لندن(پی پی آئی) مسلم لیگ ن کے قائد نوازشریف نے فوری طور پر وطن واپس نہیں آرہے۔ذرائع کے مطابق نواز شریف اور شہبازشریف کی ملاقات میں ستمبر میں وطن واپسی نہ آْنے پر اتفاق کیا گیاہے،  اس طرح نوازشریف کی ستمبر میں وطن واپسی کا امکان ختم ہوگیاہے۔الیکشن فروری 2024 میں ہونے کی صورت میں اکتوبر یا نومبر میں واپسی کی تجویز سامنے آگئی۔پی پی آئی کے مطابق  نوازشریف کا وطن واپسی پرلاہور میں لینڈنگ کرنے کا فیصلہ بھی کیا گیا۔ذرائع کا کہنا ہے کہ نواز شریف اور شہباز شریف کی بیٹھک میں آئندہ کی سیاسی حکمت عملی اور ملکی سیاست کے مستقبل پر غور کیا گیا۔آئندہ عام انتخابات کے لیے مسلم لیگ نون کی انتخابی مہم کے معاملات زیر بحث آئے جبکہ مسلم لیگ نون کا آئندہ بیانیہ کیا ہوگا، اس پر تفصیلی مشاورت کی گئی۔

 گوجرانوالہ(پی پی آئی)گوجرانوالہ میں 18 سالہ ذہنی معذور لڑکی سے اجتماعی زیادتی ثابت ہونے پر پولیس نے دو ملزمان کے خلاف مقدمہ درج کرلیاہے،پی پی آئی کے مطابق دونوں ملزمان متاثرہ لڑکی کے محلے دار ہیں جن میں سے  ایک کی گرفتار ی عمل میں آگئی ہے جبکہ  دوسرے کی تلاش  میں پولیس نے چھاپے مارے ہیں اجتماعی زیادتی کا مقدمہ تھانہ صدر وزیر آباد میں متاثرہ لڑکی کے والد کی مدعیت میں درج کیا گیا۔ پولیس کے مطابق دونوں ملزمان متاثرہ لڑکی کے محلے دار ہیں۔ گزشتہ روز دونوں ملزمان نے گلی سے گزرنے والی 18 سالہ ذہنی معذور لڑکی کو زبردستی اٹھایا اور خالی مکان میں لے جا کر اجتماعی زیادتی کا نشانہ بنایا، لڑکی کی حالت خراب ہونے پر ملزمان فرار ہوگئے۔

ٹھٹھہ(پی پی آئی)ٹھٹھہ کے علاقے جھرک کے قریب ملاکتیار پل پر وین اور ٹرک کے درمیان تصادم میں 7 افراد موقع پر ہی جاں بحق اور 15 زخمی ہوگئے۔حادثہ اس وقت پیش آیا جب جھرک میں قومی شاہراہ پر حیدرآباد سے آنے والی مسافر وین سامنے سے آنے والے ٹرک سے ٹکرا گئی۔خوفناک حادثے کے نتیجے میں 2 خواتین، 4 مرد اور ایک لڑکی جاں بحق جب کہ 15 افراد شدید زخمی ہوگئے۔پی پی آئی کے مطابق ڈی جی ہیلتھ سندھ ڈاکٹر ارشاد میمن نیبتایا کہ جاں بحق ہونے والے افراد کی لاشیں اور زخمیوں کو طبی امداد کے لیے جھرک کے ہسپتال پہنچایا گیا۔ڈی جی ہیلتھ نے کہا کہ زخمیوں کو طبی امداد دی گئی جب کہ شدید زخمیوں کو حیدرآباد کے ہسپتال منتقل کیا جارہا ہے۔انہوں نے بتایا کہ ایدھی ایمبولینس اور 1122 ایمبولینس موقع پر موجود تھیں جنہوں نے زخمیوں کو ہسپتال منتقل کیا۔