ذکاءاشرف آئی سی سی کے اجلاس میں شرکت کیلئے سنگاپور روانہ

لاہور: چیئرمین پی سی بی ذکاءاشرف آئی سی سی کے اجلاس میں شرکت کیلئے سنگاپور روانہ ہوگئے۔سنگاپور روانگی سے قبل لاہورائیر پورٹ پر میڈیا سے گفتگو کرتے ہوئے ذکاءاشرف نے کہا کہ وہ بگ تھری کے معاملے پر حق اور سچ کا ساتھ دیں گے۔ انہوں نے بتایا کہ وزیراعظم مصروف ہیں اس لیے ان سے ملاقات نہیں ہو سکی۔ جب وزیراعظم کو وقت ملے گا تو ضرور ملاقات ہو گی۔ ان کا کہنا تھا کہ انہیں چیئرمین شب سے ہٹائے جانے کے حوالے سے کوئی اطلاع نہیں ہے۔ اس سے قبل قذافی اسٹیڈیم لاہور میں پریس کانفرنس سے خطاب کرتے ہوئے ذکاءاشرف نے کہا تھا کہ بگ تھری کے معاملے پر اکیلے نہیں ہیں۔ سری لنکا اور جنوبی افریقہ ہمارے ساتھ ہیں۔ 8 فروری کو آئی سی سی کے اجلاس میں ملکی مفاد کو سامنے رکھ کر بات کریں گے۔ بھارت نے کوئی پیشکش کی تو دیکھا جائیگا۔چیئرمین پی سی بی کا کہنا تھا کہ وسیم اکرم کی مصروفیت کی وجہ سے قومی ٹیم کے کوچ کی درخواستوں کے لیے دو دن کی توسیع کردی ہے۔9 فروری کو قومی کرکٹ ٹیم کے کوچ کا فیصلہ کرلیا جائے گا۔