لاہور)پی پی آئی) پاکستان مسلم لیگ (ق) کے رہنما چودھری محمد سرور نے کہا ہے کہ میں نے زندگی میں 10 بار فلسطین کا دورہ کیا اور وہاں اپنی آنکھوں سے ظلم وبربریت دیکھی۔لاہور میں فلسطین ریلی کے شرکا سے خطاب میں رہنما مسلم لیگ ق چودھری محمد سرور نے کہا کہ اسرائیل نے فلسطین پر ناجائز قبضہ کر رکھا ہے، 1948ء سے لے کر آج تک اسرائیل فلسطین کے علاقوں پر قابض ہے، فلسطینی صرف اپنا 22 فیصد علاقہ مانگتے ہیں۔انہوں نے کہا کہ بدقسمتی سے ہیومن رائٹس کو اسرائیل کسی خاطر میں نہیں لاتا، جو ظلم اسرائیل کر رہا ہے وہ کوئی اور ملک کرتا تو معاملہ کچھ اور ہوتا، میں خاموش رہنے پر انٹرنیشنل کمیونٹی کی مذمت کرتا ہوں، غزہ میں لوگ بھوک سے مر رہے ہیں۔چودھری محمد سرور نے مزید کہا کہ اسرائیل فلسطین میں انسانی حقوق کی خلاف ورزیاں کر رہا ہے، ہسپتالوں میں علاج معالجے کی سہولیات نہیں، غزہ کے لوگ ایک جیل میں رہ رہے ہیں، یہ پوری دنیا کے مسلمانوں کی ذمہ داری بنتی ہے کہ فلسطینیوں کیلئے آواز بلند کریں۔

کراچی)پی پی آئی) معاشی اعشاریوں سے پریشان پاکستانی عوام کو ہر 15 دن بعد پیٹرول کی قیمت میں تبدیلی ایک معاشی بم کی صورت میں جیلنے پڑتی ہے، کیونکہ پیٹرول کی قیمت میں اضافے سے ہر چیز کی قیمت کو پڑ لگ جاتے ہیں،لیکن اس بار پاکستانی عوام نے پیٹرولیم مصنوعات کی قیتمں میں کمی کی امید حکومت سے وابستہ کر رکھی ہے۔  اس کی وجہ عالمی مارکیٹ میں  خام تیل کی قیمت میں بڑی کمی بتائی جا رہی ہے،غیر ملکی میڈیاکے مطابق عالمی مارکیٹ میں خام تیل کی قیمت میں فی بیرل 5 ڈالر کمی ہوئی ہے جس کے باعث یکم نومبر سے پاکستان میں بھی پیٹرولیم مصنوعات کی قیمتوں میں بڑی کمی کا امکان ہے۔ آئندہ ماہ پیٹرول کی قیمت میں 15 سے 20 روپے فی لیٹر کمی کا امکان ہے جبکہ ہائی سپیڈ ڈیزل کی قیمت میں بھی 10 سے 16 روپے کی فی لیٹر کمی متوقع ہے،ذرائع کے مطابق لائٹ ڈیزل آئل اور مٹی کا تیل بھی یکم نومبر سے سستا ہو گا اور اس حوالے سے اوگرا نے پیٹرولیم مصنوعات کی قیمتوں کا ابتدائی مسودہ تیار کر لیا ہے،ذرائع کا بتانا ہے کہ پیٹرولیم مصنوعات کی قیمتوں میں کمی کی حتمی سمری 31 اکتوبر کو پیٹرولیم ڈویژن کو ارسال کی جائے گی۔ سمری وزارت پیٹرولیم اور  وزارت خزانہ ردو بدل کرکے وزیراعظم کو بھیجیں گے جس کے بعد نگران وزیراعظم انوار الحق کاکڑ حتمی قیمتوں کا فیصلہ کریں گے،واضح رہے رہے کہ 16 اکتوبر کو پیٹرول کی فی لیٹر قیمت میں 40 روپے کی کمی کی گئی تھی جبکہ ڈیزل بھی 15 روپے فی لیٹر سستا کیا گیا تھا۔

