اسلام آباد (پی پی آئی) ملک بھر میں پیر کوجشن آزادی ملی جوش وجذبے کے ساتھ منایا گیا۔جشن آزادی کے موقع پر متوالوں نے رنگ برنگی لائٹس، ہری بھری جھنڈیاں،جھنڈے لگاکر پورا دیس سجا دیا۔ بچے، نوجوان، خواتین سمیت سب ہی تیاریوں میں مگن رہے،پی پی آئی کے مطابق ہر طرف سبز ہلالی پرچموں کی بہار دیکھنے میں آئی۔، بڑی شاہراہوں کے اردگرد قائم عمارتوں کی سجاوٹ نے شہر کے رنگ ڈھنگ ہی بدل دیے۔ملک کے مختلف شہروں میں آتشبازی کا شاندار مظاہرہ کیا گیا۔ پاکستان کے   یوم آزادی کا آغازتوپوں کی سلامی سے ہوا۔ پاک فوج اورنیوی کے چاق وچوبند دستوں کی جانب سے توپوں کی سلامی دی گئی۔وفاقی دارالحکومت میں 31 جبکہ صوبائی دارالحکومتوں میں 21،21 توپوں کی سلامی دی گئی۔ اس موقع پرپاک فوج اور نیوی کے دستے کی جانب سے نعرہ تکبیر، اللہ اکبر کے فلک شگاف نعرے بھی بلند کئے گئے۔دوسری جانب پاکستان کے 76 ویں یوم آزادی کے موقع پر کراچی میں مزار قائد پر بھی گارڈز کی تبدیلی کی پروقار تقریب منعقد ہ ہوئی۔ تقریب کے مہمان خصوصی کمانڈنٹ پاکستان نیول اکیڈمی کموڈور محمد خالد تھے، انہوں نے مزار قائد پر پھولوں کی چادر رکھی اور فاتحہ خوانی کی۔لاہورمیں علامہ اقبال کے مزار پر گارڈز کی تبدیلی کی پروقارتقریب منعقد ہوئی جس میں پاک فوج کے چاق و چوبند دستے نے شاعر مشرق کو سلامی پیش کی۔مزار علامہ اقبال پر پاک فوج کے دستے نے رینجرز کی جگہ گارڈز کے اعزازی فرائض سنبھال لیے ہیں۔ میجرجنرل قیصرسلیمان،گیریژن کمانڈر لاہور نے مزاراقبال پر فاتحہ خوانی کی۔

اسکردو(پی پی آئی)قومی ایئر لائن(پی آئی اے) کی پہلی انٹرنیشنل پرواز پی کے 234دبئی سے ا سکردو لینڈ کر گئی، پرواز اترنے کے بعد اسکردو کو انٹرنیشنل ایئرپورٹ کا درجہ مل گیا۔پی پی آئی کے مطابق پی آئی کی دبئی سے ا سکردو کی ہفتہ وار پروازیں شروع کی جائینگی،پرواز پاکستان کے شمالی علاقہ جات کی سیاحت کے فروغ میں اہم کردار ادا کریں گی،سیاح دبئی سے براہ راست ساڑھے 3گھنٹے کی پرواز سے سکردو پہنچ سکیں گے۔اس حوالے سے سکردو ایئرپورٹ پر پروقار تقریب کا اہتمام کیا گیا،پی پی آئی کے مطابق سی ای او پی آئی اے ایئروائس مارشل عامر حیات نے مسافروں کا استقبال کیا،سول ایوی ایشن حکام اور دیگر سیاسی و سماجی شخصیات بھی موجود تھیں،جہاز کے کپتان نے کاک پٹ کا شیشہ کھول کر پاکستان کا جھنڈا لہرایا۔پرواز اتار کر پی آئی اے نے  اسکردو کو پوری دنیا میں متعارف کروا دیا،سیاح جنت نظیر گلگت بلتستان کے دلکش نظاروں سے لطف اندوز ہو سکیں گے،دوران پرواز سیاحوں کو برف پوش پہاڑوں کے خوبصورت نظارے بھی دیکھنے کو ملیں گے،سیاح کے ٹو اور نانگا پربت کے خوبصورت اور یادگار مناظر سے لطف اندوز ہو سکیں گے۔

کراچی (پی پی آئی) پاکستان کے 76 ویں یومِ آزادی کی خوشی میں دنیا کے سب سے بڑے سرچ انجن گوگل نے اپنا ڈوڈل تبدیل کر دیا ہے۔ گوگل دنیا بھر میں مختلف ثقافتی اور سماجی ایونٹس کے موقع پر دلچسپ ڈوڈلز تیار کرتا رہتا ہے، پاکستان کی آزادی کے 76 سال مکمل ہونے پر بھی ایک نیا ڈوڈل سامنے آیا ہے۔پی پی آئی کے مطابق آج کے ڈوڈل آرٹ ورک میں دانتوں والی انڈس ڈولفن کو دکھایا گیا ہے جو پاکستان میں دریائے سندھ میں پائی جاتی ہے، اسے دریائے سندھ کی ڈولفن کہا جاتا ہے۔انڈس ڈولفن کی یہ نسل ان دنوں خطرے سے دوچار ہے، جسے اردو اور سندھی میں بھلن بھی کہا جاتا ہے، دریائے سندھ میں پائی جانے والی ڈولفن کی یہ نسل جسے مقامی طور پر بھلن کہا جاتا ہے جبکہ اس کو عرف عام میں نابینا ڈولفن بھی کہا جاتا ہے۔جینیاتی طور پر یہ قسم نابینا نہیں ہوتی بلکہ ایک اندازے کے مطابق دریاؤں میں بڑھنے والی آلودگی اس کے نابینا ہونے کی بڑی وجہ ہے۔ خیال رہے کہ گوگل 2011 سے پاکستان کے یوم آزادی پر ڈوڈل بنا رہا ہے، سب سے پہلے اس نے چاند ستاروں اور مینار پاکستان سے مزین سبز رنگ کے ڈوڈل کے ذریعے مبارکباد دینے کا سلسلہ شروع کیا تھا۔