کراچی: رمضان کی آمد سے قبل ہی دالوں کی قیمت میں 10روپے فی کلو تک اضافہ کردیاگیا۔عالمی مارکیٹ میں روپے کی قدرمستحکم ہونے سے درآمدی دالوں کی ہول سیل سطح پر تو قیمتیں کم ہوئی ہیں لیکن ریٹیل سطح پر دالوں کی فی کلو قیمت میں 10 روپے تک کا اضافہ کردیا گیا ہے۔رمضان المبارک کی آمد سے قبل ہی اشیا کی قیمتوں میں اضافہ شروع ہوگیا ہے۔ مارکیٹ ذرائع کے مطابق عالمی مارکیٹ میں دالوں کی قیمتوں میں کمی اور روپے کی قدر مستحکم ہونے کے باوجود مقامی رٹیل مارکیٹوں میں دالوں کی قیمتوں میں کمی نہیں کی گئی۔ رمضان سے قبل ہی منافع خوروں نے مصنوعی قلت کو جواز بناتے ہوئے مختلف دالوں کی قیمتوں میں اضافہ کردیا ہے، مونگ کی دال 10 روپے اضافہ سے 165 روپے کلو کردی گئی،ماش کی دال 8 روپے اضافے سے 128 روپے کلو ہو گئی ہے ،اس کے علاوہ مسور کی دال 5 روپے مہنگی ہوکر 105 روپے کلو جبکہ چنے کی دال 4 روپے اضافہ سے 70 روپے کلو ہوگئی جس کے سبب عوام کیلئے دال روٹی کا حصول بھی مشکل ہو گیا ہے۔

کراچی: پاکستان میڈیکل ایسو سی ایشن کے زیر اہتمام کراچی میںڈاکٹروں کے قتل اور ان کو دی جانے والی دھمکیوں کے سلسلے میں ایک اہم اجلاس پی ایم اے کراچی میں منعقد ہوا جس میں سیکریٹر ی صحت سندھ اقبال درانی ، اسپشل سیکریٹریز صحت سید منصور عباس ، ڈاکٹر سریش کمار، ڈی آئی جی پولیس اے ڈی سلطان خواجہ ، رینجرز کے نمائندے بریگیڈیئر عبدالباسط ، کرنل الیاس اور پاکستان میڈیکل ایسوسی ایشن کے مرکزی سیکریٹری جنرل ڈاکٹر مرزا علی اظہر، ڈاکٹر ایس ایم قیصر سجاد ، کراچی کے جنرل سیکریٹری ڈاکٹر قاضی ایم واثق اور دیگر عہدیداران نے شرکت کی۔ اجلاس میں ڈاکٹر منظور میمن کی شہادت پر افسوس اور دکھ کا اظہار کیا گیااور ان کے ایصال ثواب کے لئے فاتحہ خوانی کی گئی ۔ اس موقع پر سیکریٹر ی ہیلتھ اقبال درانی نے اعلان کیا کہ مرحوم کے ورثاءکو 50لاکھ معاوضہ دیا جائے گا ۔اور ان کے بیٹے کو سرکاری میڈیکل کالج میں داخلہ دیا جائے گا یا ان کے تعلیمی اخراجات حکومت سندھ برداشت کرے گی۔ اور ان کے دوسرے بیٹے کو سرکاری ملازمت دی جائے گی ۔ اس موقع پر ڈی آئی جی پولیس سندھ سلطان خواجہ نے کہا کہ تمام ایم ایل اوز کو جناح ہسپتال ، عباسی شہید ہسپتال ، سول ہسپتال اور دیگر سینٹر میں پک اینڈ ڈراپ سروس دی جائے گی ساتھ ہی پولیس گارڈ فراہم کیا جائے گا۔ ڈی آئی جی نے مزید کہا کہ ڈاکٹروں کو اسلحہ کے حصول میں ہماری بھرپور مدد ہو گی۔ جبکہ رینجرز کے برگیڈیئر عبدالباسط نے کہا کہ ڈاکٹروں کو اسلحہ چلانے کی تربیت دی جائے گی۔ میڈیکو لیگل ڈائریکٹوریٹ اور دیگر مسائل، ہیلتھ بل کمیشن کے حوالے سے آئندہ اجلاس پیر 19مئی کو سیکریٹری ہیلتھ کے ساتھ سندھ سیکریٹریٹ میں منعقد ہو گا۔ اجلاس کے بعد تمام شرکانے دہشت گردوں کے ہاتھوں شہید ہونے والے ڈاکٹر منظور میمن کے گھر جا کر ان کے ورثاءسے تعزیت کی اور اپنے مکمل تعاون کی یقین دہانی کرائی۔

