ممبئی(پی پی آئی)انٹرنیشنل اولپمک کمیٹی (آئی او سی) کی منظوری کے بعد کرکٹ اور فلیگ فٹ بال سمیت 5 کھیلوں کو لاس اینجلس گیمز 2028 میں شامل کر لیا گیا ہے۔پی پی آئی کے مطابق ممبئی میں منعقدہ انٹرنیشنل اولپمک کمیٹی کے اجلاس میں لیکروس، اسکواش اور بیس بال-سافٹ بال کی بھی 2028 کے گیمز کے لیے منظوری دی گئی۔انٹرنیشنل اولپمک کمیٹی کے قوائد و ضوابط کے مطابق ہر میزبان شہر اپنے گیمز کے ایڈیشن کے لیے متعدد کھیل شامل کرنے کی درخواست کرسکتا ہے۔خیال رہے کہ گزشتہ ہفتے ان 5 کھیلوں کو شامل کرنے کی منظوری انٹرنیشنل اولپمک کمیٹی کے ایگزیکیوٹو بورڈ کے اجلاس میں دی گئی تھی تاہم آج کے اجلاس میں اس کی حتمی منظوری دی گئی۔انٹرنیشنل اولپمک کمیٹی میں ماڈرن پینٹاتھلون کو بھی شامل کرنے کی منظوری دی گئی، تاہم ٹوکیو اولپمکس میں پیش آنے والے واقعے کے باعث گھڑ سواری اس فہرست سے ہٹا دی گئی ہے جہاں ایک کوچ نے گھوڑے کو مارا تھا۔کمیٹی کے اجلاس میں ویٹ لفٹنگ بھی اینٹی ڈوپنگ ٹیسٹنگ کے طریقہ کار میں تبدیلی کے بعد گیمز میں شامل کرنے کی منظوری دی گئی، تاہم دونوں کھیلوں کو عارضی طور پر لاس اینجلس گیمز سے باہر رکھا گیا تھا۔باکسنگ کو شامل کرنے کا کوئی حتمی فیصلہ نہیں ہوا اور اس پر زیر التوا معاملہ مزید پیش رفت کے بجائے روک دیا گیا تھا۔خیال رہے کہ تقریباً ایک صدی بعد کرکٹ اولپمک گیمز میں شامل ہوگئی تھی اور 1900 کے گیمز میں کرکٹ کھیلی گئی تھی۔

کراچی (پی پی آئی) دادو میں قتل کئے گئے تین افراد غلام سرور چانڈیو و دیگر کے ورثاء نے کراچی میں پریس کانفرس سے خطاب کرتے ہوئے الزام لگایا ہے کہ ان تینوں افراد کو سابق وزیر نواب نادر مگسی کے ایماء پر قتل کیا گیا ہے۔ کراچی پریس کلب میں پریس کانفرنس سے خطاب کرتے ہوئے مقتولین کے ورثاء نیاز حسین و دیگر نے کہا ک بااثر افراد کے دباؤ پر مقامی پولیس بھی اصل قاتلوں کو گرفتار کرنے سے ہچکچا رہی ہے اور ورثاء حصول انصاف میں در بدر کی ٹھوکریں کھانے پر مجبور ہیں اور قاتلوں کی جانب سے دھمکیاں ملنے پر خوفزدہ ہیں ہم پر دباؤ ڈالا جارہا ہے کہ کیس کی پیروی نہ کی جائے۔نیاز چن نے بتایا کہ پانچ سالوں کے ہمارے گھر کے تین افراد کو قتل کیا جاچکاہے 2017 میں ہمارے دو افراد جبکہ 25 ستمبر 2023 کو ہمارے 50 سالہ بزرگ غلام سرور چانڈیوولد غلام محمد چانڈیو کو قتل کردیا گیا پولیس با اثر شخصیات کے کہنے پرملزمان کو گرفتار نہیں کررہی۔ انہوں نے نگراں وزیر اعلیٰ سندھ، آئی جی سندھ، ڈی آئی جی دادو، سے اپیل کی کہ ہماری مدعیت میں FIR درج کی جائے اور کیس کی غیر جانبدارانہ تحقیقات کراکے ملزمان کو سزائیں دی جائیں اور ہمیں انصاف و تحفظ فراہم کیا جائے۔ انہوں نے کہا کہ یہ تمام قتل سابق وزیر نادر مگسی ولد سیف اللہ مگسی کے کہنے پر کئے گئے ہیں۔25 ستمبر 2023کو ہمارے 50 سالہ بزرگ غلام سرور چانڈیو ولد غلام محمد چانڈیو کو جو گھر کا سامان لے کر واپس گھر آرہے تھے کہ مہر کے قریب تھانہ بی سیکشن کی حدود میں بیٹو جتوئی روڈ پر پیٹیجے موری آم کے باغات کے مقام پر گھات لگائے بیٹھے تین مسلح افراد نے فائرنگ کرکے انہیں قتل کردیا مقدمہ درج کرانے کیلئے ہم نے مہر تھانہ کے سامنے لاش رکھ کر کئی گھنٹے تک احتجاج کیا لیکن پولیس نے ہماری مدعیت میں مقدمہ درج کرنے کے بجائے اپنی مدعیت میں درج کرلیا اصل ملزمان کے خلاف مقدمہ درج کرنے کیلئے ہم نے مختلف فورم پر احتجاج کیا انصاف اور تحفظ کیلئے آواز اٹھائی لیکن نادر مگسی کے کہنے اور دباؤ میں پولیس ملزمان کو بچانے میں لگی ہوئی ہے اس سے قبل 2017میں بھی ہمارے دو افراد قتل کیئے گئے تھے اسکی بھی FIRدرج ہوئی اور اس میں ایک ملزم بھی گرفتار ہوا تھا لیکن نادر مگسی نے کیس کو کورٹ تک جانے ہی نہیں دیا اور ملزم کو تھانے سے ہی کلیئر کراکے اپنے ہمراہ لے گیا تھا نیاز چن اور ان کے ساتھ موجود خواتین ریشماں، صائمہ نے صحافیوں کو بتایا کہ پولیس اور انتظامیہ کی جانبداری کے باعث ہمارے اہل خانہ کے جان و مال محفوظ نہیں ہم عدم تحفظ کا شکار ہیں ہماری چیف جسٹس آف پاکستان، نگراں وزیر اعظم، نگراں وزیر اعلیٰ سندھ، آئی جی سندھ، ڈی آئی جی دادو، ایس ایس پی دادو سے اپیل ہے کہ ہماری جان و مال کو تحفظ فراہم کیا جائے ہماری مدعیت میں FIR درج کرتے ہوئے جے آئی ٹی تشکیل دی جائے اور اصل ملزمان نادر مگسی ولد سیف اللہ مگسی، علی مردان عرف جبل مگسی، انور مگسی ولد غلام مگسی اور سکندر مگسی ولد قربان مگسی پر مقدمہ درج کیا جائے، غیر جانبدار ایجنسی سے کیس کی تحقیقات کرائی جائے اور ملزمان کو قانون کے کٹہرے میں لاکر ہمارے ساتھ انصاف کیا جائے۔

بیجنگ/ اسلام آباد (پی پی آئی)حکومت پاکستان نے موسمیاتی تبدیلیوں کے خلاف پاکستان کی لڑائی میں مدد اور ملک کے توانائی کے درآمدی بل کو کم کرنے میں تعاون کے لیے چین کو سولر پارکس میں سرمایہ کاری کی دعوت دی ہے۔پی پی آئی کے مطابق سولر پارکس میں سرمایہ کاری سے دہرا فائدہ ہو گا،ایک طرف وہ موسمیاتی تبدیلیوں کے خلاف پاکستان کی کوششوں میں معاون ثابت ہوگی تو دوسری جانب اس سے توانائی کے درآمدی بل کو کم کرنے میں بھی مدد ملے گی۔حکومت پاکستان 2030 تک 65 فیصد قابل تجدید توانائی کا حصول چاہتی ہے۔