کوئٹہ(پی پی آئی)  بلوچستان حکومت پرکوئٹہ الیکٹرک سپلائی کمپنی (کیسکو) کے بجلی کے بلوں کی مد میں 33 ارب روپے واجب الادا ہیں

ترجمان کیسکو کے مطابق ماہ جولائی میں صوبائی حکومت اور اس کے ذیلی محکموں کو 990 ملین روپے کے بل جاری کئے گئے  صوبائی حکومت نے صرف 191 ملین روپے  اداکئے،  پی پی آئی کے مطابق حکومت کے ذمہ بجلی کے بلوں کی مد میں 33 ارب روپے کے بقایا جات ابھی بھی ہیں۔صوبے میں وفاقی حکومت اور اس کے ذیلی محکموں  کو ماہ جولائی میں 546 ملین روپے  کے بل جاری کئے گئے، 411 ملین روپے کی ادائیگی وفاقی حکومت نے کی  جبکہ ایک ارب 92 کروڑ روپے واجب الادا ہیں، ادائیگی نہ ہونے کی وجہ سے 68 ملین روپے ماہ جولائی میں سر چارج لگ چکے ہیں۔ترجمان کے مطابق زرعی صارفین کو ماہ جولائی میں تقریباً 8 ارب روپے کے بل جاری کئے گئے، صوبہ کے زمینداروں نے صرف 9 کروڑ 27 لاکھ روپے جمع کروائے ہیں، زرعی صارفین کے ذمہ 419 ارب روپے  بقایا  ہیں، زرعی سبسڈی کی مد میں حکومت بلوچستان نے 46 ارب روپے، وفاقی حکومت نے زرعی سبسڈی کی مد میں 21 ارب روپے ادا کرنے ہیں۔زرعی سیکٹر کے ذمہ ماہ جولائی تک کے مجموعی بقایا جات 488 ارب روپے تک پہنچ چکے ہیں، گھریلو، تجارتی اور صنعتی صارفین کے ذمہ 30 ارب 70 کروڑ روپے کے بقایا جات واجب الادا ہیں، کوئٹہ الیکٹرک سپلائی کمپنی (کیسکو)  نے بقایا جات جمع نہ ہونے کی صورت میں متعلقہ نادہندگان صارفین اور محکموں کے خلاف کارروائی  کا عندیہ دیا ہے۔

 اسلام آباد (پی پی آئی) دنیا کی 14 بلند ترین چوٹیاں سرکرنے والی نارویجن کوہ پیما کرسٹن ہریلا پر الزام عائد کیا جارہا ہے کہ انہوں نے ’کے ٹو ’سر کرنے کی مہم کے دوران زخمی پاکستانی شیرپا کی مدد نہیں کی اور ان کے پاس سے گزر گئیں۔پی پی آئی کے مطابق  سوشل میڈیا پر نارویجن کوہ پیما کو تنقید کا سامنا ہے، تاہم کرسٹن ہریلا نے ان الزامات کی تردید کی ہے کہ ان کی ٹیم نے حسن کو مرنے کے لیے چھوڑ دیا تھا۔  واضح رہے کہ شیرپا ہمالیہ کے علاقوں میں رہتے ہیں  اور دنیا بھر سے آنے والے ان کوہ پیماؤں کی مدد کرتے ہیں جو  ماؤنٹ ایورسٹ سمیت دیگر پہاڑوں کو سرکرنے کی کوشش کرتے ہیں،چونکہ وہ پہاڑی علاقوں میں رہتے ہیں اسی لیے انہیں کوہ پیما بھی کہا جاتا ہے۔ حاکرسٹن ہریلا نے اپنی انسٹاگرام اسٹوری پر بتایا کہ وہ اور ان کی ٹیم نے 27 سالہ پاکستانی شیرپا محمد حسن کو بچانے کے لیے ہر ممکن کوشش کی تھی۔