ریو ڈی جنیرو: برازیل کی عدالت نے فٹبال اسٹیڈیم میں ہونیوالی دوسری ہلاکت کے بعد تعمیراتی کام کو رکوا دیا۔ برازیل کے شہر میناس میں آئندہ سال ہونیوالے فٹبال ورلڈ کپ کے لیے اسٹیڈیم کی تعمیر کا کام تیز رفتاری سے جاری تھا۔ ایک مزدور دل کا دورہ پڑنے کی وجہ سے چل بسا۔ اس کے رشتہ داروں نے یہ الزام لگایا ہے ضرورت سے زیادہ کام کی وجہ سے اس کی موت ہوئی ہے۔اس سے چند گھنٹے پہلے ایک بائیس سالہ مزدور تقریباً 35 میٹر کی اونچائی سے گر کر ہسپتال میں اپنی جان سے ہاتھ دھو بیٹھا تھا۔ اس افسوسناک واقعے کا نوٹس لیتے ہوئے برازیلین عدالت نے اسٹیڈیم کا کام روکنے کا حکم دیا ہے۔ اب تک ورلڈ کپ کے سلسلے میں تعمیر کی جانے والی مختلف عمارتوں میں کئی مزدور ہلاک ہو چکے ہیں۔ مبصرین کا کہنا ہے کہ وقت پر اسٹیڈیم کے پورا کرنے کے لیے رات دن جنگی پیمانے پر کام ہو رہے ہیں۔

رنگون: اسلام آباد ہائی کورٹ نے پی سی بی کے سابق چیئرمین ذکاءاشرف اور موجودہ عبور ی چیئرمین نجم سیٹھی کی انٹراکورٹ اپیل پر فیصلہ محفوظ کرلیا۔اسلام آباد ہائی کورٹ کے جسٹس ریاض احمد خان اور جسٹس نورالحق قریشی پر مشتمل ڈویڑنل بنچ نے چیئرمین پی سی بی کی برطرفی سے متعلق انٹرا کورٹ اپیلوں کی سماعت کی ،دوران سماعت وزارت بین الصوبائی رابطے کی وکیل عاصمہ جہانگیر نے دلائل دیتے ہوئے کہا کہ پانچ رکنی عبوری منیجمنٹ کمیٹی90 روز کیلئے بنائی گئی ،حکومت اس معاملے کے حل میں سنجیدہ ہے ،پی سی بی کو ہائی جیک کرنے کا کوئی ارادہ نہیں،کرکٹ کے کھیل کو شائقین کی بڑی تعداد پسند کرتی ہے اورسفارتی تعلقات کیلئے بھی اہم ہے،حکومت اس کی بہتری کیلئے اقدامات کر رہی ہے،عدالت کا جو فیصلہ ہوگا قبول کریں گے۔سابق چیئرمین پی سی بی ذکاءاشرف کے وکیل نے کہا کہ حکومت کی جانب سے پیش کئے جانے والے دونوں ایس آر اوز میں تضاد ہے ،عدالت کو گمراہ کرنے کی کوشش کی جا رہی ہے ،نئی حکومت اپنا چیئرمین لے کر آنا چاہتی ہے،ایس آر اوز ہمارے لئے سرپرائزہیں ،عدالت میں پی سی بی کے وکیل تفضل رضوی نے کہا کہ18 اکتوبر کے عدالتی فیصلے کے بعد خلاءپیدا ہوا،پی سی بی اپنے آئین کے تحت فیصلہ کرنے میں آزاد ہے ،فیصلوں کی منظوری بورڈ آف گورنرز دیتا ہے،عدالت نے وکلا کے دلائل دینے کے بعد فیصلہ محفوظ کر لیا ہے۔

کولکتہ: بھارتی کرکٹ ٹیم کے سابق کپتان سارو گنگولی نے ملکی سیاست میں داخل ہونے سے انکار کردیا ۔سماجی رابطے کی ایک ویب سائٹ میں دیے گئے پیغام میں گنگولی نے کہا کہ سیاسی جماعت بھارتی جنتا پارٹی نے انہیں 2014میں ہونے والے انتخابات میں ٹکٹ کی آفر کی تھی لیکن انہوں نے انتخابات میں حصہ نہ لینے کا فیصلہ کیا ہے کیوں کہ وہ سمجھتے ہیں کہ ان کا اصل مقام کرکٹ کے میدان ہیں ۔