پرتھ: ایشز سیریز کے تیسرے ٹیسٹ میچ میں آسٹریلیا نے 150 رنز سے کامیابی حاصل کر کے سیریز میں تین صفر کی فیصلہ کن برتری حاصل کر لی۔کینگروز کو چھ سال بعد ایشز سیریز اپنے نام کرنے کا اعزاز حاصل ہو گیا۔پرتھ میں ہونیوالے سیریز کے تیسرے ٹیسٹ میچ میں انگلش ٹیم نے پانچ وکٹ 251 رنز کے ساتھ آخری روز کا کھیل شروع کیا۔بین سٹوکس نے ذمہ دارانہ سنچری سکور کی لیکن بدقسمتی سے ان کے 120 رنز بھی ٹیم کو فتح نہ دلا سکے اور پوری ٹیم 353 رنز پر آوٹ ہو گئی۔میزبان ٹیم نے دوسری اننگز 369 رنز پر ڈیکلئیر کر کے مہمان انگلش ٹیم کو 504 رنز کا پہاڑ ہدف دیا تھا۔ڈیوڈ وارنر اور شین واٹسن نے شاندار سنچریاں سکور کیں۔ڈیوڈ وارنر 112 اور شین واٹسن 103 رنز کے ساتھ ٹاپ سکورر رہے،سیریز کا چوتھا ٹیسٹ میچ26 دسمبر کو میلبورن میں شروع ہو گا۔

جوہانسبرگ: جنوبی افریقہ کے سینئر آل راﺅنڈر جیک کیلس پر ناقص پرفارمنس کی وجہ سے دباﺅ بڑھ گیا۔ ان کی گذشتہ 9 ٹیسٹ اننگز میں اوسط فقط 17.77 رہی جس کی وجہ سے ٹیم میں جگہ بھی خطرے میں دکھائی دینے لگی ہے، بھارت کے خلاف پہلے ٹیسٹ میں کیلس کو اس بڑھتے ہوئے دباﺅ سے نجات کیلئے بڑی اننگز درکار ہوگی، 38 سالہ کرکٹر نے گذشتہ 9 اننگز میں صرف 160 رنز بنائے جس میں 2 نصف سنچریاں شامل ہیں۔ آخری نصف سنچری انھوں نے پاکستان کے خلاف رواں برس فروری میں جوہانسبرگ میں بنائی تھی، اس کے بعد ان کا ٹیسٹ میں اسکور 7، 2، 21، 5، 0 اور7 رہا۔ جیک کیلس نے آخری سنچری گذشتہ برس نومبر میں برسبین میں بنائی تھی۔

کراچی: دبئی میں ہونے والی ورلڈ یوتھ اسکریبل چیمپئن شپ کا ٹائٹل جیتنے والے پاکستان کے معیز اللہ بیگ ٹیم کے ہمراہ وطن واپس پہنچ گئے ۔ورلڈ یوتھ اسکریبل چیمپئن شپ میں 17 ممالک کے136 کھلاڑیوں نے شرکت کی۔ پاکستان کے معیز اللہ نے چوبیس میں سے انیس مقابلے جیتے اور امریکا کے ٹم برائنٹ کو شکست دیکر ٹائٹل جیتنے کا اعزاز حاصل کیا۔پاکستانی ٹیم میں شامل جویریہ مرزا نے ایونٹ میں دوسری پوزیشن حاصل کی۔ ٹیم کا کراچی ائیر پورٹ پر شاندار استقبال کیا گیا۔

لاہور: پنجاب اوپن ٹینس چیمپئن شپ لاہور میں اختتام پذیر ہوگئی۔پنجاب ٹینس ایسوسی ایشن نے پاکستان ٹینس فیڈریشن کے صدر کلیم امام پر عدم اعتماد کا اظہار کرتے ہوئے کہا کہ فیڈریشن کھیل کیلئے کچھ کرنے کے بجائے ہاتھ پر ہاتھ دھرے بیٹھی ہے۔باغ جناح لاہور میں ٹینس چیمپئن شپ کے مینز سنگل کے فائنل میں ایم عابد نے حریف عثمان رفیق کو چھ ایک اور چھ تین سے ہرا کر ٹائٹل اپنے نام کیا،انڈر فورٹین میں حمزہ بن ریحان،انڈر فورٹین میں ایم مزمل اور انڈر ایٹین میں ایم مدثر فاتح رہے۔ کھلاڑیوں کا کہنا تھا کہ انہیں سہولتیں اور ایونٹس زیادہ فراہم کئے جائیں تو وہ اعصام الحق اور عقیل خان کی جگہ لے سکتے ہیں۔ پنجا ب ٹینس ایسوسی ایشن کے صدر افتخار احمد راو کا کہنا تھا کہ ٹینس فیڈریشن کے صدر کلیم امام کی وجہ سے کھیل تباہی کے دھانے پر پہنچ چکا ہے کیونکہ وہ زیادہ تر بیرون ملک ہی رہتے ہیں اور ان کی توجہ صرف انڈر14 ایونٹ تک محدود ہے۔راو افتخار کے مطابق فیڈریشن نے ویتنام کے خلاف ڈیوس کپ ٹائی کی تاریخیں تبدیل کرادی ہیں جس سے ہالینڈ میں ایونٹ کھیلنے کی وجہ سے اعصام الحق کی ٹائی میں پاکستان کی نمائندگی مشکوک ہے۔