کراچی: پاکستان کرکٹ ٹیم کے سابق کپتان اور سابق ڈائریکٹر جنرل پی سی بی جاوید میانداد نے کہا ہے کہ چیئرمین نجم سیٹھی کی تقرری محدود مدت کے لیے ہے لہذا وہ قومی ٹیم کے مختلف عہدوں پرطویل مدت کے لیے تقرریاں نہیں کر سکتے۔ جاوید میانداد کا کہنا تھا کہ نجم سیٹھی کو پی سی بی کا نظام رواں بنانے کے لیے چار مہینے دیے گئے تھے لیکن وہ اس عمل کی نگرانی کرنے کے ساتھ ساتھ دوسرے امور بھی دیکھنے لگے ہیںمیرے خیال میں نجم سیٹھی طویل مدتی تقرریوں کے مجاز نہیں۔ انھوں نے کہا کہ نجم سیٹھی کے فیصلے یک طرفہ اور آئین کے خلاف ہیں کیونکہ انہیں صرف الیکشن کرانے، پی سی بی اور ایسوسی ایشنز کو جمہوری بنانے کا منڈیٹ دیا گیا۔ انھوں نے کہا میں یہ سب اس لیے نہیں کہہ رہا کہ میرے ان سے ذاتی اختلافات ہیں بلکہ میں یہ سب کچھ کرکٹ کی بہتری کے لیے کہہ رہا ہوں۔جاوید میانداد نے کہا کہ مارچ، 2009 لاہور میں سری لنکن ٹیم پر حملے سے ملکی کرکٹ کو بہت نقصان پہنچا لیکن بورڈ کی موجودہ انتظامیہ کے متضاد فیصلے کھیل کے لیے مزید نقصان کا سبب ہوں گے،ان تقرریوں کے عدالتوں میں چیلنج ہونے کے امکانات موجود ہیں۔ انھوں نے کہا کہ قومی ٹیم کے لیے بہت زیادہ تقرریاں کرنے سے بہتری آنے کے بجائے نقصان کا اندیشہ ہے، بہت زیادہ کوچوں کی موجودگی میں چیزیں مزید خراب ہو جائیں گی، آپ کئی سالوں سے ملک کے لیے کھیلنے والوں کی کوچنگ نہیں کر سکتے، اگر کسی کھلاڑی کی تکنیک میں کوئی مسئلہ ہے تو اسے نیشنل کرکٹ اکیڈمی بھیجا جانا چاہیئے۔واضح رہے نجم سیٹھی کے چیئرمین پی سی بی بننے کے بعد جاوید میانداد نے اپنے عہدے سے استعفیٰ دیا تھا۔

میرپورخاص: سابق وفاقی وزیر برائے مذہبی امور حامد سعید کاظمی نے کہا ہے کہ مذاکرات کی آڑ میں طالبان وقت لینا چاہتے ہیں اور حکومت وقت گزارنا چاہتی ہے۔ان خیالا ت کا اظہار انھوں نے میرپورخاص میں ادارہ نورالقران میں منعقدہ تقریب سے خطاب کرتے ہوئے کیا۔،اس موقع پر پیر عزت شاہ جیلانی ،مفتی محمد شریف شعیدی ،التماس صابر قادری ،مولانا محمد صادق سعیدی ،احمد سعید قائم خانی ،جی ایم سومرو اور دیگر بھی موجود تھے ۔حامد سعید کاظمی نے مزید کہا کہ بھارت ،اسرائیل اور امریکہ طالبان کو تعاون فراہم کرتے ہیں اور وہ کسی صورت پاکستان میں امن نہیں دیکھنا چاہتے ۔ان کا کہنا تھا کہ مزاکرات کے نتیجے میں کیا طالبان ہتھیا ر ڈال دیں گے ؟ وہ ایسا ہر گز نہیں کر سکتے پھر مزاکرات کا مفہوم کیا ہے جن کا خون بہتا رہا ہے اور جنہوں نے جنازے اُ ٹھائے ہیں کیا اُن سے کسی نے مزاکرات کا پوچھا ہے ؟انھوں نے کہاکہ خون بہا بھی مقتول کے ورثاءکی مرضی کے بغیر نہیں ہو سکتا اور یہاں معافی بھی اُنکی اجازت کے بغیر ہو رہی ہے، قانون اور،شریعت اسکی اجازت نہیں دیتے۔، حامد سعید کاظمی نے کہا کہ پرویز مشرف کے معاملے پربڑے بڑے نجومیوں کی پیشنگوئیاں غلط ثابت ہوئی ہیں ،یہ ایسا مسئلہ بن چکا ہے کے سانپ چھچندر نگل بھی نہیں سکتا اور اگل بھی نہیں سکتا۔ایک اور سوال کے جواب میں حامد سعید کاظمی کا کہنا تھا کہ کہ عمران خان اور طاہر القادری کا اپنے ورکرز پر کنٹرول ہے لیکن یہ کافی نہیں ہے اچھا ہوتا کہ عمران خان اور طاہر القادری عوام سے پوچھ کر مظاہروں کا ٹائم فریم دیتے ، کیونکہ ابھی گرمی کاموسم ہے اور عوام سوچ سمجھ کر ہی کر باہر نکلے گے۔