ممبئی: بھارتی کرکٹ ٹیم کے کپتان مہندرا سنگھ دھونی نے ایک روزہ کرکٹ میں بطور کپتان سب سے زیادہ مرتبہ ناقابل شکست رہنے کا عالمی ریکارڈ قائم کردیا ۔ویسٹ انڈیز کے خلاف ون ڈے سیریز کے دوسرے میچ میں دھونی نے 60رنز کی ناقابل شکست اننگز کھیلی ،جس کے بعد وہ ایک روزہ کرکٹ میں 23مرتبہ بطور کپتان ناٹ آﺅٹ رہنے والے کھلاڑی بن گئے ۔ دھونی نے سابق سری لنکن کپتان ارجنا رانا ٹنگا کا 22مرتبہ ناٹ آﺅٹ رہنے کا ریکارڈ توڑدیا ۔سابق آسٹریلوی کپتان رکی پونٹنگ 16،بھارت کے اظہر الدین 15، اسٹیفن فلیمنگ اور ایلن بارڈر 14،14اور مرتبہ بطور کپتان ون کرکٹ میں ناقابل شکست رہنے کا ریکارڈ قائم کرچکے ہیں ۔

لاہور: دولت مشترکہ کراٹے چیمپئن شپ جیت کر پوری دنیا میں پاکستان کا نام روشن کرنے والے ایتھلیٹ سعدی عباس نے حکومتی عدم دلچسپی کے باعث ملک چھوڑنے پر غور شروع کردیا ۔سعدی عباس نے حال ہی میں کینیڈا کے شہرمانٹریال میں 67کلو گرام مقابلے میں طلائی کا تمغہ جیتا تھا جبکہ وہ دولت مشترکہ کے مقابلوں میں مارشل آرٹس میں یہ کارنامہ سرانجام دینے والے پہلے جنوبی ایشیائی کھلاڑی ہیں ۔سعدی عباس کو آئندہ ماہ دبئی میں ہونے والے ایشیائی کراٹے چیمپئن چپ میں اعزاز کا دفاع کرنا ہے لیکن ملک میں اسپورٹس منتظمین کی عدم دلچسپی نے ان کے جذبات کو سرد کردیا ہے ۔ سعدی عباس نے پہلی مرتبہ دوحہ ایشین گیمز 2006میں پاکستان کی نمائندگی کی تھی جبکہ وہ عالمی مقابلوں میں درجن کے قریب طلائی تمغے جیت چکے ہیں ۔

روساریو: ارجنٹائن فٹ بال چیمپئن شپ میں نیو ویلز اولڈ بوائز اور آرسنل کے درمیان میچ سنسنی خیز مقابلے کے بعد ایک ایک گول سے برابر ہو گیا۔ارجنٹائن کے شہر روساریو میں ہونیوالے فٹ بال میچ میں دونوں ٹیموں کے درمیان دلچسپ مقابلہ ہوا،کھیل کے پینتیسویں منٹ میں اولڈ بوائز کی جانب سے لوکاس نے گول سکور کر کے ٹیم کو ایک صفر کی برتری دلائی۔ دوسرے ہاف میں آرسنل کے سٹرائیکر نیکولس نے شاندار کک لگا کر گیند جال میں پھینکی اور حساب برابر کیا جو میچ کے آخر تک برقرار رہا۔میچ برابر ہونے کے بعد پوائنٹس ٹیبل پر اولڈ بوائز کی ٹیم ٹاپ سے دوسرے نمبر پر پہنچ گئی،سان لورینزو نے ایک پوائنٹ کی برتری کے ساتھ پہلی پوزیشن پر قبضہ جما لیا۔

ممبئی: جنوبی افریقہ کے خلاف ٹیسٹ اور ون ڈے سیریز کے لیے بھارتی ٹیم کا اعلان کر دیا گیا۔ بی سی سی آئی کی جانب سے جنوبی افریقہ کے خلاف سیریز کے لیے 17 رکنی بھارتی اسکواڈ کا اعلان کر دیا گیا ہے۔ٹیسٹ اور ون ڈے سیریز کے لیے ٹیم کی قیادت مہندرا سنگھ دھونی کو سونپی گئی ہے۔فاسٹ باولر ظہیر خان کو ٹیم میں شامل کر لیا گیا۔جنوبی افریقہ کے خلاف ڈیبیو کریں گے جبکہ سینئر بیٹسمین گوتھم گھمبیر کو سکواڈ سے ڈراپ کر دیا گیا ہے۔ بھارت اور جنوبی افریقہ کے درمیان تین ایک روزہ اور 2 ٹیسٹ میچ شیڈول ہیں،سیریز کا افتتاحی میچ 5 دسمبر کو جوہانسبرگ میں کھیلا جائے گا۔

ہیمبرگ: جرمن فٹ بال لیگ میں بائرن میونخ کی ٹیم نے بروشیا ڈورٹمنڈ کو تین صفر سے ٹھکانے لگا کر اپنی ٹاپ پوزیشن مستحکم بنا لی۔لیور کیوسن کی ٹیم نے ہرتھا برلن کو صفر کے مقابلے میں ایک گول سے زیر کیا،دوسری جانب ڈچ فٹ بال چیمپئن شپ میں آئی ایکس کی ٹیم نے بھی ہیراکلس کو تین صفر سے آوٹ کلاس کر کے اپنی ٹاپ پوزیشن بچا لی۔ادھر یورپین فٹ بال کلبوں نے آٹھ سال کے کلو ڈیو کو سٹار فٹ بالر بنانے پر نظریں جما لیں،ارجنٹائن کے کلب نے کم سن سٹار فٹ بالر سنو میسی کے نام سے مقبول کلاڈیو کے ساتھ معاہدہ کر لیا۔

لاہور: پی سی بی انٹر ڈیپارٹمنٹل ٹی 20 کر کٹ ٹورنامنٹ کا 27 نومبر سے لاہور میں آغاز ہوگا۔ٹورنامنٹ کے میچ قدافی اسٹیڈیم اور ایل سی سی اے میں ہوں گے،ایونٹ میں ملک بھر سے 11 ٹیمیں حصہ لے رہی ہیں ،جن کو 2 گروپوں میں تقسیم کیا گیا ہے۔چیف آپریٹنگ آفیسر کا کہنا تھا کہ شائقین کو اچھے مقابلے دیکھنے کو ملیں گے۔