سنگاپور: انٹرنیشنل کرکٹ کونسل نے تشکیل نو کا منصوبہ اکثریت سے منظور کر لیا۔ اب کرکٹ کی عالمی تنظیم پر تین بڑوں کی اجارہ داری ہو گی۔اجلاس میں آئی سی سی کے دس ممالک بورڈز کے سربراہان اکٹھے ہوئے۔ اجلاس کے اختتام پر متنازعہ مسودے یعنی “بگ تھری ” معاملے پر ووٹنگ کی گئی۔ تین بڑوں کا ساتھ دینے کے لیے پہلے ہی سات بورڈز اپنے ہتھیار ڈال چکے تھے۔ آخری لمحات میں جنوبی افریقا نے بگ تھری کے حق میں ووٹ دیکر پوزیشن پیپر کی منظوری میں اہم کردار ادا کیا۔ آئی سی سی سے جاری شدہ اعلامئے کے مطابق پاکستان اور سری لنکا نے منصوبے پر دستخط نہیں کیے۔ تاہم نئی ایگزیکٹو کمیٹی رواں سال جولائی سے اپنا کام شروع کرے گی۔ اجلاس میں بگ تھری سے متعلقہ تجاویز پر فیصلے کیے گئے۔ آئی سی سی کے آئندہ سربراہ بی سی سی آئی کے چیف سری نواسن ہونگے۔ فنانس اور کمرشل کمیٹیوں کی سربراہی انگلینڈ کو مل گئی جبکہ نئی ایگزیکٹو کمیٹی کی سربراہی آسٹریلیا کے حصے میں آگئی۔ بگ تھری منصوبے کی منظوری کے بعد کرکٹ آمدن پر بھارت، انگلینڈ اور آسٹریلیا کا زیادہ حصہ ہو گا۔ اجلاس میں ورلڈ ٹیسٹ چیمپئن شپ کی جگہ چیمپئنز ٹرافی دوبارہ سے شروع کروانے کا فیصلہ بھی کیا گیا۔

لندن: سابق انگلش بیٹسمین کیون پیٹرسن کی پاپ اسٹار اہلیہ جیسیکا ٹیلر اپنے شوہر کے خلاف بعض باتیں پھیلانے پر سابق انگلش فاسٹ بالر ڈومینک کارک سے ٹوئٹر پر الجھ پڑیں۔ واضح رہے کہ سابق پیسرنے دعویٰ کیا تھا کہ تجربہ کار کھلاڑی کو کپتان الیسٹر کک سے ایشز سیریز کے سڈنی ٹیسٹ کے دوران جھگڑے کی وجہ سے برطرف کیا گیا ہے۔

سوچی: چین سے تعلق رکھنے والی دنیا کی تیز ترین خاتون ایتھلیٹ یوجینگ کولہے میں چوٹ کی وجہ سے سوچی سرمائی اولمپکس سے دستبردار ہوگئیں ۔ 28سالہ یوجینگ نے ایڈلر ایرینا میں خواتین کی 500میٹر اور 1000میٹر کی دوڑ میں حصہ لینا تھا ۔ انٹرنیشنل اسکیٹئنگ یونین کے ترجمان کیبالکو نے تصدیق کی ہے کہ یوجینگ زخمی ہونے کے باعث مقابلے میں حصہ نہیں لیں گی ۔

لاہور: پاکستان کرکٹ بورڈ کے ڈائریکٹر گیم ڈویلپمنٹ اور چیف سلیکٹر عامرسہیل نے پی سی بی کے میڈیکل پینل پر تحفظات کا اظہار کردیا ۔قومی ٹیم کے اکثر کھلاڑیوں کے فٹنس لیول کے حوالے سے چیف سلیکٹر شدید تحفظات کا شکار ہیں ۔ذرائع کے مطابق عامر سہیل پی سی بی کے میڈیکل پینل سے ناخوش ہیں ۔عامر سہیل کا خیال ہے کہ جنوبی افریقا کے خلاف ہوم سیریز اور دورہ جنوبی افریقا کے دوران زخمی ہونے والے کھلاڑیوں کو بھی تک بہتر طریقے سے ٹریٹ نہیں کیا گیا ہے ۔چیف سلیکٹر نے میڈیکل پینل کوہدایت کہ ہے کہ ان فٹ اور زخمی کھلاڑیوں کا فٹنس ٹیسٹ لیں تاکہ ایشیا کپ کی ٹیم کو حتمی شکل دی جاسکے ۔