سڈنی: پاکستانی نژاد آسٹریلوی کرکٹر فواداحمد کو” مسلم اسپورٹس مین آف دی ائیر“کے ایوارڈ سے نوازا گیا ۔ مشن ہوپ نامی تنظیم کی جانب سے سڈنی کے شہر میں تقسیم ایوارڈ کی تقریب کا انعقاد کیا گیا۔مذکورہ تنظیم ہر سال مسلم کمیونٹی کی جانب سے آسٹریلیا کے لئے بہترین کارکردگی دکھانے والی شخصیات کو ایوارڈ سے نوازتی ہے ۔ فواد احمد نے آسٹریلیا کرکٹ ٹیم میں شمولیت کرکے ایک روزہ اور ٹی 20فارمیٹ کے میچوں میں حصہ لیا ہے ۔ فواد احمد نے تین ایک روزہ میچوں میں تین وکٹیں جبکہ دو ٹی 20میچوں میں بھی تین وکٹیں حاصل کی ہیں ۔

رحیم یار خان : 20ویںسالانہ آل پاکستان سونا کپ ہاکی ٹورنامنٹ کا آغاز چھ دسمبر سے رحیم یار خان میں ہوگا ۔ سالانہ ٹورنامنٹ میں ملک بھر سے 15ٹیمیں حصہ لیں گی ۔ ان ٹیموں میں پی اے ایف ،واپڈا ،گوجرہ ،خیبر پختونخواہ ،پولیس ،رحیم یار خان ،اسٹیل مل ،بہاولپور،وہاڑی ،اوکاڑہ ،حیدرآباد اور پی ٹی وی کی ٹیمیں شامل ہیں ۔ چیمپئن شپ کا فائنل مقابلہ 13دسمبر کو صادق آباد میںکھیلا جائے گا ۔ایونٹ کے آرگنائزنگ سیکریٹری عبدالستار سندھو کے مطابق افتتاحی تقریب میں قومی اسمبلی کی اسٹینڈنگ کمیٹی برائے واپڈا کے چیئرمین سردار محمد ارشد خان مہمان خصوصی ہوں گے ۔

نئی دہلی: بھارت میں ہونے والے جونیئر ہاکی ورلڈ کپ میں شرکت کے لیے بھارتی ہائی کمیشن نے پاکستانی کھلاڑیوں کو ویزے جاری کر دیئے۔جونیئر ہاکی ورلڈ کپ میں شرکت کے لیے بھارتی ہائی کمیشن کی جانب سے قومی جونیئر ہاکی ٹیم کو ویزے جاری کر دیئے گئے ہیں۔میگا ایونٹ میں شرکت کے لیے 18 رکنی وفد دو دسمبر کو واہگہ بارڈر کے راستے بھارت روانہ ہو گا،ٹورنامنٹ کا باقاعدہ آغاز چھ دسمبر سے بھارت میں ہو گا۔