دبئی: رواں ماہ قطر اوپن ٹینس ویمنز سنگلز ٹائٹل اپنے نام کرنے والی رومانوی ٹینس اسٹار سیمونا ہالیپ فٹنس مسائل کے باعث دبئی اوپن ٹینس ٹورنامنٹ سے دستبردار ہو گئیں۔ دبئی میں جاری ایونٹ میں ویمنز سنگلز ایونٹ کے پہلے راﺅنڈ میں سیمونا ہالیپ کا مقابلہ فرانس کی علیزے کورنٹ سے تھا۔ پہلے سیٹ میں فرانسیسی کھلاڑی نے 6-1 سے فتح سمیٹی، دوسرے سیٹ کے دوران سیمونا انجری میں مبتلا ہو گئیں جس کے باعث وہ ریٹائرڈ ہرٹ ہو کر کورٹ سے باہر چلی گئیں اور علیزے نے اگلے راﺅنڈ میں جگہ بنا لی۔ سیمونا کے فزیو تھراپسٹ کا کہنا ہے کہ انہیں مکمل ٹھیک ہونے میں دس سے پندرہ دن لگ سکتے ہیں۔ واضح رہے کہ سیمونا نے 16 فروری کو قطر اوپن ٹینس ویمنز سنگلز ٹائٹل اپنے نام کیا تھا۔

لاہور: پاکستان ون ڈے ٹیم کے نائب کپتان محمد حفیظ نے کہا ہے کہ بنگلہ دیش میں سیکیورٹی کی صورت حال سے کھلاڑی پریشان نہیں، ایشین چیمپئن ہیں بھارت سمیت ہر ٹیم کو ہرائیں گے۔ایشیا کپ کے تربیتی کیمپ کے دوران میڈیا سے گفت گو کرتے ہوئے محمد حفیظ کا کہنا تھا کہ پاکستان ایشین چیمپئن کے اعزاز کا دفاع کرنے میں کامیاب ہوگا۔ محمد حفیظ کا کہنا تھا کہ پاکستانی ٹیم ہوم کراوڈ اور ہوم گراونڈ کے بغیر بھی اچھا پرفارم کررہی ہے۔انہوں نے مزید کہا کہ نئے کوچنگ اسٹاف سے فوری نتائج کی توقع کرنا زیادتی ہوگی، پاکستان کی ٹیم شائقین کھیل کی توقعات پر پورا اترے گی۔

لاہور: پی سی بی نے ٹی ٹوئنٹی ڈومیسٹک کرکٹ ٹورنامنٹ میں میچ فکسنگ الزامات کی تحقیقات کے لیے تین رکنی کمیٹی بنادی۔ راول پنڈی میں11فروری کوسیالکوٹ اور کراچی ڈولفنزکے درمیان کھیلے گئے میچ کو سابق ٹیسٹ کرکٹرباسط علی نے فکس قرا دیا تھا۔ الزام کو ابتدائ میں توپاکستان کرکٹ بورڈ کی انتظامیہ نے مسترد کردیا تھا لیکن اب اس حوالے سے تحقیقات کے لئے تین رکنی کمیٹی بناے کا فیصلہ کیا ہے۔ فیکٹس اینڈ فائنڈنگ کمیٹی جنرل منیجر کرکٹ آپریشن شفیق احمد کی سربراہی میں قائم کی گئی ہے دیگر ارکان میں سیکیورٹی اینڈ اینٹی کرپشن منیجرکرنل وسیم احمد اور کرکٹر علی نقوی شامل ہیں۔ کمیٹی اپنی رپورٹ ایک ہفتے میں چیف آپریٹنگ آفیسر سبحان احمد کوپیش کرے گی۔ تحقیقاتی کمیٹی کی رپورٹ کی روشنی میں مزید کارروائی کی جاسکے گی۔

کراچی: ٹاپ سیڈ حمزہ طارق نے محمد فہد کو دو کے مقابلے میں چار فریم سے ہراکرچھٹی قومی جونیئررینکنگ چیمپیئن شپ کے کوارٹر فائنل میں جگہ بنالی۔ کراچی میں کھیلے جانے والے پری کوارٹرفائنل میں سینئر کے قومی چیمپئن حمزہ طارق نے سندھ کے محمد فہد کو مات دی۔ پنجاب کے حمزہ کی جیت کا اسکور11-73،60-71، 24-81، 22-55، 129-73 رہا۔ خیبر پختون خوا ہ کے محمد رفیق نے بلوچستان کے محمد ابراہیم کو چار ایک سے آوٹ کلاس کیا۔ عامر طارق، ماجد علی، عبدالرھیم، حارث ندیم، نعمان اقبال اور محدم فہیم نے ابھی اپنے میچز جیت کرکوارٹر فائنل کے لیے کوالیفائی کیا۔

ویلنگٹن: جمی نیشم ڈیبیو ٹیسٹ میں سنچری اسکور کرنے والے نیوزی لینڈ کے تیسرے بلے باز بن گئے ۔ نیشم نے یہ کارنامہ بھارت کے خلاف دوسرے اور آخری ٹیسٹ میں سرانجام دیا ۔ 23سالہ بلے باز جمی نیشم نے 137رنز کی ناقابل شکست اننگز کھیلی جس میں 20چوکے شامل ہیں ۔ اس سے قبل کیوی کرکٹرز بروس ٹیلر اور اسکارٹ اسٹائرس یہ کارنامہ سرانجام دے چکے ہیں۔