کراچی(پی پی آئی)سندھ ہائیکورٹ نے پاکستان تحریک انصاف کے رہنما حلیم عادل شیخ کی عبوری ضمانت 7 دن کیلئے منظور کر لی ہے۔عبوری ضمانت کی منظوری کے بعد اپنے ایک بیان میں رہنما پی ٹی آئی حلیم عادل شیخ نے کہا کہ سندھ ہائیکورٹ کو پولیس نے گھیر رکھا ہے، میں باہر نہیں جا سکتا، اس دوران حلیم عادل شیخ ایک عدالت سے دوسری عدالت تک چکر لگات رہے۔نہوں نے کہا کہ چیف جسٹس کے پاس آیا ہوں تاکہ معلوم کر سکوں کہ ضمانت کے بعد بھی ہائیکورٹ کو کیوں گھیر لیا گیا ہے، پشاور ہائیکورٹ سے ضمانت ہوئی تو کسی نے گرفتار نہیں کیا لیکن سندھ ہائیکورٹ سے ضمانت کے بعد گرفتاری کیلئے پولیس موجود ہے۔

اسلام آباد(پی پی آئی) الیکشن کمیشن نے بلوچستان عوامی پارٹی کو کل مشاورت کے لئے مدعو کرلیا، بی اے پی نے ملاقات کیلئے وفد تشکیل دے دیا۔الیکشن کمیشن کی سیاسی جماعتوں سے مشاورت کا سلسلہ جاری ہے، بلوچستان عوامی پارٹی کو کل 2 بجے مشاورت کے لئے طلب کیا ہے، بلوچستان عوامی پارٹی سے عام انتخابات کے انعقاد بارے مشاورت ہوگی۔بلوچستان عوامی پارٹی نے الیکشن کمیشن سے مشاورت کے لئے وفد تشکیل دے دیا، وفد میں سینیٹر نصیب اللہ بازئی، منظور کاکڑ صالح بھوتانی، زبیدہ جلال شامل، بی اے پی وفد میں سردار عبدالرحمان کھتران، لالہ رشید اور عبدالکریم نوشیروانی کو بھی شامل کیا گیا، بی اے پی وفد الیکشن کمیشن کو انتخابات سے متعلق تحفظات سے آگاہ کرے گا۔یاد رہے الیکشن کمیشن نے انتخابات کے انعقاد کے بارے میں سیاسی جماعتوں کو مدعو کرنے کا سلسلہ جاری کر رکھا ہے۔

لاہور(پی پی آئی) مسلم لیگ ن کی سینئر نائب صدر اور چیف آرگنائزر مریم نواز شریف سے سیالکوٹ سے سابق اراکین پنجاب اسمبلی نے ملاقات کی۔ملاقات کرنے والوں میں ارشد جاوید وڑائچ، رانا عارف ہرناح، حافظ شاہد ندیم، طارق سبحانی، نوید اشرف، ذیشان رفیق، رانا عبدالستار، چودھری اکرام، رانا شوکت، رانا افضل، گلناز شجاعت، عبدالرحمٰن شامل تھے۔ملاقات میں پارٹی تنظیم سازی، سیاسی حکمت عملی پر تبادلہ خیال کیا گیا، مریم نواز شریف نے سابق اراکین اسمبلی کو خواتین ونگ اور یوتھ کی یونین کونسل تک ٹیم بنانے کا ٹاسک دے دیا۔

اٹک(پی پی آئی) اٹک جیل کے باہر مٹھائی اور ہار لے کر پہنچنے والے پی ٹی آئی کارکنان کو گرفتار کر لیاگیا۔چئیرمین پی ٹی آئی کی سزا معطل ہونے کی خوشی میں اٹک جیل پہنچنیوالے تحریک انصاف کے 9 کارکن گرفتار کیا گیا۔۔دوسری جانب بتایا گیاہے کہ توشہ خانہ کیس میں سزا پانے والے اسیر سابق وزیر اعظم و چیرمین پی ٹی آئی کی مشکلات میں اضافہ برقرار ہے۔اسلام آباد ہائیکورٹ نے چئیرمین پی ٹی آئی عمران خان کی توشہ خانہ کیس میں سزا معطلی کی درخواست منظور کر لی ہے تاہم عمران خان کی اٹک جیل سے رہائی آج ممکن نہیں۔
بتایا جا رہا ہے کہ عمران خان کی سائفر کیس میں گرفتاری ڈال دی گئی ہے۔ عمران خان 30 اگست تک سائفر کیس میں جوڈیشل ریمانڈ پر ہیں۔عدالت نے عمران خان کو 30 اگست کو پیش کرنے کا حکم دے رکھا ہے۔ایف آئی اے کی جانب سے عدالت سے کل جسمانی ریمانڈ کی استدعا کی جائے گی۔عمران خان سزا معطلی کے باوجود اٹک جیل میں ہی رہیں گے۔خیال رہے سائفر کنٹینٹ،آڈیو لیک و گمشدگی پر ایف آئی اے انسداد دہشت گردی ونگ میں عمران خان کے خلاف آفیشل سیکرٹ ایکٹ کے تحت مقدمہ درج ہے جس میں انہیں وفاقی تحقیقاتی ایجنسی نے شامل تفتیش کرتے ہوئے گرفتار کرلیا ہے۔