دبئی: پاکستان کے خلا ف دوسرے ٹیسٹ میں جنوبی افریقی ٹیم کو ہاشم آملہ اور فاسٹ باﺅلر ڈیل اسٹین کی خدمات سے محروم ہونے کا خدشہ پیدا ہو گیا ہے ۔ ڈیل اسٹین اتوار کو دائیں ٹانگ میں درد کے باعث ٹریننگ سیشن ادھورا چھوڑ کر چلے گئے تھے پیر کوبھی پریکٹس میں حصہ نہیں لے سکے جبکہ ہاشم آملہ اپنے دوسرے بچے کی متوقع پیدائش کے باعث جنوبی افریقا میں موجود ہیں،جنوبی افریقا سے روانگی میںایک دن کی تاخیر کی صورت میںدوسرے ٹیسٹ میں ان کی شرکت معدوم ہو جائے گی ۔ جنوبی افریقا کی ٹیم کے منیجر محمد موسیٰ جی نے اسٹین کے حوالے سے کہا کہ ہم ان کی دستیابی کے حوالے سے ابھی کچھ نہیں کہہ سکتے حتمی بات کرنے کے لئے ہمیں ایک دن انتظار کرنا پڑے گا ،محمد موسیٰ جی جو خود بھی میڈیکل ڈاکٹر ہیں کا کہنا تھا کہ ہمیں انجری کی نوعیت معلوم کرنے کے لئے چوبیس گھنٹے درکار ہیں۔ نائب کپتان اے بی ڈی ولیئر نے کہا کہ اسٹین کو ٹریننگ سیشن میں احتیاطی طور پر شامل نہیں کیا گیا اور ہم پر امید ہیں کہ وہ فٹ ہوکر کھیلیں گے ۔ڈیل اسٹین پچھلے پانچ ماہ سے مختلف نوعیت کے فٹنس مسائل کا شکار رہے ہیںجس کے باعث انھیں اگست میں سری لنکا کے خلا ف ہونے ون ڈے سیریز میں بھی شامل نہیں کیا گیا تھا ، اسٹین پچھلے پانچ ماہ کے دوران چمپینز ٹرافی میں صرف ایک میچ کھیلے تھے جہاں انھیں بائیں ٹانگ میں درد کے باعث باہر ہو نا پڑا تھا، تاہم انھیں تمام انجریوں سے صحت یاب ہونے تک مکمل آرام دیا گیا تھا ، مکمل صحت یابی کے بعد اسٹین ٹی ٹوئینٹی چمپیئن لیگ کھیلے اور جنوبی افریقی ٹیم کے لئے اپنی دستیابی ظاہر کر دی ،حالیہ انجری پاکستان کے خلاف پہلے ٹیسٹ کے بعدہوئی جس کی وجہ انھوں نے اپنی ٹیم کی طرف سے سب سے زیا دہ اوو رکئے تھے جس میں 33.4اوور شامل تھے جبکہ میچ کے دوران انھیں کسی قسم کی پریشانی کا سامنا نہیں کر نا پڑا تھا ۔

پرتھ: نائن اے سائیڈ ہاکی ٹورنامنٹ میں پاکستان کو ملائیشیا نے ہرا کر آخری پوزیشن پر دھکیل دیا۔پرتھ میں جاری چار ٹیموں پر مشتمل نائن اے سائیڈ ہاکی ٹورنامنٹ میں ملائیشیا نے پاکستان کو ہرا دیا،ایونٹ کے اپنے آخری میچ میں بھی قومی کھلاڑی اچھی کارکردگی نہ دکھا سکے۔حریف ملائیشیا نے دو ایک کی شکست سے دو چار کر کے گرین شرٹس کو تیسری پوزیشن سے بھی محروم کر دیا۔تیسری پوزیشن کے میچ کے پہلے ہاف میں ملائیشیا کو 0-1 کی برتری حاصل تھی۔دوسرے ہاف میں ملائیشیا نے سکور دوگنا کر دیا۔پاکستان کی طرف سے ارسلان قادر نے واحد گول کیا۔

فلپ آئی لینڈ: سپینش بائیک رائیڈر جورج لورینزو نے آسٹریلین موٹو جی پی جیت لی۔ فلپ آئی لینڈ کے خوبصورت ٹریک پر موٹر سائیکل ریس کا انعقاد ہوا جس میں دنیا بھر کے نامور بائیکرز نے اپنا زور بازو دکھایا۔سپین کے جورج لورینزو نے ٹائٹل ریس جیت لی،آسٹریلین موٹو جی پی کو ٹائر معاملے کی وجہ سے ستائیس سے انیس لیپس تک محدود کر دیا گیا۔فاتح موٹر سائیکلسٹ کو پول سیشن کی برتری رکھنے والے ہم وطن رائیڈرمارک مارکویز اور حریف ڈینی پیڈروسا نے ٹف ٹائم دیا۔

گوانگ ژو: چین میں بیس جمپنگ کے عالمی مقابلے ہوئے، جمپرز نے ہوامیں چھلانگیں لگا کر شائقین کو حیران کر دیا۔چین کے صوبے گوانگ زو میں بیس جمپنگ کے ورلڈ کپ کا تین روزہ ایونٹ ہوا جس میں دنیا بھر سے 34 ٹاپ جمپرز نے شرکت کی۔ جمپرز نے بلا خوف و خطرمہارت سے ہوامیں چھلانگیں لگا کر شائقین کو حیران کر دیا۔ شرکا کو 370 میٹر اونچے پل سے پیراشوٹ کے ساتھ چھلانگ لگانا تھی۔ ایونٹ میں انفرادی فری جمپرز کے ساتھ ساتھ گروپ فری جمپرز کے بھی مقابلے کروائے گئے۔ شائقین کی بڑی تعداد ان سنسی خیز مقابلوں سے محظوظ ہوتی رہی۔

شیخوپورہ: شیخوپورہ کی تحصیل شرقپور شریف میں پنجاب کے روایتی کھیل فری سٹائل کبڈی کے میچ میں فیصل آباد اور ساہیوال کی ٹیمیں آمنے سامنے آئیں۔ تماشائیوں کی بڑی تعداد نے میچ کو زور کا جوڑ بنا دیا۔ میدان مارنے بلکہ دل جیتنے والے کھلاڑیوں پر نوٹوں کی بارش برسائی گئی۔ چماٹے دار کبڈی میں ایک دوسرے پر ہاتھوں کے وار کی آواز سے میدان گونجتا رہا۔ سنسنی خیز میچ 29، 29 پوائنٹس سے برابر رہا لیکن کھلاڑیوں کے جوش و خروش نے شائقین کے دل جیت لیے۔ مہمان خصوصی وفاقی وزیر برائے دفاعی پیداوار رانا تنویر حسین نے کھلاڑیوں میں انعامات تقسیم کئے۔