سرینگر (پی پی آئی)غیر قانونی طور پر بھارت کے زیر قبضہ جموں و کشمیر سے تعلق رکھنے والے انسانی حقوق کے کارکن خرم پرویز کو جیل میں ایک ہزاردن مکمل ہوگئے۔کشمیر میڈیا سروس کے مطابق بھارت کے بدنام زمانہ تحقیقاتی ادارے این آئی اے نے خرم پرویز کو 22نومبر2021 کو گرفتار کیا تھا۔ ان کے خلاف تعزیرات ہند اور غیر قانونی سرگرمیوں کی روک تھام کے کالے قانون یو اے پی اے کی مختلف دفعات کے تحت مقدمہ درج کیا گیا ہے جس میں مجرمانہ سازش، حکومت ہند کے خلاف جنگ چھیڑنا یا اس کی کوشش کرنا یا ترغیب دیناشامل ہے۔انسانی حقوق کی تنظیموں کا کہنا ہے کہ خرم پرویز کو وادی کشمیر میں بھارتی حکام کی طرف سے جاری انسانی حقوق کی خلاف ورزیوں کو دستاویز ی شکل دینے پر گرفتارکیاگیاہے۔ وہ جموں وکشمیر کوئلیشن آف سول سوسائٹی (JKCCS)کے پروگرام کوآرڈینیٹر کے طور پر کام کرتے تھے اور”ایشین فیڈریشن اگینسٹ انوالنٹری ڈس ایپئرنسز”کے چیئرمین ہیں۔آج خرم پرویز کی قید کا ایک ہزارواں دن ہے۔یکم دسمبر 2021کو اقوام متحدہ کے ہائی کمشنر برائے انسانی حقوق کے دفتر نے خرم پرویز کی رہائی کا مطالبہ کیا۔22مارچ 2023کوخرم پرویز کو ایک دوسرے کیس میں گرفتار کیا گیا اور دہشت گردی کی مالی معاونت کاجھوٹا الزام لگایا گیا۔ان کی گرفتاری سے قبل جے کے سی سی ایس کے سابق ساتھی عرفان معراج کوجو ایک معروف کشمیری صحافی اور انسانی حقوق کے کارکن ہیں، اسی کیس کے سلسلے میں سرینگر میں گرفتار کیا گیا تھا۔ انہیں فوری طور پر دہلی منتقل کر دیا گیا۔24مارچ 2023کو انسانی حقوق کے محافظوں کی صورتحال کے بارے میں اقوام متحدہ کی خصوصی نمائندہ میری لالر نے خرم پرویز کی رہائی کا مطالبہ کیا۔گزشتہ سال جب خرم پرویزجیل میں تھے،انہیں انسانی حقوق کے محافظوں کے لیے”مارٹن اینالز ایوارڈ ”سے نوازا گیا۔ ایوارڈ کمیٹی نے اپنے نوٹ میں کہاکہ خرم پرویز نے انسانی حقوق کے تحفظ کو اپنی زندگی کا مشن بنانے کا فیصلہ اس وقت کیا جب وہ ایک نوجوان لڑکے تھے اورانہوں نے ایک احتجاج کے دوران فائرنگ سے اپنے دادا کی المناک موت کو اپنی آنکھوں سے دیکھا۔ وہ بدلہ لے سکتے تھے لیکن اس کے بجائے انہوں نے 70سالہ تنازعہ جموں وکشمیر میں عدم تشدد کے ذریعے اپنا کردارادا کرنے کا انتخاب کیا۔خرم پرویز اس سے قبل بھی اپنے کام کی وجہ سے جیل جا چکے ہیں۔ انہیں 2016میں گرفتار کیا گیا تھا۔ 2016میں ان کی گرفتاری سے دو دن قبل بھارتی امیگریشن حکام نے انہیں جنیوا جانے والی پرواز میں سوار ہونے سے روک دیا تھا جہاں وہ اقوام متحدہ کی انسانی حقوق کونسل سے خطاب کرنے والے تھے۔ 75 دن کی قید کے بعد جموں و کشمیر ہائی کورٹ نے ان کی نظر بندی کو غیر قانونی قرار دے کر کالعدم قرار دیا تھا۔

