پشاور:پشاور میں آرمی اسکول پر دہشت گردوں کے حملے میں سو سے زائد بچے شہید اور 83سے زائد زخمی ہوگئے جبکہ آپریشن میں تین دہشت گردوں کو بھی ماراگیا۔پشاور کے ورسک روڈ پر واقع آرمی پبلک اسکول میں دہشت گرد سیکیورٹی فورسز کی وردی میں اسکول کے اندر داخل ہوگئے اور فائرنگ شروع کردی، فائرنگ کے نتیجے میں موقع پر کئی بچے جاں بحق ہوگئے ، لاشوں اور زخمیوں کو سی ایم ایچ اور لیڈی ریڈنگ اسپتال منتقل کیاگیا ۔ دہشت گردی کے واقعے کے بعد وزیراعظم نواز شریف وفاقی وزیر داخلہ چوہدری نثار کے ہمراہ پشاورکے لئے روانہ ہوگئے، وزیراعظم نے اس موقع پر کہا کہ پشاور کا واقعہ تکلیف دہ اور قومی سانحہ ہے،یہ میرا اور میری قوم کا نقصان ہے،اسلام آباد نہیں رک سکتا۔ وزیراعظم نے معصوم جانوں کے ضیاع پر دکھ کااظہار کرتے ہوئے کہا کہ خود آپریشن کی نگرانی کروں گا،حملہ آوروں کو ہرصورت کیفرکردارتک پہنچائیں گے۔ وزیرداخلہ چوھدری نثارعلی خان کا کہناتھا کہ عوام افواہوںپر کان نہ دھریں ،سیکورٹی ادارے صورت حال کو سنبھال لیں گے۔ وزیر اعلیٰ خیبرپختونخوا نے میڈیا سے گفتگو کرتے ہوئے بتایا کہ لیڈی ریڈنگ ہسپتال میں 23 بچوں کی لاشیں موجود ہیں جبکہ سی ایم ایچ میں 40 بچے زخمی ہیں اور 60 بچوں کی لاشیں موجود ہیں۔ انھوں نے کہا کہ دہشتگرد ایف سی کی وردیوں میں ملبوس ہو کر آرمی سکول پہنچے تھے۔ فوج کا آرمی سکول میں ریسکیو آپریشن جاری ہے ،دو دہشتگردوں کو مارا گیا ہے جبکہ ایک دہشتگرد نے خود کو دھماکے سے اڑا لیا۔ انھوں نے خیبر پختونخوا تین روزہ سوگ کا اعلان کر دیا۔امیر جماعت اسلامی نے صوبائی سنیئر وزیر عنایت اللہ کے ہمراہ اسپتال کا دورہ کیا اورواقعے کی مذمت کی ، امیرجماعت اسلامی کاکہناتھا کہ عوام کے جان ومال کا تحفظ حکومت کا فرض ہے اور اس طرح کی غفلت ناقابل برداشت ہے۔ اے این پی کے رہنما غلام احمد بلور بھی موقع پر پہنچ گئے اور واقعے کی پرزور مذمت کی۔

لندن:انگلش فٹ بال کلب ریڈنگ کے کوچ نیجل ایڈکنز کوچمپینز لیگ میں ٹیم کی بدترین کاکردگی پر برطرف کردیاگیا۔ انگلش کلب ریڈنگ کوگزشتہ روز چمپینزشپ میں6-1کی شرم ناک شکست کا سامنا کرنا پڑا تھا ۔ ریڈنگ چمپینزشپ میں 11شکستوں کے بعد 16ویں نمبر پر ہے۔ ریڈنگ کی جانب سے جاری بیان میں کہا گیاہے کہ کلب کی ناقص کارکردگی کے بعد کوچ کی تبدیلی بہت ضروری ہوگئی تھی۔ نجل ایڈکنزکو مارچ 2013میں کلب کا کوچ مقررکیا گیاتھاتاہم وہ اپنے دورانیے میں ٹیم کی کارکردگی کو بہتر بنانے میں نام ہوئے۔

