نئی دہلی: آئندہ ماہ بھارت میں شیڈول جونیئر ہاکی ورلڈ کپ کے ٹکٹوں کی فروخت شروع کردی گئی ۔ہاکی کا میگا ایونٹ 6سے 15دسمبر تک نئی دہلی میں کھیلا جائے گا ۔ ہاکی انڈیا (ایچ آئی ) کے جاری شدہ بیا ن کے مطابق ایونٹ کے ٹکٹوں کی فروخت شروع ہوچکی ہے اور جو شائقین ایک ٹکٹ خریدیں گے وہ پورے دن میں ہونے والے تمام میچوں کو دیکھنے کے اہل ہوں گے ۔شائقین کی ہاکی کے کھیل میں دلچسپی کو مدنظر رکھتے ہوئے ٹکٹوں کی کم رکھی گئی ہے تاکہ زیادہ سے زیادہ لوگ ٹکٹ خرید سکیں ۔ دس روزہ ایونٹ میں دنیا بھر سے 16ٹیمیں ایکشن میں ہوں گی ۔

ہانگ کانگ: ہانگ کانگ آئندہ سال ستمبر میں ٹینس کے پہلے ڈبلیو ٹی اے ٹورنامنٹ کی میزبانی کرے گا ۔دوہفتوں تک جاری رہنے والے ایونٹ کا انعقاد وکٹوریہ پارک کے سر سبز مقام پر کیا جائے گا ۔میگا ایونٹ میںعالمی رینکنگ کے ٹاپ ٹین کھلاڑیوں کو شامل کیا جائے گا ،جبکہ تقریباًدولاکھ ڈالر کی انعامی رقم مختص کی گئی ہے ۔ہانگ کانگ ٹینس ایسوسی ایشن کے ترجمان ٹام ریڈ کے مطابق ہانگ کانگ میں اب تک ڈبلیوٹی اے ایونٹ کا انعقا د نہیں ہوا ہے ،اور یہ ہانگ کانگ کی ٹینس تاریخ کا یادگار ایونٹ ہوگا۔انہوں نے مزید کہا کہ میگا ایونٹ میں چین کی مناسب نمائندگی کے ساتھ ساتھ مقامی اور انٹرنیشنل کھلاڑیوں کو شامل کیا جائے گا ۔ہانگ کانگ کی نمبر ون ٹینس کھلاڑی ژانگ لنگ نے میگا ایونٹ کے انعقاد پر انتہائی مسرت کا اظہار کرتے ہوئے کہا کہ اپنے گھر میں انٹرنیشنل کھلاڑیوں سے مقابلہ کرنا ان کا ایک پرانا خواب تھا جو کہ سچ ہونے جارہا ہے ۔اس سے قبل 2002میں ہانگ کانگ ایک اے ٹی پی اوپن ایونٹ کی میزبانی کرچکاہے۔ ٹینس کلاسک کے نام سے ایک نمائشی ایونٹ میں دنیا کے ٹاپ ٹینس کھلاڑی ہانگ کانگ میں ایکشن دکھا چکے ہیں جن میں روجر فیڈرر اور وینس ولیمز شامل ہیں۔

سنتیاگو: عالمی نمبر ایک ٹینس اسٹار رافیل نڈال کو سربین اسٹار نوواک جوکووچ کے ہاتھوں نمائشی میچ میں شکست کر نا پڑا۔دونوں کھلاڑی چلی کے شہر سنتیاگو میں ایک نمائشی میچ میں شریک ہوئے ۔ دو ہفتے قبل اے ٹی پی ورلڈ ٹور فائنلز میں بھی نڈال کو جوکووچ کے ہاتھوں شکست کے بعد ٹائٹل سے ہاتھ دھونا پڑا تھا ۔ نمائشی میچ کا انعقاد ٹینس کے دو کھلاڑی نکولس میسو اور ڈیوڈ نیلبیڈین کے ریٹائرمنٹ کے موقع پر کیا گیا تھا ۔جوکووچ نے نڈال کو اسٹریٹ سیٹس میں 6-4,7-6(3)سے ہرایا ۔دونوں کھلاڑیوں کے درمیان دوسرا نمائشی میچ ارجنٹائن کے شہر بیونس آئرس میں اتوار کو ہوگا۔