سرینگر (پی پی آئی)غیر قانونی طور پر بھارت کے زیر قبضہ جموں و کشمیر میں نیشنل کانفرنس کے نائب صدر عمر عبداللہ نے کہا ہے کہ علاقے کی اسمبلی انتخابات کے بعد دفعہ370کی منسوخی کے بھارتی حکومت کے فیصلے کے خلاف قرارداد پاس کرے گی۔کشمیر میڈیا سروس کے مطابق مودی حکومت نے 05اگست 2019کو بھارتی آئین کی دفعہ 370کو منسوخ کر دیا تھا جس کے تحت مقبوضہ علاقے کو خصوصی حیثیت حاصل تھی۔عمر عبداللہ نے سرینگر میں ایک میڈیا انٹرویو میں کہا کہ خطے کو اس کے ریاستی درجے اور خصوصی حیثیت سے محروم کرنے کے مودی حکومت کے فیصلے کے خلاف قرارداد کی منظوری اسمبلی کا پہلا کام ہوگا۔عمر عبداللہ کا یہ بیان بھارتی ا لیکشن کمیشن کی طرف سے مقبوضہ جموں و کشمیر میں 18ستمبر، 25ستمبر اور یکم اکتوبر کو تین مرحلوں میں اسمبلی انتخابات کرانے کے اعلان کے ایک دن بعدسامنے آیا۔ووٹوں کی گنتی 4 اکتوبر کو ہوگی۔علاقے میں آخری اسمبلی انتخابات نومبر-دسمبر 2014میں ہوئے تھے۔ مقبوضہ جموں و کشمیر میں 19دسمبر 2018سے صدارتی راج نافذ ہے۔جمعہ کو انتخابات کے اعلان کے بعد عمر عبداللہ نے جموں و کشمیر کی ریاستی حیثیت بحال ہونے تک انتخابات میں حصہ نہ لینے کا اعلان کیا۔ ان کے والد اور نیشنل کانفرنس (NC)کے سربراہ فاروق عبداللہ آئندہ انتخابات میں پارٹی کی قیادت کریں گے۔

سرینگر (پی پی آئی)غیر قانونی طور پر بھارت کے زیر قبضہ جموں و کشمیر میں کل جماعتی حریت کانفرنس نے کہا ہے کہ تنازعہ کشمیر کا حل نہ ہوناخطے میں کشیدگی کی بنیادی وجہ ہے۔کشمیرمیڈیاسروس کے مطابق کل جماعتی حریت کانفرنس کے ترجمان ایڈووکیٹ عبدالرشید منہاس نے سرینگر میں جاری ایک بیان میں اقوام متحدہ اور دنیا کی بڑی طاقتوں سے مطالبہ کیا کہ وہ بھارت کو خطے میں عدم استحکام کی صورتحال کو مزید بڑھانے سے روکیں۔انہوں نے نئی دہلی کے زیر کنٹرول قابض انتظامیہ کی طرف سے غیر کشمیریوں کو ڈومیسائل جاری کرنے کی شدید مذمت کی۔ انہوں نے کہا کہ بھارت مقبوضہ جموں و کشمیر کو آباد کاروں کی کالونی میں تبدیل کر رہا ہے۔ ترجمان نے عالمی برادری پر زور دیا کہ وہ مقبوضہ جموں وکشمیرکی موجودہ صورتحال کا نوٹس لے۔انہوں نے کہا کہ بھار ت کا اصل ہدف مقبوضہ جموں و کشمیر کے مقامی لوگوں کو پسماندگی کی طرف دھکیلنااور ان کا خاتمہ کرنا ہے۔ انہوں نے کہا کہ حریت رہنماؤں اور نوجوانوں کی مسلسل غیر قانونی نظربندی ان کو اپنے مقصد سے دستبردارہونے پر مجبورنہیں کرسکتی۔حریت ترجمان نے مقبوضہ جموں وکشمیرمیں تمام سیاسی جماعتوں اور ان کی قیادت پر زور دیا کہ وہ بھارتی غلامی سے نکل جائیں اور جموں و کشمیر اور اس کے باشندوں کی بقاء کو درپیش خطرات سے بچنے کے لیے کشمیری عوام کی جدوجہد میں شامل ہوجائیں۔انہوں نے کہا کہ پاکستان، بھارت اور کشمیریوں کی حقیقی قیادت سمیت تمام فریقین کے درمیان بات چیت طویل عرصے سے زیر التوا تنازعہ کشمیر کو حل کرنے کا بہترین راستہ ہے۔

سرینگر (پی پی آئی)غیر قانونی طور پر بھارت کے زیر قبضہ جموں و کشمیر میں ضلع گاندربل کے علاقے کنگن میں موسلادھار بارشوں سے سیلابی صورتحال پیدا ہوئی ہے جبکہ کچھ سرکاری سکول اور رہائشی علاقے زیر آب آ گئے ہیں۔کشمیرمیڈیاسروس کے مطابق مقامی لوگوں نے بتایا کہ ہفتے کی صبح ہونے والی تیز بارش کے باعث حسن آباد کے علاقے میں سیلابی صورتحال پیدا ہوگئی اور گورنمنٹ گرلز اسکول کنگن اور مین بازار زیر آب آگئے جس سے مکینوں کوآمدورفت میں شدید مشکلات کا سامنا ہے۔ انہوں نے کہاکہ موسلادھار بارش سے گھروں اور کھیتوں میں پانی بھر گیا جس سے معمولات زندگی متاثر ہوئے۔ مقامی لوگوں نے علاقے کے نکاسی آب کے نا قص نظام کا مسئلہ اجاگر کیا۔لوگوں نے بتایا کہ انہوں نے بارہا حکام سے نکاسی آب کا مناسب نظام تعمیر کرنے کی اپیل کی ہے۔ تاہم ان کی درخواستوں کے باوجود ابھی تک اس سلسلے میں کوئی کارروائی نہیں کی گئی۔دریں اثناء جنوبی کشمیر میں ضلع پلوامہ کے علاقے اچگوزہ میں موسلادھار بارش سے ایک اہم سڑک زیر آب آ گئی۔رہائشیوں کے مطابق صبح سویرے علاقے میں شروع ہونے والی مسلسل بارش سے ندی کی پانی کی سطح بڑھتی گئی جس سے ابہامہ-سنگ نیر روڈ زیر آب آ گیا۔

