستقبل ہیں، مجھے نئے باﺅلرز کی کوچنگ کر کے خوشی ہوگی۔ ایک گفتگو کے دوران وسیم اکرم نے کہا کہ پاکستان میں فاسٹ باﺅلرز کا قحط نہیں نئے باﺅلرز کو تلاش کرنے کا موثر طریقہ کار نہ ہونے کی وجہ سے باصلاحیت کھلاڑی ضائع ہو رہے ہیں۔ انہوں نے کہا کہ قومی ٹیم میں موجود تمام باﺅلر باصلاحیت ہیں لیکن ان کی کئی حوالے سے کوچنگ کی ضرورت ہے۔ وہاب ریاض ایک لڑاکا کرکٹر ہے مگر وہ عدم اعتماد کا شکار ہے۔
لاہور( پی پی آئی)ٹی 20 چیمپئنز لیگ میں فیصل آباد وولفز کی شرکت پر بھارتی بورڈ نے پاکستان کو واضح یقین دہانی کرانے سے انکار کر دیا۔ بھارتی بورڈ نے پی سی بی کو رواں ماہ کے آخر تک انتظار کرنے کا مشورہ دیا ہے۔ دوسری طرف پاکستان کرکٹ بورڈ نے صورتحال دیکھتے ہوئے ویزے کیلئے پاسپورٹ جمع کرانے کا ارادہ موخر کر دیا۔ ایونٹ کے میچز 17 ستمبر سے 6 اکتوبر تک بھارت میں ہونے ہیں۔ سرحدی کشیدگی نے دونوں ممالک کے مابین باہمی تعلقات بگاڑ دئیے ہیں جس کی وجہ سے پاکستانی ٹیم فیصل آباد وولفز کی ایونٹ میں شرکت غیر یقینی کا شکار ہوگئی ہے۔ ذرائع کے مطابق دو روز قبل پی سی بی نے بھارتی کرکٹ بورڈ سے رابطہ کیا تو اس نے واضح طور پر کہا کہ اس بارے میں ہماری حکومت ہی فیصلہ کرے گی۔ انہوں نے دیکھو اور انتظار کرو کی پالیسی اختیار کرنے کا مشورہ دیا ہے۔
