جالندھر: کبڈی ورلڈ کپ کے تیسری پوزیشن کے مقابلے میں ڈینش ویمن ٹیم نے پاکستان کو چاروں شانے چت کر دیا۔ سنسنی خیز مقابلہ قومی کھلاڑی 33-34 سے ہار گئیں۔ بھارت کے شہر جالندھر میں ہونے والے کبڈی ورلڈ کپ میں تیسری پوزیشن کے لیے قومی ویمن ٹیم کا سامنا ڈنمارک کی ٹیم سے ہوا۔ ڈنمارک نے میچ کا جارحانہ آغاز کیا۔ انہوں نے پاکستان کے خلاف اپنی برتری دکھائی اور پہلے ہاف میں 14-20 کی برتری سے دھاک بٹھائی۔ دوسرا ہاف شروع ہوا تو قومی ٹیم پرجوش نظر آئی۔ مقابلہ 2 پوانٹس کے فرق سے سنسنی خیز ہو گیا۔ ڈنمارک ویمن ٹیم نے 33 کے مقابلے 34 پوانٹس سے تیسری پوزیشن اپنے نام کی۔ سیمی فائنل میں پاکستان ویمن ٹیم کو روایتی حریف بھارت سے شکست ہوئی تھی۔

ایڈیلیڈ: ایشز سیریز کے دوسرے ٹیسٹ میں آسٹریلیا نے انگلینڈ کو 218 رنز سے شکست دیدی۔ پانچ میچوں کی سیریز میں کینگروز کو دو صفر کی برتری حاصل ہو گئی۔ایڈیلیڈ میں ہونیوالے ٹیسٹ میں انگلش ٹیم نے چھ وکٹ پر 247 رنز کے ساتھ آخری دن کا کھیل شروع کیا تو اس کی مشکلات میں کمی نہ ہو سکی اور پوری ٹیم آسٹریلیا کے 531 رنز کے ہدف کے تعاقب میں 312 رنز پر آوٹ ہو گئی۔جوروٹ 87 اور کیون پیٹرسن 53رنز کے ساتھ ٹاپ سکورر رہے۔آسٹریلیا کی جانب سے پیٹرسڈل نے چار اور ریان ہیرث نے تین کھلاڑی آوٹ کیے۔میچ میں مجموعی آٹھ وکٹیں حاصل کرنیوالے مچل جونسن بہترین کھلاڑی قرار پائے،سیریز کا تیسرا میچ 13 دسمبر کو پرتھ میں ہو گا۔

لاہور: قومی ٹینس اسٹار اعصام الحق اور عقیل خان نے حسن طارق رحیم ماسٹرز کپ ٹورنامنٹ کا ڈبلز ٹائٹل جیت لیا جبکہ عقیل خان نے سنگل ٹائٹل جیت کر ایونٹ میں ڈبل کراﺅن حاصل کرلیا ۔ لاہور جمخانہ کے ہارڈ کورٹ پر کھیلے گئے ٹورنامنٹ کے ڈبلز فائنل میں پاکستان کی ڈیوس کپ جوڑی اعصام اور عقیل نے شہزاد خان اورعثمان کو آسانی کے ساتھ 6-2-6-3سے شکست دیدی۔ مردوں کے سنگل فائنل میں عقیل خان نے اپنے چھوٹے بھائی یاسر خان کو شکست دیدی ۔

لیٹویا: پاکستان کے اسٹار کیوئسٹ محمد آصف نے ورلڈ اسنوکر چیمپئن شپ میں ناک آﺅٹ مرحلے سے باہر ہونے پر شدید مایوسی کا اظہار کرتے ہوئے کہا ہے کہ میرے لئے یہ یقین کرنا مشکل ہے میں اب چیمپئن نہیں رہا ۔آصف کو ایونٹ کے ناک آﺅٹ مرحلے میں بھارتی کیوئسٹ شہباز عادل خان کے ہاتھوں شکست کا سامنا کرنا پڑا تھا ۔ آصف کا کہنا تھا کہ اصل چیمپئن وہ ہوتا ہے جو شکست سے سبق سیکھتا ہے ، میں اس شکست کو اپنے اوپر حاوی نہیں ہونے دوں گا اور آئندہ نیشنل اور انٹرنیشنل ایونٹس میں بہترین کارکردگی دکھانے کی کوشش کروں گا۔

اسلام آباد: پاکستان بلائنڈ کرکٹ کونسل نے پاک بھارت سیریز کیلئے قومی بلائنڈ ٹیم کے کوچ نفیس احمد کی جگہ نئے کوچ کا تقرر کرنے پر غور شروع کردیا ۔ پاکستان بلائنڈ کرکٹ کونسل کے قریبی ذرائع کے مطابق قومی ٹیم کی کوچنگ کے لئے طاہر محمود بٹ ،مسعود جان اور عبدالرزاق کے نام سامنے آئے ہیں ،جن میں سے کسی ایک کو پاک بھارت سیریز کے لئے کو چ منتخب کیا جائے گا ۔

سڈنی: ویسٹ انڈین آل راﺅنڈر ڈیوائن سمتھ اور بگ بیش کی ٹیم پرتھ سکارچرز کے درمیان معاہدہ طے پاگیا ۔ ڈیوائن سمتھ نے اپنے ایک بیان میں کہا ہے کہ پرتھ سکارچرز کی ٹیم باصلاحیت اورتجربہ کار کھلاڑیوں پر مشتمل ہے اور اس کے ساتھ کھیلنا ان کے لئے اعزاز کی بات ہے ۔ بگ بیش لیگ کا نیا سیزن 20دسمبر سے شروع ہوگا ۔