ؒؒاسلام آباد(پی پی آئی) مہنگائی سے سب سے زیادہ متاثر ہونے والے ممالک میں پاکستان 18 ویں نمبر پر پہنچ گیا۔ تفصیلات کے مطابق ٹریڈنگ اکنامکس کی جانب سے مہنگائی سے متاثر ہونے والے ممالک کی لسٹ جاری کی گئی ہے، لسٹ کے مطابق پاکستان سب سے زیادہ متاثر ہونے والے ممالک میں اٹھارویں نمبر پر ہے،اعداد و شمار کے مطابق پاکستان نائیجیریا اور لاؤس کو پیچھے چھوڑ کر مہنگائی سے سب سے زیادہ متاثرہ ممالک میں 18 ویں نمبر پر آگیا ہے۔ دوسری جانب ملک میں خوردنی تیل کی درآمدات میں ماہانہ بنیاد پر کمی ریکارڈ کی گئی،پام آئل 5.40فیصد اورسویابین آئل کی درآمدات میں6.82فیصد کی کمی ہوگئی، پاکستان بیورو برائے شماریات کی جانب سے جاری کردہ اعدادوشمار کیمطابق جولائی میں پام آئل کی درآمدات میں 5.40فیصد اورسویابین آئل کی درآمدات میں6.82فیصد کی کمی ریکارڈ کی گئی،اعدادوشمار کے مطابق جولائی 2023 میں 12575 میٹرک ٹن سویا بین آئل درآمد کیا گیا جس پر 14.595 ملین ڈالر کا زرمبادلہ صرف ہوا۔ گزشتہ سال جولائی میں 11000میٹرک ٹن سویا بین آئل درآمد کیاگیا تھا جس پر 15.809 ملین ڈالر کا زرمبادلہ صرف ہوا تھا۔ اسی طرح جولائی میں 277801 میٹرک ٹن پام آئل کی درآمد ریکارڈکی گئیں جس پر 278.93 ملین ڈالر کا زرمبادلہ صرف ہوا،گزشتہ سال جولائی میں 194081 میٹرک ٹن پام آئل درآمد کیاگیا جس پر 299.39 ملین ڈالر کا زرمبادلہ صرف ہوا تھا۔ واضح رہے کہ مالی سال کے پہلے مہینہ میں اشیائے خوراک کی درآمدات میں سالانہ بنیادوں پر 18.13 فیصد کی نمایاں کمی ریکارڈ کی گئی ہے۔

ؒؒاسلام آباد(پی پی آئی) نگران وزیر خزانہ ڈاکٹر شمشاد اختر نے کہاہے کہ آئی ایم ایف معاہدوں میں مزید سبسڈیز دینے کی گنجائش نہیں۔کمیٹی اجلاس کے بعد میڈیا سے بات چیت کرتے ہوئے نگران وزیر خزانہ ڈاکٹر شمشاد اختر نے کہا کہ نگران حکومت کو ملک کے غریب عوام کا بھرپور احساس ہے، نگران حکومت غریب طبقے کو مزید مشکلات سے دو چار نہیں کر سکتی۔شمشاد اختر نے کہا کہ آئی ایم ایف سے معاہدے گزشتہ حکومتوں نے کیے، آئی ایم ایف کے معاہدوں میں سبسڈیز دینا پہلے سے طے شدہ ہے، معاہدوں میں مزید سبسڈیز دینے کی گنجائش نہیں۔نگران وزیر خانہ نے کہا کہ نگران حکومت معیشت کے استحکام کیلئے منصوبہ بندی کر رہی ہے، معیشت کی بہتری کیلئے مربوط حکمت عملی پر کام کر رہے ہیں۔انہوں نے کہا کہ معاشی استحکام کے لیے ایسے اقدامات کریں گے جن سے ڈالر کے مقابلے میں روپیہ کا ریٹ مستحکم ہو۔