میرپورخاص: میرپورخاص ضلع میں بڑھتی ہوئی بد امنی لاقانونیت اور شہروں میں غلاظت کے ڈھیروں اور گندے پانی کے جوہڑ قائم ہونے اور انتظامیہ کی بے حسی کی ڈی جی جی گروپ نے شدید مذمت کرتے ہوئے مطالبہ کیا ہے کہ ضلع بھر کے عوام کو بنیادی حقوق فراہم کئے جائیں۔ فیئر اینڈ فری الیکشن نیٹ ورک کے تحت قائم ہونے والے ڈسٹرکٹ گورنرز گروپ کا ماہانہ اجلاس کنوینر مقصود احمد آرائیں کی صدارت میں ہوا جس میں انجم شہزادی ،تاج بلوچ ،امداد سراج اور دیگر ممبران نے شرکت کی ،اجلاس میں ضلع بھر میں بڑھتی ہوئی بد امنی لاقانونیت اور جرائم کی وارداتوں سمیت شہری علاقوں میں صفائی ستھرائی کے شدید فقدان کی شدید مذمت کرتے ہوئے کہا گیا کہ ضلع بھر میں امن و امان کی صورتحال خراب ہو چکی ہے ،لوٹ مار کرنے والوں کو پولیس گرفتار کرنے میں ناکام ہے ،جبکہ بلدیاتی ادارے شہریوں کو بنیادی سہولیات فراہم کرنے میں ناکام ہیں ،اس موقع پر امن و امان کی بحالی صفائی ستھرائی کا نظام بہتر کرنے اور دیگر مسائل کے حل کے لیے افسران سے ملاقات کے لیے کمیٹیاں تشکیل دی گئیں اور مطالبہ کیا گیا کہ عوام کو تحفظ کے ساتھ ساتھ صاف ستھرا ماحول فراہم کیا جائے اور بلدیاتی انتخابات جلد از جلد کرائے جائیں ۔

میرپورخاص: میرپورخاص کے رہائشی کی جانب سے محکمہ ریونینو کے افسران پر رشوت کے عوض غریب کسانوں کی 6 ایکڑ زرعی زمین کے کھاتے با اثر شخص کے نام منتقل کر نے دوبارہ کھاتے تبدیل کرنے پر 4 لاکھ روپے رشوت مانگنے کا الزام لگادیا۔ تفصیلات کے مطابق دیہہ 136 جھڑبی تعلقہ سندھڑ ی کے رہائشی مسمات رخسانہ ،مسمات جانزادی ،مسمات زبیدہ ،محمد عاشق ،محمد ہاشن ،مسمات باگ بھری نے میرپورخاص پریس کلب میں پریس کانفرنس کرتے ہوئے بتایا کہ دیہہ 136 جھڑبی میں ہماری 6 ایکڑ زرعی زمین ہے جو ہمارے آباﺅں اجداد سے چلی آرہی ہے ،لیکن اسسٹنٹ کمشنر تعلقہ سندھڑی حفیظ لغاری ،مختیار کار سندھڑی ،بابو چانگ اور تپیدار وریام نے جعل سازی کرتے ہوئے ہماری زمینوں کے کھاتے با اثر شخص نبی بخش کے نام پر منتقل کر دیئے جو کہ ہمارے ساتھ نا انصافی ہے ،اس حوالے سے ایڈیشنل ڈپٹی کمشنر میرپورخاص نے ہمارے حق میں فیصلہ کیا ہے اور اب مذکورہ افسران ہماری زمینوں کے کھاتے بنانے کے لیے ہم سے 4 لاکھ روپے رشوت کا مطالبہ کر رہے ہیں ،جس پر ہم نے رشوت دینے سے انکار کیا تو ہمیں خطرناک نتائج کی دھمکیاں دے رہے ہیں ،انھوں نے سپریم کورٹ کے چیف جسٹس ،صدر پاکستان ، وزیر اعظم ،گورنر سندھ ،وزیر اعلیٰ سندھ سے مطالبہ کیا ہے کہ اسسٹنٹ کمشنر سندھڑی ،مختیار کار اور تپیدار کو معطل کر کے کسی ایماندار افسر سے انکوائری کرا کے ہمارے ساتھ انصاف کیا جائے ۔