 اسلام آباد (پی پی آئی)کل جماعتی حریت کانفرنس کی آزاد جموں وکشمیر شاخ کے رہنما زاہد صفی نے کہاہے کہ بھارت کی ریاستی دہشت گردی اب سرحدوں سے باہر نکل کر بین الاقوامی برادری کیلئے ایک سنگین مسئلہ بنتی جا رہی ہے۔کشمیرمیڈیاسروس کے مطابق زاہد صفی نے اسلام آباد میں جاری ایک بیان میں کہاکہ کینیڈا میں سکھ رہنما کے قتل کے بعد امریکہ میں آزادی پسند رہنماؤں پر اسی طرح کے جان لیوا حملے ہوئے ہیں۔انہوں نے کہاکہ برطانیہ میں معروف آزادی پسند کشمیری رہنما مرحوم محمد ایوب ٹھاکرکے صاحبزادے مزمل ٹھاکر پر حملہ اسی سلسلے کی ایک کڑی ہے۔انہوں نے کہاکہ مزمل ایوب ٹھاکرسفارتی محاذ پر تحریک آزادی کشمیر کی ایک موثر اورتوانا آوازہیں۔وہ بھارتی خفیہ ایجنسیوں کی آنکھ میں کانٹے کی طرح کھٹک رہے ہیں۔یہی وجہ ہے کہ انہیں برطانیہ میں گھر کی طرف جاتے ہوئے بھارتیہ جنتا پارٹی کے غنڈوں نے نشانہ بنایا۔انہوں نے کہاکہ یہ انتہائی سنگین واقعہ ہے جس کی جتنی مذمت کی جائے کم ہے۔حریت رہنما نے کہاکہ بھارت کا گھناؤنا چہرہ جو بین الاقوامی برادری سے چھپا ہو ا تھا، اب بے نقاب ہو چکا ہے۔انہوں نے کہاکہ بھارت ہمیشہ سے بین الاقوامی برادری میں ایک سازشی کردار کے طور پر جانا جاتا ہے۔فلسطین کے معاملے میں بھی بھارت نے دوغلے پن کا مظاہرہ کیا ہے۔سری لنکا میں بھارتی دہشت گردی کسی سے ڈھکی چھپی نہیں۔اسی طرح مالدیپ، بھوٹان، نیپال اوربنگلہ دیش میں بھی بھارت ایک سازشی کردارکے طور پر جانا جاتا ہے۔انہوں نے کہاکہ ہر آزادی پسند رہنما اور ہر ذی شعورانسان کو بھارت کے غیر انسانی اورغیر اخلاقی رویے کے خلاف اٹھ کھڑا ہونا چاہیے۔دریں اثناء پاسبان حریت جموں و کشمیر کے چیئرمین عزیراحمدغزالی نے ایک بیان میں کہا ہے کہ بھارتی حکومت نے دنیا کی آنکھوں میں دھول جھونکنے کے لیے مقبوضہ جموں وکشمیر میں جعلی انتخابات کا ڈھونگ رچانے کا اعلان کیا ہے۔ انہوں نے کہا کہ مقبوضہ علاقے کی مسلمہ عوامی قیادت کو جیلوں میں بند کرکے نام نہاد انتخا بی ڈرامے کی کوئی حیثیت نہیں۔ انہوں نے کہاکہ انتخابات حق خودارادیت کا نعم البدل نہیں ہوسکتے جس کے لئے کشمیری عوام جدوجہد کررہے ہیں اورقربانیاں دے رہے ہیں۔

 اسلام آباد(پی پی آئی)نیشنل ہائی ویز اور موٹروے پولیس نے بارش کے موسم میں ڈرائیور حضرات کو ڈرائیونگ کرتے ہوئے احتیاطی تدابیر اختیار کرنے کا مشورہ دیا ہے۔سرکاری خبررساں ادارے APP سے گفتگو کرتے ہوئے نیشنل ہائی ویز اور موٹروے پولیس شمالی زون کے ترجمان محمد ثاقب نے کہا کہ مسلسل موسلادھار بارشوں کے باعث ایم ون سے اسلام آباد سے کوٹ مومن، ڈیرہ اسماعیل خان، سوات اور تھاکوٹ میں سڑک پر پھسلن کی صورتحال ہے۔انہوں نے کہا کہ پھسلن والی صورتحال سے حادثات کا خطرہ بڑھ سکتا ہے۔انہوں نے مسافروں کو نیشنل ہائی ویز و موٹروے پولیس کی ہیلپ لائن 130 سے تازہ ترین معلومات حاصل کرنے اور سفر کے آغاز سے پہلے اس کے سوشل میڈیا اکاؤنٹس سے بھی رابطہ کرنے کا مشورہ دیا ہے۔