جمیکا: کیربیئن پریمئرلیگ(سی پی ایل) کی جانب سے آئی سی سی کی ایسو سی ایٹ ٹیموں امریکا ،کینیڈا اور برمودا کے انڈر23 کھلاڑیوں کو نئے سیزن میں کھیلنے کا موقع دیا جارہاہے۔ امریکا ،کینیڈااور برمودا کے نوجوان کھلاڑی تربیت لینے ویسٹ اندیز پہنچ گئے ہیں، جن میں امریکا کے اسٹیون ٹیلر،کینیڈا کے نیخل دتا اور نتیش کمار اور برموداکے ٹرے مینڈیرزاور ڈیلرے راﺅلنز شامل ہیں۔ تما م کھلاڑی تربیت کے بعد مقامی ٹیموں کے خلاف میچوںمیںحصہ لیں گے جو بعد میں سی پی ایل کی مختلف ٹیموں میں شامل ہوکر ٹورنامنٹ میں حصہ لیں گے۔سی پی ایل کے نئے سیزن میں برموداکے اونیاس بیسکوم ،کرسچن برگیس، ٹرے مینڈیرز ،ڈیلرے راﺅلنز،کینیڈاکے سیت سمرانجیت دھندسا ،نیخل دتا، ارسلان خان، نیتیش کمار، فرحان ملک اور امریکا کے کوشال گنجی،کیفرفل اور اسٹیون ٹیلر جیسے نوجوان کھلاڑی حصہ لیں گے۔

برسبین:آسٹریلیا کے فاسٹ بولرریان ہیرس اورپیٹرسیڈل بھارت کے خلاف دوسرے ٹیسٹ سے باہر ہوگئے۔ ریان ہیرس معمولی انجری کا شکار ہوگئے ہیں جبکہ پیٹرسڈل کو پہلے ٹیسٹ کے کامیاب بولنگ دستے سے باہر کردیا گیاہے۔ ان کی جگہ جوش ہیزل ووڈ اور مچل اسٹارک کو ٹیم میں شامل کرلیا گیاہے۔ مچل اسٹارک نے گزشتہ ماہ ابو ظہبی میں پاکستان کے خلاف ہاری ہوئی بازی میں آسٹریلیا کی نمائند گی کی تھی ،ہیزل ووڈ کو لمبے عرصے بعد ٹیم میں دوبارہ بلالیا گیا ہے۔ آسٹریلیا اور بھارت کے درمیان دوسرا ٹیسٹ آج کھیلا جارہاہے۔

برسبین: مہندراسنگھ دھونی آسٹریلیا کے خلاف دوسرے ٹیسٹ سے بھارتی ٹیم کی کپتانی دوبارہ سنبھال لیں گے۔ بھارتی کپتان دھونی زخمی ہوکر پہلے ٹیسٹ سے باہرہوگئے تھے انھوں نے آسٹریلیا میں موجود ٹیم کو بعد میں جوائن کرلیا۔ ان کی غیرموجودگی میں ٹیم کی کپتانی ویرات کوہلی نے کی تھی،جس میں کوہلی نے کپتان کی حیثیت سے دونوں اننگز میں سنچریاں بنائی تھیںتاہم ٹیم کو 48رنز کی شکست سے بچا نہیں سکے تھے۔ دھونی نے ویرات کوہلی کی بہترین کپتانی کی تعریف کرتے ہوئے کہا کہ انھوں نے شان دار کارکردگی کا مظاہرہ کیا، دھونی بھارت سے باہر ٹیسٹ کرکٹ میں کپتانی کی حیثیت سے کارکردگی بہت خراب ہے ،ان کی کپتانی میں بھارت سے باہر کھیلے گئے 28میچوں میں سے صرف 6میچوں میں کامیابی نصیب ہوئی ہے۔ رواں سیریز میں آسٹریلیا کو ایک صفر کی برتری حاصل ہے دوسراٹیسٹ آج برسبین میں کھیلا جارہاہے۔