نئی دہلی: جونیئر ہاکی ورلڈ کپ میں جرمنی کے خلاف میچ کے دوران مخالف کھلاڑی سے الجھنے والے پاکستان کے ارسلان قادر پر دو میچوں کی پابندی عائد کردی گئی۔نئی دہلی کے دھیان چند اسٹیڈیم میں جرمنی کے خلاف میچ کے دوران23 ویں منٹ میں ارسلان قادر کی ہاکی لگنے سے جرمن کھلاڑی گرگیا جس کی بنیاد پر امپائر نے ارسلان کو ریڈ کارڈ دکھا کر گراونڈ سے باہر بھیج دیا تھا۔ دوسرے دن اس پر مزید کارروائی کرتے ہوئے ٹورنامنٹ ڈائریکٹر ڈیویڈ کولیئر نے ارسلان قادر کو ذمہ دار قرار دیتے ہوئے دو میچوں کی پابندی عائد کردی، جس کے بعد وہ آج بیلجئم کے خلاف اور ایک مزید میچ نہیں کھیل پائیں گے۔

لاہور: سری لنکا کے خلاف ہوم سریز میں شرکت کے لیے قومی کرکٹر سعید اجمل لاہور سے دبئی روانہ ہو گئے ۔ ان کا کہنا تھا کہ سری لنکا آسان حریف نہیں،انشاءللہ ٹف ٹائم دیں گے۔علامہ اقبال انٹرنیشنل ائیرپورٹ پر میڈیا سے گفتگو کرتے ہوئے سعید اجمل کا کہنا تھا کہ مسلسل کھیل کے باعث بورڈ سے آرام کی درخواست کی تھی جس کے بعد چند روز کی اجازت ملی ، اب مکمل طور پر تازہ دم ہوں،انشااللہ اچھا کھیل پیش کروں گا،گزشتہ روز افغانستان سے کھیلے گئے۔میچ کے بارے میں سعید کا کہنا تھا کہ جیت جیت ہوتی ہے، چاہے آخری گیند پر ہو۔باولنگ کوچ محمد اکرم کے بارے میں سعید کا کہنا تھا کہ انھوں نے باولنگ کے شعبے میں بہت محنت کی ہے اور اسکے مثبت نتائج نکلے ہیں،اگر بیٹنگ کوچ آ گیا تو کھیل میں مزید نکھار آئے گا۔

سلواڈور: بچوں میں معاشرتی اقدار کو اجاگر کرنے کے لیے فیفا نے فٹ بال کا سہارا لے لیا،برازیل میں بچوں کو غیر ضروری سرگرمیوں سے ہٹا کر فٹ بال کی طرف راغب کیا گیا۔برازیل کے شہر سلواڈور میں فیفا کی جانب سے ایک فلاحی ادارے کی ٹیم پہنچی۔ہوپ فور فٹبال نامی تنظیم کے زیر اہتمام بچوں میں فٹ بال کے ذریعے معاشرتی اقدار کا شعور پیدا کرنے کے لیے خصوصی لیکچرز دیئے گئے۔حصہ لینے والے بچوں کا تعلق برازیل کے متوسط خاندانوں سے تھا۔لیکچرز کے بعد بچوں نے دلچسپی سے فٹ بال کے کھیل میں حصہ لیا۔اس موقع پر آرگنائزر کا کہنا تھا کہ بچوں میں فٹ بال کے کھیل کو متعارف کرانے کا مقصد انہیں صحت مند زندگی کی طرف لانا ہے۔

لٹویا: ورلڈ اسنوکر چیمپئن شپ کے فائنل میں چین کے ژویو لانگ نے ہم وطن ژاو زینگٹون کو بیسٹ آف پندرہ فریم کے فائنل میں چار کے مقابلے آٹھ فریمز سے شکست دے کر ٹائٹل اپنے نام کر لیا۔چین کے ژویو لانگ نے سیمی فائنل میں سکٹ مقابلے کے بعد پاکستان کے محمد سجاد کو شکست دے کر ایونٹ سے باہر کیا تھا، فائنل میں دونوں کیوئسٹ کی جانب سے سکٹ مقابلہ دیکھنے کو ملا لیکن ژویو لانگ نے روایتی کھیل دکھاتے ہوئے باآسانی حریف کیوئسٹ کو قابو کیا۔ایونٹ میں دفاعی چیمپئن پاکستان کے محمد آصف، شاہد آفتاب ، عمران شہزاد اور محمد سجاد نے ٹورنامنٹ میں پاکستان کی نمائندگی کی، لیکن کوئی بھی پاکستان کو ایونٹ جتوانے میں کامیاب نہ ہوسکا۔