ماسکو: روسی ٹینس اسٹار ماریا شراپووا نے انجری سے مکمل صحت یابی کے بعد آئندہ ماہ دسمبر میں شیڈول برسبین انٹرنیشنل سے ٹینس کورٹ میں واپسی کا فیصلہ کرلیا۔ایونٹ انتظامیہ نے بھی شراپووا کی شرکت کی تصدیق کردی ہے ۔رواں برس جون میں ومبلڈ ن ٹورنامنٹ کے دوران ماریا شراپووا انجری کا شکار ہوگئی تھیں جس کے باعث وہ یوایس اوپن سے دستبردار ہوگئیں اور سیزن کے آخری چیمپئن شپ ڈبلیو ٹی اے میں شرکت سے محروم رہیں ۔چار بار کی عالمی چیمپئن برسبین اوپن سے اپنے سیزن کا افتتاح کریں گی ۔

لاہور: پاکستان کرکٹ بورڈ کے چیئرمین نجم سیٹھی نے کرکٹ ٹیم کے ٹیسٹ اور ایک روزہ میچوں میں کپتان مصباح الحق کا دفاع کرتے ہوئے کہا ہے کہ وہ2015 کے ورلڈ کپ تک کپتان رہیں گے۔ابو ظہبی میں جنوبی افریقہ کے خلاف پاکستان ٹیم کی مایوس کن کارکردگی کے بعد مصباح الحق کو تنقید کا نشانہ بنایا جا رہا تھا لیکن نجم سیٹھی کی طرف سے اس بیان کے بعد ان پر دباو میں کمی ہوگی۔کئی سابق کھلاڑیوں اور کرکٹ ناقدین نے مصباح کی کپتانی پر اعتراضات کرنا شروع کر دیے تھے اور سابق کپتان رمیز راجہ نے مصباح کو ’سپائن لیس‘ یعنی ایک غیر جرات مند کپتان قرار دیا تھا۔بورڈ کی طرف سے جاری ہونے والے ایک بیان میں کہا گیا کہ چیئرمین کو کپتان پر مکمل اعتماد ہے اور وہ سنہ دو ہزار پندرہ تک پاکستان ٹیم کی کپتانی کرتے رہے گے۔پاکستان کی ٹیم زمبابوے کے خلاف بھی ٹیسٹ سیریز میں کامیابی حاصل نہیں کر پائی تھی جس کے بعد مصباح الحق کی کپتانی پر تنقید میں تیزی آئی تھی۔مصباح الحق رواں سال پاکستان میں سب سے زیادہ سکور کرنے والے کھلاڑی ہیں۔

بارسلونا:ارجنٹائن کے سپر اسٹار فٹ بالر لیونل میسی نے کرسٹیانو رونالڈو کی فیفا ورلڈ کپ میں شرکت پر انتہائی خوشی کا اظہار کیا ہے۔لیونل میسی کا کہنا تھا کہ جب پرتگال نے برازیل میں شیڈول فیفا ورلڈ کپ کے لئے کوالیفائی کیا تو انہیں انتہائی خوشی ہوئی کیونکہ وہ چاہتے ہیں کہ ورلڈ کپ میں بہترین ٹیموں کے درمیان مقابلہ ہو۔ ان کا کہنا تھا کہ کرسٹیانو رونالڈو ایک بہترین کھلاڑی ہیں اور ان کا اسکورنگ ریٹ بہت اعلٰی ہے۔واضح رہے لیونل میسی کو گزشتہ روز سب سے زیادہ گول کرنے پر یورپین لیگ کے ”گولڈن بوٹ ایوارڈ“ سے نوازاگیا تھا ۔26سالہ فٹبالر نے اپنی عمدہ پرفارمنس کی بدولت بارسلونا کے 2012-13سیزن میں اسپینش لیگ ٹائٹل کی فتح میں اہم کردار ادا کیا ۔میسی نے 46مرتبہ گیند کو جال کی راہ دکھائی ۔میسی اس سے قبل 2011-12کے سیزن میں ریکارڈ 50گول کرچکے ہیں ۔