ؒ ؒلاہور(پی پی آئی) سابق وزیراعلیٰ پرویز الہٰی نے کہا کہ ایک روپیہ نہیں کھایا، پتہ نہیں مجھ پر کہاں سے یہ ریکوری ڈال کر لے آئے ہیں۔سابق وزیراعلیٰ پرویزالہٰی نے کہا کہ میں نے اپنی ساری زندگی اللہ کی رضا کے لئے کام کیا ہے، میں نے لوگوں کی خدمت کی ہے، وہ شہبازشریف والی خدمت نہیں، رات کو میرے پاس کوئی بندہ نہیں آیا، پتہ نہیں کہاں سے ریکوری ڈال کر لے آئے۔پرویز الہٰی نے کہا کہ میں رات بھر اینٹی کرپشن میں سویا رہا ہوں، مجھے تو ادھر آکر پتہ چلا ریکوری ڈال لائے ہیں، یہ اپنی نوکریاں پکی کرنے کے چکر میں ہیں، سب سے زیادہ نوکریاں بھی میں نے دی ہیں۔

جہانیاں (پی پی آئی) چیئرمین استحکام پاکستان پارٹی جہانگیر ترین نے کہا کہ ایسا پاکستان بنائیں گے جس کا خواب 10 سال پہلے دیکھا تھا۔چیئرمین استحکام پاکستان پارٹی جہانگیر ترین نے جلسے سے خطاب کرتے ہوئے کہا کہ ہم سب اکٹھے ہو کر نئے پاکستان کو پایہ تکمیل تک پہنچائیں گے، دس سال پہلے بہتر پاکستان بنانے کے لئے اکٹھے ہوئے تھے، ہم نے صنعت کے شعبے میں تبدیلی لیکر آنی تھی، افسوس یہ سب خواب پورے نہ ہوسکے۔جہانگیر ترین نے کہا کہ ہم نے پوری کوشش کی لیکن سب خواب ادھورے رہ گئے، دس سال ہم نے پی ٹی آئی میں محنت کی، جب چیئرمین پی ٹی آئی وزیراعظم کی کرسی پر بیٹھ گئے تو ہمیں ایک، ایک کر کے ہٹا دیا گیا، ہماری جگہ ان لوگوں کو بٹھایا گیا جن کو جانتے بھی نہیں تھے، پی ٹی آئی ایسے لوگوں کے ہاتھوں میں چلی گئی جو بہتری نہیں لانا چاہتے تھے، آج ہم ادھورے مشن کو پورا کرنے کے لئے اکٹھے ہو رہے ہیں۔استحکام پاکستان پارٹی کے چیئرمین نے کہا کہ دس سال پہلے شروع کرنے والے سفر کو پایہ تکمیل تک پہنچائیں گے، اس وقت شخصیت اہم نہیں ہے سب سے اہم عوام اور ملک ہے، اس کے بغیر کوئی اور دوسرا راستہ نہیں ہے، عوام نے فیصلہ کرنا ہے کونسی سیاسی جماعت بہترہے، عوام کے فیصلے سے ہی ملک کی تقدیر بدل سکتی ہے۔جہانگیرترین نے کہا کہ ایسا ملک بنائیں گے نوجوان اپنا ملک چھوڑ کر باہر نہیں جائیں گے، زراعت کا شعبہ ہماری ترجیح ہوگی، کسانوں کو اپنا حق حاصل کرنے کے لئے سڑکوں پر نہیں نکلنا پڑے گا، کسانوں کے حقوق کا تحفظ اور انہیں عزت دیں گے، ہم نے نعرے، بیانات نہیں عملی اقدامات کے لئے منصوبہ بندی کی ہوئی ہے۔انہوں نے مزید کہا کہ لودھراں کے عوام کا جلسے میں آمد پر شکر گزار ہوں، اپوزیشن پارٹیوں کو اپنا دشمن نہیں سمجھتا، دشمنی، نفرت کی سیاست کو ہمیشہ کے لئے ختم کرنا ہے، ہماری جدوجہد کا مقصد عوام کی مشکلات کم کرکے انہیں ریلیف دینا ہے، آئیں سب عہد کریں ملکر پاکستان کو عظیم بنائیں گے۔جہانگیر ترین نے کہا کہ ہم پوری محنت کے ساتھ اپنے وعدوں کو پورا اور کامیاب ہو کر دکھائیں گے، ایسا پاکستان بنائیں گے جس کا خواب دس سال پہلے دیکھا تھا، ہم اپنے منصوبوں کو عملی شکل دیں گے، ہم ہار ماننے کو تیار نہیں، اپنے سفر کو پایہ تکمیل تک پہنچائیں گے۔

اسلام آباد(پی پی آئی) امیر جماعت اسلامی اسلام آباد کی گرفتاری کے بعد حالات کشیدہ ہو گئے، جماعت اسلامی کا آبپارہ چوک میں احتجاج، کارکنوں کا پولیس اہلکاروں پر پتھراؤ، پولیس نے جوابی شیلنگ اور لاٹھی چارج سے سرینگر ہائی وے خالی کرا لیا۔جماعت اسلامی کے کارکنان نے میاں محمد اسلم کی قیادت میں کشمیر ہائی وے پر دھرنا دیا، سیکڑوں کارکنوں نے ٹائر جلا کر کشمیر ہائی وے بلاک کر دیا، میاں محمد اسلم نے امیر جماعت اسلامی سمیت دیگر کارکنان کی رہائی کا مطالبہ کیا۔اس موقع پر سجاد احمد عباسی سیکرٹری اطلاعات جماعت اسلامی نے کہا کہ فلسطین سے اظہار یکجہتی کے لیے کل ہر صورت غزہ مارچ ہو گآ۔واضح رہے کہ وفاقی حکومت، انتظامیہ کی جانب سے جماعت اسلامی کو سیکیورٹی وجوہات کی بنا پر سری نگر ہائی وے پر احتجاج کی اجازت نہیں دی گئی، اجازت نہ ملنے پر انتطامیہ کی طرف سے استقبالیہ کیمپ کو ہٹا دیا گیا، جس پر جماعت اسلامی کے کارکنوں کی جانب سے پتھراؤ کیا گیا۔پولیس نے مظاہرہ کرنے والے کارکنوں کو منتشر کرنے کیلئے لاٹھی چارج اور شیلنگ کی اور سری نگر ہائی وے کو مکمل طور پر ٹریفک کے لیے کھول دیا گیا۔