کراچی: پاکستان کرکٹ میں نئے بوم بوم نے دستک دے دی ، کراچی کے کھلاڑی شاہ زیب حسن نے ڈومیسٹک کرکٹ میں دوسری تیز ترین سنچری بنائی، انہوں نے پریذیڈنٹ کپ میں پہلی سنچری 40 گیندوں پر جبکہ دوسری سنچری پریذیڈنٹ ٹرافی میں 47 گیندوں پر اسکور کی۔پاکستان ڈومیسٹک کرکٹ میں شاہ زیب بولرز کیلئے شامت کی علامت بن گیا، سیزن میں انہوں نے دوسری تیز ترین سنچری بنائی۔پریذڈنٹ ٹرافی کے 3 روزہ میچ کے آخری روز پورٹ قاسم کے بلے باز نے پی آئی اے کے بولرز کی خوب دھنائی کی اور محض 47 گیندوں پر سنچری جڑدی، شاہ زیب نے 119 رنز کی اپنی اننگز میں 12 چھکے اور 6 چوکے بھی لگائے۔چار دن قبل شاہ زیب نے نیشنل اسٹیدیم میں اسٹیٹ بینک کے خلاف پریذڈنٹ ون ڈے کپ میں 40 گیندوں پر سنچری بنائی تھی۔

لاہور: اوپنر بلے بازوں عمران نذیر اور یاسر حمید نے ایک بار پھر پاکستان کی نمائندگی کرنے پر نظریں جمالیں۔کھلاڑیوں کا کہنا ہےکہ ڈومیسٹک میں عمدہ کارکردگی دکھانے کی بنا پر سلیکٹرز کو انہیں آزمانا چاہیئے۔لاہور میں میڈیا سے بات چیت کرتے ہوئے عمران نذیر کا کہنا تھا کہ وہ کبھی ہمت نہیں ہارتے کیونکہ کرکٹ ان کے خون میں ہے،ڈومیسٹک سیزن میں ان کی کارکردگی تسلی بخش رہی ہے اور وہ پرامید ہیں کہ دوبارہ پاکستان کی نمائندگی کریں گے جبکہ یاسر حمید نے کہا کہ وہ اسپاٹ فکسنگ کے حوالے سے تمام چیزیں بھلا چکے ہیں اور ان کی تمام تر توجہ کرکٹ پر مرکوز ہے اور یہی وجہ ہے کہ ان کی ڈومیسٹک میں کارکردگی بھی انتہائی شاندار ہے اور وہ پاکستان کیلئے دوبارہ کھیلنے کے ایک موقع کی تلاش میں ہیں۔ان کا کہنا تھاکہ پرفارم کرنا ان کا کام ہے،سلیکٹ کرنا یا نہ کرنا سلیکٹرز کا کام ہے۔

نئی دہلی: بھارت ہاکی فیڈریشن کے سیکریٹری نریندر بٹرا نے کہا ہے کہ ان کی ٹیم رواں سال ملائیشیا میں ہونے والی 23ویں اذلان شاہ ہاکی ٹورنامنٹ میں حصہ نہیں لے گی ۔نریندر بٹرا کے مطابق کوچ اور ڈائریکٹر نے فیصلہ کیا ہے کہ رواں سال ہالینڈ میں ہونے والا عالمی کپ بھارت کے لئے زیادہ اہم ہے اس لئے ورلڈ کپ کی تیاریوں کے باعث وہ اذلان شاہ کپ میں اپنی ٹیم نہیں بھیجیں گے ۔بھارت کی ٹیم پانچ بار اذلان شاہ ہاکی کپ جیتنے کا اعزاز رکھتی ہے ۔ان کا مزید کہنا تھا کہ بھارتی ہاکی ٹیم کو عالمی کپ کی پریکٹس کے لئے یورپ بھیجا جارہا ہے اس لئے ملائیشین منتظمین سے معذرت کرلی گئی ہے۔

نئی دہلی : بھارتی کرکٹ بورڈ نے رواں سال بنگلہ دیش میں شیڈول ورلڈ کپ ٹی 20کے لئے ممکنہ 30کھلاڑیوں کے ناموں کا اعلان کردیا ۔ وریندر سہواگ اور گوتم گمبھیرکا نام کھلاڑیوں میں شامل نہیں ہے ۔اعلان کردہ کھلاڑیوں میں شیکھر دھون،کرن شرما، پارتھیوپٹیل ،شہباز ندیم ،ویرن ایرون ،اجنکیا رہانے ،ویرات کوہلی ،روہت شرما،سریش رائنا،امباتی رائیڈو،مہندر سنگھ دھونی ،دینش کارتک ،رویندر جدیجا،روی چندرن ایشون ،بھونیشور کمار ،محمد شامی ،اشانت شرما،ونے کمار ،اسٹوارٹ بنی ،موہت شرما ،کیدار جادیو،یوراج سنگھ ،امیت مشرا،رجات بھاٹیا ،سنچو سمسن ،ایشور پانڈے ،امیش یادیو،انمکت چند،مندیب سنگھ اور ہربھجن سنگھ کے نام شامل ہیں ۔