لاہور(پی پی آئی) پاکستان مسلم لیگ(ن) کے سینئر رہنما و سابق وفاقی وزیر میاں جاوید لطیف نے کہا ہے کہ محمدنواز شریف نے ملک سے بدامنی ختم کی اور 2013میں آکر ملک میں بجلی پیدا کی،مہنگائی اور بجلی کی قیمتوں کا ملبہ صرف مسلم لیگ (ن) پر ہی نہیں ڈالا جاسکتا’ اس وقت ملک بھر میں جو بجلی کے بلوں کا رونا رویا جا رہا ہے ‘مہنگائی کا سیلاب عوام کو کھا رہا ہے جب تک ان سب عوامل کے پیچھے سازش کو بے نقاب نہیں کیا جائے گا معاملات ٹھیک نہیں ہونگے۔وہ بدھ کے روز لاہور پریس کلب میں ایک پریس کانفرنس سے خطاب کر رہے تھے۔ میاں جاوید لطیف نے کہا کہ16 ماہ کی حکومت نے ملکی مسائل حل کرنے کی بھر پور کوشش کی، پونے چار سال جنہوں نے حکومت کی ان کا قصور بھی توقوم کے سامنے لائیں،جنہوں نے پاکستان میں سول نافرمانی کی سازش کی ان تک پہنچنا ہوگا۔جاوید لطیف نے کہا کہ پونے چار سال حکومت کرنے والوں نے اداروں سے جو معاہدے کئے عوام کو اس کے بارے میں بھی علم ہونا چاہئے،کن سے آئی پی پیز کے معاہدے کئے گئے اور ڈالروں میں جو ادائیگی کی گئی اس کو بھی سامنے لایا جائے۔انہوں نے کہا کہ عمران خان کی حکومت کا جب خاتمہ ہوا تو گردشی قرضوں کا حجم 25سو ارب روپے تھا جسے قوم کسی طور پر معاف کرنے کو تیار نہیں،2007سے 2013 تک بجلی دیکھنے کو نہیں ملتی تھی،ملک میں دہشتگردی تھی اور دس سے بیس لوگ اکٹھے نہیں ہوسکتے تھے جبکہ نواز شریف نے 2013 میں آکر سستی اور وافر بجلی پیدا کی،دہشتگردی ختم کی جس کی پوری قوم گواہ ہے۔انہوں نے کہا کہ ملک میں سازشیوں کو توڑے بغیر مسائل ٹھیک نہیں ہونگے۔جاوید لطیف نے کہا کہ نواز شریف پاکستان آئیں گے اور الیکشن مہم چلائیں گے، کسی کے جیل میں جانے یا آنے سے (ن) لیگ کو کوئی فرق نہیں پڑتا۔

میانوالی(پی پی آئی) میانوالی میں باپ کی فائرنگ سے زخمی ڈاکٹر سدرہ نیازی انتقال کر گئیں۔میڈیا رپورٹس کے مطابق ڈاکٹر سدرہ نیازی کو اپنے ہی باپ نے دس روز قبل فائرنگ کرکے زخمی کر دیا تھا۔پولیس کے مطابق ڈاکٹر سدرہ نیازی مزید پڑھائی کے لیے ہاسٹل میں شفٹ ہونا چاہتی تھی جب کہ والد بیٹی کے ہاسٹل میں منتقل ہونے کے خلاف تھے۔باپ کی فائرنگ سے ڈاکٹر سدرہ نیازی شدید زخمی ہو گئی تھی۔20 اگست کو زخمی لیڈی ڈاکٹر کو میانوالی سے راولپنڈی منتقل کیا گیا تھا جہاں وہ 9 روز انتہائی نگہداشت وارڈ میں زیر علاج تھیں۔اسپتال انتظامیہ کے مطابق ڈاکٹر سدرہ نیازی کو تشویشناک حالت میں اسپتال لایا گیا تھا۔کئی روز زندگی اور موت کی کشمکش میں رہنے کے بعد آج وہ انتقال کر گئیں۔ڈاکٹر سدرہ نیازی کیبھائی کی مدعیت میں والد کے خلاف مقدمہ درج ہے تاہم ملزم کو اب تک گرفتار نہیں کیا جا سکا۔اہلخانہ کے مطابق قانونی کارروائی مکمل ہونے کے بعد ڈاکٹر سدرہ نیازی کی نمازِ جنازہ و تدفین میانوالی میں کی جائے گی۔دوسری جانب جاتلی پولیس نے کارروائی کرتے ہوئی3 ہفتے قبل غیرت کے نام پر اپنی 2 بہنوں کو قتل کرنے والے ملزم کوگرفتارکرلیا۔ تفصیلات کے مطابق ایس پی صدر کی زیرنگرانی جاتلی پولیس نے کارروائی کرتے ہوئی3ہفتے قبل غیر ت کے نام پر اپنی 2بہنوں کو قتل کرنے والے ملزم رضوان کو گرفتارکرلیا،ملزم رضوان اپنی بہن سعدیہ اور نازیہ کو فائرنگ کر کے قتل کرنے کے بعد فرار ہو گیا تھا،ملزم رضوان اپنی بہنوں پر شک کرتا تھا،واقعہ کا مقتولین کے والد کی مدعیت میں تھانہ جاتلی میں درج کیاگیا تھا۔ایس پی صدر محمد نبیل کھوکھر نے کہاکہ گرفتار ملزم کو ٹھوس شواہد کے ساتھ چالان کر کے قرار واقعی سزا دلوائی جائے گی،سنگین مقدمات میں ملوث ملزمان کی گرفتاری کے لیے تمام وسائل بروے کار لائے جا رہے ہیں۔