لاہور(پی پی آئی) پاکستان مسلم لیگ (ن) کے صدر اور سابق وزیراعظم شہبازشریف نے ترکیہ کے عوام کو جمہوریہ کے قیام کے 100 سال مکمل ہونے پر مبارکباد پیش کی ہے۔سابق وزیراعظم شہبازشریف کا سماجی رابطے کی ویب سائٹ ایکس پر اپنے پیغام میں کہا کہ اپنے بھائی رجب طیب اردگان اور ترکیہ عوام کو جمہوریہ کے قیام کے 100 سال مکمل ہونے پر مبارکباد پیش کرتا ہوں۔شہباز شریف نے اپنے پیغام میں کہا کہ آج ہم مختلف شعبوں میں ترکیہ کی بھرپور کامیابیوں اور ترقی کی خوشیاں منا رہے ہیں، ہم نے دیکھا کہ ان 100 برس کے دوران ترکیہ کے ہمارے بھائی، بہنیں کئی آزمائشوں اور امتحانوں سے گزرے، بڑے بڑے بحران انہیں آگے بڑھنے سے روک نہیں سکے اور اُن کے پختہ عزم نے مشکلات کو مواقع میں بدل دیا۔سابق وزیراعظم نے مزید کہا کہ عالمی سطح پر شدید اضطرابی ماحول میں بالخصوص جمہوری وخوش حال ترکیہ خطے اور اسلامی دنیا کے استحکام کا اہم سبب ہے، مشترک تاریخ وعقیدے پر مبنی ہمارا بھائی چارہ واضح کرتا ہے کہ پاکستان اور ترکیہ ایک قوم ہیں جو دو ریاستوں میں آباد ہیں۔انہوں نے کہا کہ جدید ترکیہ کے بانی کمال اتا ترک سے لے کر صدر رجب طیب اردگان تک ترقی کے لئے ”خون، پسینہ اور اشک“ بہانے والوں کو خراج عقیدت پیش کرتا ہوں، آنے والے 100 سال پاکستان اور ترکیہ کے درمیان بھائی چارے، دوستی اور شراکت داری کی عظیم مثال بنیں گے۔۔

اسلام آباد)پی پی آئی) نگران وزیرِ خارجہ جلیل عباس جیلانی نے عالمی برادری سے مطالبہ کیا ہے کہ وہ غزہ میں فوری جنگ بندی کا مطالبہ کرنے والی اقوام متحدہ کی قراردادوں کا احترام کرنے کے لیے اسرائیل پر دباؤ ڈالے۔سوشل میڈیا پلیٹ فارم پر ایک ٹویٹ میں نگران وزیر خارجہ جلیل عباس جیلانی نے کہا کہ اسرائیل نے غزہ پر بمباری جاری رکھتے ہوئے بجلی، تمام مواصلاتی رابطے کاٹ دیے ہیں۔انہوں نے کہا کہ اس اندھیرے میں ہمیں معصوم فلسطینیوں کی حالت کو نظر انداز نہیں کرنا چاہیے۔واضح رہے کہ اسرائیل کے غزہ پر فضائی اور زمینی حملوں میں شہید فلسطینیوں کی تعداد 8 ہزار تک پہنچ گئی ہے اور ان شہید ہونے والوں میں آدھی تعداد بچوں کی ہے۔ اسرائیلی فوج کے حملوں میں 22 ہزار سے زائد فلسطینی زخمی ہوئے ہیں جبکہ 940 بچوں سمیت 1650 فلسطینی لاپتہ ہیں۔جمعے کو اقوام متحدہ کی جنرل اسمبلی نے اسرائیل اور حماس کے درمیان انسانی بنیادوں پر جنگ بندی پر فوری عمل درآمد کے لیے اردن کی طرف سے پیش کی گئی قرارداد کو متفقہ طور پر قبول کیا گیا تھا۔